Yohane 10 - Katɔti Ɔku Kedee

Baƒonu Ɔdane Ɔbuni Ɔɔda Nwuna Baƒonu Kaduɛ

¹ Yesu ɔ́su-ma ɔnini, “Mɔɔsu-mii geen ka ni, ukyuli ɔni naaadubo kayakun kammɔ kenye bɔsia buduo lɛƒonuyu lɛmmɔ kemmo mmomu ɔba kama na ɔdubɔkɔ uduo ni, ɔdi uyune ku ala ubilene.

² Na ukyuli ɔni mɔɔsia kayakun kammɔ teeduo ɔba kemmo ni, anwu ndi baƒonu ɔdane ɔbuni ɔmmɔ.

³ Kayakun kenye ɔgyumanane ɔɔlɛmi kayakun kammɔ teete anwu. Na baƒonu bammɔ beenú-nwu lɛdi si ɔɔkpali-ma kalɛ na ɔ́sia-ma anyi na ɔɔtɔnku-ma taalɛku.

⁴ Na si ɔ́kpanku-ma ɔ́lɛku ni, ɔɔtɔ-ma lɛtɔtɔ na baƒonu bammɔ baasiaku-nwu kama ɔsika bagyi-nwu lɛdi.

⁵ Baaadubo ukyuli bamba bɔsiaku. Mmomu badubukeli batɔlɔ ukyuli ɔbambadi kudɔ, ɔsika baaagyi-nwu lɛdi.”

⁶ Yesu úbo-ma lɛgba lɛmɛni, nsu bétenu lɛla lɛni na ɔ́su-ma kalɔ.

⁷ Ɔmɛni ɔsu ni, Yesu ɔ́sɔ ɔ́su-ma ɔnini, “Mɔɔsu-mii geen ka ni, ami ndi ɔba kayakun ute baƒonu bammɔ.

⁸ Bekyuli bani ƒui nágyu bátɔ-mi lɛtɔtɔ na bébo aani si ami na ɔdi ni, badi beyune ku ala bebilene. Nsu baƒonu bammɔ bétenu-ma litemi.

⁹ Ami ndi kayakun kammɔ. Na ukyuli biala ɔni mɔɔsia-mi lɛlɔ teeduo ɔba ɔmmɔ kemmo ni, ndubɔƒɔ-nwu ngba. Ɔdubuduo mmɔ utaalɛ na utaakɛ adila abuni taadi.

¹⁰ Buyu kani na uyune uubo teebeyu na ɔdu bebuo na ubile ala lɛnɔ. Na ami ni, líbo kalɛ na lɛya na bekyuli belie ngba geen na bakɛ bɔnwuna ƒui.

¹¹ “Ami ndi baƒonu ɔdane ɔbuni ɔni nátuna ka ukpi na baƒonu bammɔ lili.

¹² Ukyuli ɔni na kayu kenye na béti-nwu na úbo ɔɔbla kabla ni, uukeli si ɔ́nu ka kegiti kɔdubo. Na ɔda baƒonu bammɔ unyene. Ɔsika ɔɔɔdi baƒonu ɔdane. Na baƒonu bammɔ lɛnɔ baaadi nwuna badi. Anwuɔsu kegiti kammɔ keeƒie baƒonu bammɔ na kegyingya-ma ƒui.

¹³ Ukyuli ɔmɛni uukeli, ɔsika kayu kenye na béti-nwu na úbo ɔɔbla kabla. Na ɔɔɔdaku baƒonu bammɔ lɛda.

^14-15 “Ami ndi baƒonu ɔdane ɔbuni. Na aani kalɛ na Ati ɔgyi-mi na ami lɛnɔ ngyi-nwu ni, lɛni kani na ngyi mina baƒonu, na ama lɛnɔ bagyi-mi. Na lɛ́tuna ka likpi na bana lili.

¹⁶ Mbo baƒonu babambadi na beeebo lɛƒonuyu lɛmɛni kemmo tɔ. Na ɔlɛka lɛkpanku ama lɛnɔ liboku. Na badubunu-mi lɛdi. Na bana ƒui badubunwini baƒonu lisu linwi na baƒonu ɔdane unwi kalɔ.

¹⁷ Na Ati ɔɔyɔ́-mi, ɔsika lɛ́tuna ka likpi na bana lili. Ɔmmɔ kama na lɛsɔ linwini libo mbelie ngba.

¹⁸ Ɔɔɔdi ukyuli ɔdi ndubo-mi bɔkana bɔdu. Mmomu ami ɔlati nénu kalɔ ka likpi. Mbo ɔyikun na lɛkana likpi lɛni. Na mbo ɔyikun lɛnɔ na lɛkana na lɛsɔ linwini libo mbelie ngba. Ɔmɛni ndi lɛla lɛni na Ati úbo-mi ɔda ka mbabla.”

¹⁹ Na Yesu etemila amɛni ɔsu ni, bule bɔ́sɔ búduo Yudaƒuɔ bammɔ ƒui ntɛ.

²⁰ Na bana akɔ pii básu banini, “Kɔyu kukpidi kɔsiaku ukyuli ɔmɛni, na uukpi libuo! Bi ɔsu na ɔlɛka binye biteenu ala ani na ɔɔsu?”

²¹ Nsu babambadi lɛnɔ básu banini, “Ukyuli ɔni na kɔyu kukpidi kɔsiaku ni, ulakana na wetemi lɛni! Dɛ na kɔyu kukpidi kɔdubɔya na ɔnumbwɛne ɔsɔ utaanu?”

Yudaƒuɔ Bátaƒɔ Yesu Bátadi

²² Na uwi ɔmmɔ kemmo ni, ɔdi kɔyɔ uwi ɔni na Yudaƒuɔ baadi bana limeyi lɛni baalɔ Kakpakɔ Bɔsɔku Teete Katɔti Limeyi.

²³ Na Yesu ɔkɛ uusié taavi na kakpakɔ kaduli mmɔ kesii kani baalɔ Salomo lɛgbanya.

²⁴ Mmɔ na Yudaƒuɔ bammɔ bábaka bámana-nwu, na béye-nwu banini, “Uwi ɛlɛ geen na adubunye etédu asa na asu-bu nwaa si awɔ ndi Ukyuli Ɔƒunadi ɔmmɔ?”

²⁵ Amu na Yesu ɔ́su-ma ɔnini, “Lɛ́ɛsu-mii ɔmɛni ḿbavi, nsu bilaƒɔ-mi taadi. Na ala ani mɔɔbla ɔkɛnku mina Ɔti ɔyikun lɛlɔ muudie-mi kenye.

²⁶ Nsu bilaƒɔ taadi, ɔsika bɛɛɛdi mina baƒonu bammɔ akɔ badi.

²⁷ Mina baƒonu beenú-mi lɛla lɛni mɔɔsu-ma. Na ngyi-ma. Na ama lɛnɔ basiaku-mi.

²⁸ Mɔɔyá na beelie ngba bɔni nsɔ naaadubo bɔsa kudii, na balayii ku udu. Na ukyuli biala ulakana-ma buƒie bɔƒɔ na mina kɔnu kemmo.

²⁹ Katɔti ɔni néti-ma úte-mi ni, úbomo útulo lɛla biala na ukyuli biala ulakana-ma buƒie bɔƒɔ na nwuna kɔnu kemmo kudii.

³⁰ Ati ku ami ƒui ni, bekyuli benwi na bɔdi.”

³¹ Mmɔ na Yudaƒuɔ bammɔ básɔ bála atabi banii beebó Yesu.

³² Amu na Yesu úye-ma ɔnini, “Lɛ́bla kabla kabuni pii na bina akɔ, na amii alati bɛ́nu na adi kabla kani na Ati úti ɔ́kya-mi enu kemmo ka mbabla. Na ala amɛni akɔ ɔmani lili ɔsu na bɛɛwia ka bibo-mi atabi?”

³³ Mmɔ na Yudaƒuɔ bammɔ básu banini, “Ɔɔɔdi ala abuni adi ɔsu na bɔɔwia ka buubó-ɔ atabi. Mmomu ɔni na eedumi Katɔti ɔsu! Ukyuli kani na adi, nsu aawia ka eti lɛlɔ enwini Katɔti!”

³⁴ Amu na Yesu údie kenye ɔnini, “Bénweni na Bunweni Kedee Ɔku kemmo ka Katɔti ɔ́su ɔnini, ‘Bise aani Katɔti.’

³⁵ Na bɔgyi ka lɛla lɛni na bénweni bákya Bunweni Kedee Ɔku kemmo ni, lɛdi litemi geen lɛni nse lísela uwi ƒui. Na mmɔ na Katɔti ɔ́lɔ bekyuli bani na ɔ́ya básu nwuna litemi buni ɔnii, ‘Bise aani Katɔti.’

³⁶ Nsu ami ni, bɔƒuna na Ati ɔ́ƒuna-mi ka libo kayawi kamɛni kemmo. Na bi ɔsu na bɛɛsu bɛni muudumi Katɔti ka lɛ́su nnii ami ndi Katɔti Ubidi ɔsu?

³⁷ Na si ɔɔɔdi mina Ɔti kabla na mɔɔbla ni, bitaƒɔ-mi bitadi.

³⁸ Nsu si anya na mɔɔbla bɔdi ni, si ina bilaƒɔ ami ɔlati taadi ni, ɔdi ka bɛƒɔ ala ani na mɔɔbla anya bɛdi. Na si bɛ́bla lɛni ni, bɛdubɔnu bɔti kɔnakunwi ka Katɔti uliku-mi na ami lɛnɔ nliku-nwu.”

³⁹ Mɛni lɛnɔ ni, Yudaƒuɔ bammɔ básɔ báyɔ ka beƒie-nwu, nsu ɔ́sɔ ɔ́lɛ-ma enu kemmo.

⁴⁰ Ka Yesu ɔ́tɔlɔ-ma kudɔ ni, ɔ́sɔ ɔ́via Yordan Ketu na úsie útélie kesii kani na Yohane ɔ́kya útaakpila bekyuli ntu dii.

⁴¹ Na bekyuli pii bébo-nwu kudɔ. Na básu lɛlɔ banini, “Yohane útabla akɔla budie taatina bɔdi. Nsu lɛla biala na Yohane ɔ́su na ukyuli ɔmɛni lɛlɔ ni, líbo-nwu kemmo lɛni.”

⁴² Na bekyuli pii báƒɔ Yesu bádi.