Yesaia 66 - Katɔti Ɔku Kedee

¹ Unwoti ɔnini, “Katɔ na líse mina lɛgaboku. Na kalɔ lɛlɔ mina lɛgba lɛnya. Na ɔtɔ ɔmani udu na bɛdubɔtu bite-mi? Na wɛ na ndubulie lɛnwuna?

² Mina kɔnu nábla ani bɛɛnu mɛni ƒui na ébo éte kalɛ na ese. Ami Unwoti násu. “Bekyuli bani mɔɔyɔ́-mi kaƒɔ ni, ama ndi bani muuboku lɛlɔ kalɔ na bana ekpidi eeduo-ma, na lɛlɔ lɛɛtɔ́-ma ku bɔyia si bénu-mi lɛdi, na mina lɛlɔ kani na bana anu asia.

³ Nsu ukyuli biala nádu ɔmantɛ akɔ ka ɔkpa ute-mi ni, use aani ukyuli ɔni nádu nwuna ukyuli ɔkpana. Na ɔdi biala nádu koƒonubi ka ɔkpa ute-mi ni, use aani ukyuli ɔni náƒɛ akpewe limɔ. Na ɔdi biala néti kakpa edula ebi ka ubakpa ute-mi ni, use aani ukyuli ɔni néti ɔplakuo ubugya uboku-mi. Na ɔdi biala makyula oloƒui mete-mi use aani ukyuli ɔni mɔɔkpá baƒiɔ. Amii alati bɛ́ƒuna ala ani na bɛɛyɔ́ bíte lɛlɔ na binye bɛɛbla ala ani muusé lɛlɔ mɛni, ka anya mɔɔda-mii kubiti ɔsu.

⁴ Bíni bɛnii bilákpete-mii ɔni na mɔɔkpali-mii na bilásia mina ala ani na mɔɔtina-mi kama. Mmomu ala ani na nkisi ni, anya na binye bɛɛbla, nsu bɛgyi nwaa ka bɛɛƒiɔ́-mi. Anwuɔsu lɛtuni lɛni na bɛɛyia geen na ndubɔya na libo-mii lɛlɔ.”

⁵ Amii bani mɔɔyia Katɔti na bɛɛbu-nwu si ɔɔtɛmi ni, binu-nwu litemi. “Na bina banwa bani muudie-mii lɛti na beekisi-mii na mina lɛnyi ɔsu baasu banii, ‘Unwoti udie nwuna ɔyikun keyi na bɔnu! Na udie-mii na lɛlɔ lɛyɔ-mii bɔnu.’ Nsu bani ƒui mɔɔsu ala amɛni udu ni, badubo bunwini ku kɔƒa kɔni naaadia bɔnu.”

⁶ Bise atu na binu kɔku ku kudu kɔni nda na ɔma unengudi ɔmmɔ kemmo ku kakpakɔ kammɔ kemmo. Unwoti ablala na adi. Anwu mɔɔƒɔ nwuna bekisine kayu kani ƒui námanku-ma.

⁷ “Bíinu dii ka nka uleku ɔwɔ asa na kawɔƒɔ kadu-nwu?

⁸ Ɔma na ɔnii anwu únu lɛni dii iye ɔbla kasusu ka ɔlɛ lɛni? Baawɔ kadi ƒui bekyuli limeyi linwi iye anumi bubo kunwi kemmo? Nsu Yerusalem anwu ni, útenu tɔ kawɔƒɔ bɔdu asa na ɔ́wɔ nwuna bebi.

⁹ Ami Unwoti lɛɛɛdubo bɔya na kaƒɔ kedu bɔwɔ na balawɔ-ka. Na neeetile kawɔƒɔ kenye si ubi údu bɔwɔ.

¹⁰ Bɛkɛ lɛlɔyɔ ku Yerusalem na ebiti ada amii bani mɔɔyɔ́-nwu. Bibo lɛlɔyɔ kudu momoomo amii bani néwulo-nwu kɔnyana.

¹¹ Ɔsika bɛdubo bɔdi bumo bɔsia kama na lɛlɔ lɛyɔ-mii aani kalɛ na bebiwɔ baanyimi anyii ntu teemo na bana bawɔne lɛgba lɛlɔ na baada-ma taamana kayi na lɛlɔ lɛɛyɔ́-ma.”

¹² Unwoti úse kenye úse ɔnini, “Ndubɔya na keyi buɛɛ kaƒɔ Yerusalem ɔma unengudi ɔmmɔ ƒui na akɛla pii asi kadi kadi bekyuli kɔlɔ lɛlɔ ebo na abábu na Yerusalem aani ketu kani mɔɔgbá na kalákwii. Na ɔdubɔbla aani ubi ɔni na uni ɔɔgyú taada nwuna enu kemmo na ɔɔƒianku-nwu ku ebiti.

¹³ Ndubɔyala-a kaƒɔ, Yerusalem, aani kalɛ na ubi uni ɔɔbla ubidi.”

¹⁴ Uwi ɔni na bɛdubɔnu ka ala amɛni aalɛ́ lɛni ni, bina kayi kadubɔyɔ buɛɛ na bɛlɛ lili aani kalɛ na livo lɛɛlɛ́ lili. Na bɛdubɔnu kalɛ na Unwoti ɔɔƒɛnimi kɔnu taakya nwuna kabla bablane bani mɔɔbu-nwu. Nsu nwuna bekisine bani mɔɔta teenye-nwu lɛlɔ ama ni, nwuna kɔnyi muubo-ma lɛlɔ.

¹⁵ Bɛnu! Unwoti uli nwuna kɛɛkɛ kemmo ɔdubo ku ogya na use aani ɔƒɛƒɛɛ ɔni mɔɔkya ligede. Ɔkɛnku kɔnyi kati kati ɔdubo na ɔdubo bekyuli bɔbɔku ku ogya unyemi ɔni mɔɔda gaganga.

¹⁶ Ɔsika ogya ku kewii na Unwoti ɔda ɔdubo ubatɛku bekyuli litemi na Unwoti kewii kammɔ kadubo bekyuli pii bɔdu.

¹⁷ Unwoti ɔnini, “Bekyuli banii muukisi lɛlɔ na baasiaku lɛlɔ lisu teesie alakpi akɔ taatákpa baƒiɔ na baakun baplakuo ku besi ku bayikpɛ ku ala bamba ani muusé lɛlɔ ni, bana ƒui badubɔnuku-ni na bana kɔwɔlɔkɔ kamɛni.

¹⁸ “Ngyi bina ablala ku kakali ƒui. Na uwi údu ka libo na ndubɔsala kadi ƒui bekyuli ku adi lidu batɛmine ƒui na lɛya na banu kalɛ na muukeye.

¹⁹ “Ndubo akɔla budie taatina ala bɔbla na lɛtina-ma mina ɔyikun ɔni na mbo na bani nébu beli na bana akɔ ni, ndubuti-ma limene Tarsis ku Pul ku Lud ku Mesek ku Tubal ku Yavan ku ntuntɛ kalɔ na ɔgyu kakaaka na lɛya na besie batákɔ lɛsa bete kadi bani bekyuli nétenu-mi tɔ kɔku kalɛ na muukeye.

²⁰ Na badubɔlɛku bina banwani bɔsiku kadi bekyuli ƒui kɔlɔ lɛlɔ beboku ami Unwoti aani akpala kalɛ na Yerusalem. Na badubulie bapɔnkɔ ku bebuo ala betine ku kɛɛkɛ lidu lidu ku bebuo ala betine ku keƒu lɛlɔ bebo. Badubo-ma bɔkpanku buboku aani kalɛ na Israelƒuɔ beeti bana kakpa edula etela taakya akyami ani na bédie bése sɛsɛɛ úte emeyi amɛni udu kemmo teeboku-mi na mina kakpakɔ.

²¹ Na bana akɔ na ndubɔƒuna badi na benwini bakpane ku Lewiƒuɔ.

²² “Kalɛ na katɔ kawɔdi ku kalɔ kawɔdi kani na ndubɔbla kadubɔkya uwi ƒui ni, lɛni kani na ndubɔya na ƒula lɛnyi ku bɔwɔ basɔ balása kudii.

²³ Na lɛla lɛni na ami Unwoti mɔɔyá na bɛti ni, limeyi lideedi biala na kɔbuli kemmo ku lɛnwunameyi biala lɛlɔ ni, ɔdi biala ubo na ubakya-mi lili kalɔ.

²⁴ Mina bekyuli badubusie na batánu bekyuli bani náta bénye-mi lɛlɔ kalɛ na beklubi baakun-ma ɔlɔna na beklubi bammɔ belekpi kudii. Na ogya ɔni mɔɔkyula-ma mmɔ lɛnɔ uleni kudii na lɛla lɛni na badubɔnu mmɔ ɔdi lɛla lɛni muusé lɛlɔ.”