Yoel 2 - Katɔti Ɔku Kedee

¹ Vwi kekpo kakpɛɛ na ete bɔti na Sion, na mina kɔbi kedee lɛlɔ, na liƒu litaada bekyuli ƒui na kalɔ kammɔ lɛlɔ, ɔsika Unwoti limeyi lɛni na ɔtɛ litemi lɛ́si lɛdubo.

² Na limeyi lɛmmɔ lɛdubo bɔbla suu, na liƒlukutu suu lɛdi lɛƒɔ kayaa ku abi lɛlɔ. Na bekpone lisu bonwu lɛdi lɛdubɔda lɛlɛ bani udu nétedie tɔ lɛlɔ kudii na badi lɛnɔ basɔ belebo kudii.

³ Ogya ɔdubo butaakywi na bana anumi ku kama na mmɔ ɔni na ɔdi ulakana bukeli. Na kalɔ kani nse aani Eden kemo kadubunwini kɔnwinimi kalɔ kakwiidi kani nsɔ naaadia lɛla lɛdi bɔbla si uwi ɔni na békpo na bébile ala báwɔlɔ.

⁴ Bana bɔnu buse aani bapɔnkɔ bani nkɛ mɔɔƒulu taavi.

⁵ Na bana bɔƒulu bɔmmɔ bɔɔku aani bapɔnkɔ kɛɛkɛ pii ɔdi na bada baaní na abi eli mmɔ ku kɔku aani ogya mɔɔda taakyula lɛku na ala eetulo.

⁶ Na bana bɔnu lɛti lɛti muedi bɔɔda liƒu geen.

⁷ Bakɛ lɛnungyie kemmo aani bekpone sɔsɔ na baakɔ́ awodu taayu ɔni na beledeyi na bana ulu lɛlɔ munu munu.

⁸ Baata ku usi kɔnakunwi, nsu balatuaku lɛlɔ. Na atula ku kɔtaminta kɔni mɔɔsiáku-ma kulaya na benwini kama.

⁹ Bábuma lɛlɔ bétéwi ɔma unengudi ɔmmɔ kemmo na bakɛ awodu eli na béduo kɔduli kemmo na badi bakɛ ƒansili aani beyune kalɛ.

¹⁰ Na kalɔ ƒui kaagyú taawɔ na kayaa kaakunku. Na ɔƒɛ ku kɔbuli ƒui kɔ́bla suu na ayabi lɛnɔ áda bukeye áya.

¹¹ Unwoti Katɔti mɔɔtɔnku bekpone lisu bonwu bamɛni na beenú-nwu lɛdi. Katɔti litemi bɔtɛ limeyi lɛdi liƒu limeyi bonwu geen na ukyuli biala ulakana-ni kenye bunye.

Unwoti Ɔ́siaku Bekyuli Ɔnii Bebo-nwu Kudɔ

¹² Unwoti ɔnini, “Útakpɛ tɔ kama útavili. Bɛkana na binwini bibo-mi kudɔ ku bina kayi ƒui. Bise keku kalɔ ku buwulo ku kɔnyana! Na binyimi kenye.

¹³ Ɔɔɔdi bina lɛwu na bɛɛní bɛbwɛ biti bɛtina ka biiwulo kɔnyana. Mmomu binwini bibo-mi kudɔ ku kayi kani muunú ɔlɛ na bina ekpidi ani na bɛ́bla lili. Mɔɔnu kɔnyana na mbo lɛƒɔndia na ndaku ukyuli lɛda. Neeeti kɔnyi buti buti. Na naaayɔ ka ntaani kɔtu lɛnɔ.

¹⁴ Ami ndi Unwoti Katɔti na ɔƒɛni kalɛ ndubɔvumana mina kasusu na lɛnu-mii kɔnyana. Na kusɛ kusɛ ɔdubɔsiaku-mii na bɛkɛ edula pii ku ntɛ na biti bɛbla lɛkpa etela bite-mi.”

¹⁵ Vwi kakpɛɛ na Sion! Na alɔ bekyuli bammɔ ƒui na bɛsa bɔsa kedee na mina lɛnyi lɛlɔ bɛtina kalɛ na biiwulo kɔnyana na bina kenye kani na biinyimi kemmo.

¹⁶ Na asia anu ka ukyuli biala ɔ́klibi lɛlɔ kaduɛ na ɔ́manku ka ɔkpali-mi. Na aya na benengu ku banamu ku bagya ku bele ƒui bata bana emeyi kadikɔ bebo.

¹⁷ Su mina bakpane bani nnye kakpakɔ kayakun ku lɛkpabi ntɛ mmɔ na bewulo bakpali-mi banini, “Unwoti, ƒɔ ƒula kadi bekyuli! Na taya na kadi bamba bekyuli beti ƒula bekyuli benwini lɛƒiankula na bataama-ma teeye banini, ‘Wɛ na bana Unwoti ɔkya?’ ”

Unwoti Ɔdubute Nwuna Bekyuli Kusɛ Kusɛ

¹⁸ Ɔmmɔ kama ni, Unwoti anumi égyie na kalɔ kammɔ lɛlɔ, anwuɔsu ɔ́nu bekyuli bammɔ kɔnyana.

¹⁹ Unwoti údie kenye na ɔ́su nwuna bekyuli ɔnini, “Bɛnu, líti edula ku ntɛ ku nnɔ muumene-mii na ala ammɔ emo-mii. Na nsɔ lɛɛɛdubo bɔya na kadi bamba bekyuli beteedumi-mii taama.

²⁰ Bekpone badi bási kalɔ kammɔ katɔ kakɛ na bébekpo-mii, nsu ndubo-ma bɔbɔku butákya kalɔ kakwiidi kani náƒɔ ogya kemmo. Na bani ntɔ batáyii udu na ɛpu ɔmmɔ ɔƒɛ katukɔ na babambadi bawɔlɔ na ɛpu ɔmmɔ ɔƒɛ kanukɔ na bebun beteenwenyi.” Na Katɔti nábla ala enengudi amɛni.

²¹ Bɛya na kalɔ kammɔ ƒui kakɛ lɛlɔyɔ na ebiti ada-ka, ɔsika Unwoti ɔɔbla akɔla ala budie taatina.

²² Amii alakpi akɔ bebuo lɛnɔ ƒui bɛda bɔyia bɛya, ɔsika livo buni lɛ́sɔ línwini líbo liiwi bina kɔdikɔ ƒui. Na egyii ammɔ lɛnɔ ése kalɔ adaku bɔnwu ku anwingyie ammɔ ƒui ku adingyii lidu bamba ƒui ásɔ énwini ébo ana udu kenye.

²³ Amii bani nkya Sion ƒui lɛlɔ lɛyɔ-mii na ebiti ada-mii na Unwoti bina Katɔti lɛlɔ, ɔsika ɔ́ya na ɔƒɔwi ɔnantu ku ketudi ɔnantu ɔ́na úte-mii kaduɛɛ aani kuuku kalɛ.

²⁴ Na kamu ku anta adubɔƒɔ bina nkpa bɔni na biibó edula ebi teewi kaduɛ. Na bina akpambui adubuyi ku ntɛ ku nnɔ lɛnɔ.

²⁵ “Ami bina Unwoti Katɔti ndubɔsɔku ala ani na bɛ́yila lite-mii. Ala ani na lɛ́tala baalɔlɔ esu esu ammɔ na bébekpoku-mii na bébile mmɔ.

^26-27 Na bɛdubɔkɛ bɛdi bimo na udu-mii ɔkwɛ na bɛdubumwi ami bina Unwoti Katɔti ɔni nábla akɔla ala amɛni udu úte-mii. Na bɛdubɔti ka ami nlieku-mii, na ndi bina Unwoti Katɔti. Ɔbambadi ɔsɔ uuubo! Na kɔƒa kɔsɔ kulékpo amii mina kadi bekyuli kudii.

²⁸ “Na ɔmmɔ kama ni, ndubuti mina Kɔyu lite bina akɔ ɔdi biala na bina bebi bananabi ku belekubi badubo-mi kenye budie. Na bina benengu badubo ana buteegye. Na bina bakloƒu lɛnɔ banu kɔyu kemmo ala budie taatina.

²⁹ Na emeyi amɛni kemmo ni, ndubuti mina Kɔyu lite mina kabla bablane banana ku beleku muedi.

³⁰ Na ndubɔya akɔla budie taatina ataalɛ na kayaa ku kalɔ lɛlɔ ƒui. Bɛdubɔnu ubugya ku ogya ku uyɔ pii.

³¹ Ɔƒɛ ɔdubɔbla suu, na kɔbuli anumi adubugyie aani ubugya, asa na Katɔ Ɔyikune limeyi bonwu lɛmmɔ lɛdubo na kɔbuli anumi adubugyie aani ubugya, asa na Katɔ Ɔyikune limeyi bonwu lɛmmɔ lɛdubo.

³² Uwi ɔmmɔ kemmo ni, ukyuli biala ɔni makpali Blɔti na wevele-nwu kɔnyana bɔnu ni, ɔdubɔkɛ ngba. Unwoti úse kenye úse ka badi badubo bubu bulie ngba na Sion ku Yerusalem na nwuna bekyuli baƒunadi badubɔkya-ma akɔ.”