Yesaia 64 - Katɔti Ɔku Kedee

¹ O Unwoti, bɔɔyɔ́ ka aya na kayaa kabwɛ kemmo na ayu ebo kalɔ. Na abi ƒui ataakunku na ƒula anumi!

² Na lɛla biala lɛbla aani kalɛ na baatu ogya taakya alakpi na aada. Na aya na ntu ƒui buteeƒuƒuo. Yu bo na aya na ƒula bekisine ƒui banu kalɛ na ƒula lɛnyi lɛɛda liƒu. Na aya na kadi bekyuli ƒui bayia-a, na benye-ɔ anumi bataatɔ kpakpaakpa!

³ Ɔsika uwi ɔni na ábla liƒu ala ani na bɔɔɔsia anu muedi ni, bɔyu na áyu ébo na abi ammɔ ƒui ákunku na ƒula anumi.

⁴ Na ɔ́si bati kuuku uwi ƒui ni, ukyuli biala útenu ku nwuna kɔtu iye ɔnu ku nwuna lɛnumi ka Unwoti bamba ɔdi ɔkya aani ƒula kalɛ na uukpó teete bekyuli bani na béti bana anu ƒui básia-nwu lɛlɔ lɛni.

⁵ Bekyuli bani ƒui na béti bana kayi ƒaa baabla lɛbuni na beenyimo taasia ƒula lilu lɛlɔ ni, aayu teebo teebebunku-ma. Nsu uwi ɔni na búsie anumi na bɔɔbla alaekpidi na bɔɔta teenye ƒula lilu lɛlɔ ni, éti kɔnyi ákya-bu. Na dɛ na bɔdubɔsɔ bɔbla na bɔkɛ bɔƒɔ?

⁶ Bula ƒui bɔ́ƒiɔ na buuuse sɛɛn. Na lɛla lɛbuni lɛni na bɔɔnu ka bɔɔbla muedi ni, lɛ́dɔli aani adikpi ani muusé lɛlɔ. Bula ƒui bɔ́yɛyɛ aani livete lɛnudi. Na bula alaekpidi énwini aani ɔƒɛƒɛɛ na ada-bu eebó taavinku.

⁷ Ukyuli ndi ukyuli ɔsɔ ulákpali-ɔ lɛnyi iye unye kpakplaa ute-ɔ, ɔsika ábɛla-bu ƒula anumi. Na bubie kani náƒɔ-bu keliela ƒui na bɔɔyii udu na bula alaekpidi ammɔ ɔsu.

⁸ Nsu ni, Unwoti awɔ ndi bula ɔti. Lɛvɔti na abu bɔdi na awɔ ndi ɔvɔne ɔmmɔ. Ɔsika bula ƒui ƒula enu kabla na bɔdi.

⁹ Unwoti, teti kɔnyi takya-bu tetulo kalɛ na ɔ́manku. Na sɔ tenyimo bula ekpidi eteesienku ƒui. Mmomu ni, Ati, bɔɔkpali-ɔ ka anu-bu kɔnyana, ɔsika awɔ ɔdi kani na bula ƒui bɔdi.

¹⁰ Ƒula lɛma linengudi lɛni na áƒuna ése sɛsɛɛ ƒui línwini ketele kalɔ kakwiidi. Sion únwini kalɔ kakwiidi na Yerusalem ɔsɔ ɔɔɔdi kesii kani madia lɛla lɛdi bɔbla.

¹¹ Na bula kakpakɔ kedee kani muukeye na bula bati kuuku bátaakpa-a ni, bákya-ka ogya bákyula. Na ala ani náƒɔ-bu kuye geen ƒui áyii udu atɛ kalɔ na asɔ eeebo lɛblakula.

¹² Ati, ala ani ƒui na awɔ ɔlati aanu mɛni kama ni, bulie na adubɔsɔ elie kpoo ataanu na alakya-bu kenye? Na ani-bu kɔtu mmomu avili?