Yoel 1 - Katɔti Ɔku Kedee

Baalɔlɔ Báƒɔ Kalɔ Kammɔ Lɛlɔ

¹ Unwoti ɔ́su Petuel ubidi Yoel kenye kadi.

² Bise atu na binu amii kadi batɔnkune ku amii bani na bɛkya kalɔ kammɔ ƒui kemmo. Bɔlɛ na lɛla lɛni na bɛɛnu mɛni lɛ́ɛlɛ na bina uwi iye bina bati kuuku uwi na bínu dii?

³ Bɛsu bina bebi na ama lɛnɔ basɔku basu bana kaba kemmo bebi bani mebo.

⁴ Baalɔlɔ esu esu bonwu badi beebo taatɔlɔ na bébebile-bu edula ƒui na bádi lɛla biala bédie kede kede.

⁵ Bɛta na biteewulo amii ntɛ bekpine bani mɔɔyɔ́ ntɛ mini mini ku bani na mɔɔyɔ́ ntɛ kpakplaa ƒui, ɔsika békpeli lɛla biala báƒɔ-mii kenye.

⁶ Ɔsika kadi bayikune badi bébo na bébekpo bula kalɔ. Badi bayikune bani ukyuli ulakana bɔka. Na bebo anyi aani bagyata adi. Na bana abatayɛ ese yayaaya etulo gyata uwele adi.

⁷ Bébile anwingyie ku adingyii ana ƒui. Na báyalɛ egyii ammɔ evuo bédie, na kɔgba kukpludi kani nébu kɔtɛ.

⁸ Biwulo keku geen aani ugblebi ɔni náyila ɔnana ɔni na ɔdubo bulieku.

⁹ Edula ku ntɛ lɛkpa etela ƒui kenye kékulo na Unwoti kaduli. Na amii bakpane bani ndi Unwoti kenye benyene ƒui bíduo kɔnyana.

¹⁰ Mmo bɔ́ƒɔ lɛlɔ buwi ukpludi, na kalɔ kemodi kammɔ keewulo kɔka, na egyiibi ani muudie ntɛ ku nnɔ mmɔ ƒui ébie na áyɛyɛ enye.

¹¹ Biteewulo kɔnyana momoomo amii bemonsene ku adingyii lɛlɔ banune ƒui. Anta ku kakpa ƒui káyii udu na mmo ƒui lɛlɔ ɔni na edula adi asɔ eeenye na baƒɛ.

¹² Adingyii ku anwingyie ƒui áyɛyɛ na éwile enye ukpludi. Na bekyuli báyila lɛlɔyɔ biala.

Binwini Kayi

¹³ Biti adikpi bɛda bɛtina ka biiwulo kɔnyana na biteewulo, amii bakpane bani ndi Unwoti kenye benyene na bɛɛbla-nwu kabla na lɛkpabi lɛlɔ. Bɛtɛ adikpi ammɔ kemmo usien umodi amii bani muunye-nwu anumi taabla-nwu kabla, ɔsika etela lidu ku ntɛ etela ammɔ ƒui kenye kékulo na Unwoti kaduli.

¹⁴ Bɛlɔ benengu bammɔ ku bekyuli bani ƒui nkya kalɔ kammɔ lɛlɔ na bɛsa bɔsa kedee na mina lɛnyi lɛlɔ na Unwoti kakpakɔ na ete-ma bɔti na benyimi kenye ku lɛlɔ kalɔ buboku ku lɛlɔ bɔti bɔda sɛɛn. Na bewulo bakpali Unwoti bevele-nwu.

¹⁵ Bɔ́nu lɛla lɛni na balanu! Unwoti limeyi lɛmmɔ lɛ́tua-bu na nwuna kɔtu bɔni bonwu bɔmmɔ bɔ́da-bu bɔ́kya.

¹⁶ Bula adila ƒui áyii udu, na limeyi lɛdi bɔdi bɔsɔ buuubo na Katɔti kakpakɔ.

¹⁷ Edula ákwii akya kalɔ kemmo na adi asɔ eeebo na baƒɛ. Na bula linwu ƒui lɛdaku bɔbwɛ na anta iye kamu kadi kasɔ keeewi-ni kemmo.

¹⁸ Bula bebuo nkɛ mɔɔví taakɔ taayu mɛni na baava ka balakɛ livo lɛni na bakun ɔsu. Na baƒonu bammɔ beebó abi geen.

¹⁹ O Unwoti, muuwulo taakpali-ɔ, ɔsika livo ƒui líkpi na bula bebuo kadikɔ, na egyii lɛnɔ ákwii enye aani si ogya nákwii ɔ́vi.

²⁰ Alakpi akɔ bebuo lɛnɔ muedi basɔ beeebo ntu bɔni na bani na baava taakpali-ɔ, ɔsika ntukpa ƒui bɔ́kwii na aku ƒui áyɛyɛ na livo lɛsɔ liiibo-ni kemmo.