Yesaia 60 - Katɔti Ɔku Kedee

Sion Ɔdubukeye

¹ “Yerusalem kadi bekyuli, bɛta na bikeye! Ɔsika Unwoti bukeye bɔ́tu aani ɔƒɛ na buuwi-mii lɛlɔ.

² Kalɔ lɛlɔ ƒui ku kana kadi bekyuli ƒui báƒɔ lɛlɔ bakya lɛdisa kemmo, nsu amii ni, Unwoti úbo-mii kudɔ, na nwuna bukeye búbewi-mii lɛlɔ.

³ Na kalɔ kadi bekyuli ku bana baga badubo-ɔ kudɔ babanu ƒula bukeye kadi kawɔdi kani négye-ɔ.

⁴ “Bibimi bina anumi na bɛnu! Bɛnu bɛmana na bɛnu bekyuli lisu bonwu bani nási badubo-mii kudɔ. Bina bebi bananabi basia ulu bási ɔlɔgyu, na bakwɛni bina bebi belekubi badububoku aani banamu.

⁵ Na si bɛ́nu ɔmɛni ni, bina anumi adubukeye, na kayi lɛnɔ kata-mii na bɛtalaku lɛlɔ katɔ ku lɛmɛnɛ. Na badubɔsiku ala abuni ku lɛkɛ lɛni na lɛ́si ketu ɔvi ku kadi bamba bekyuli akɔ ƒui beboku-mii.

⁶ Na bina kalɔ ƒui kadubuyi ku kɛɛkɛ lɛni na bebuo ala betine bani bási Midia ku Eƒa ku ala abuni pii bebeyile ɔma ɔmmɔ. Na Seeba kadi bekyuli badubɔsiku bana sika ugyiedi ku oloƒui beboku na adubunu ka beemwi Unwoti lɛnyi.

⁷ Kedar baƒonu ƒui badubo-ɔ kudɔ. Na Nebaot baƒonu bagyani bammɔ ƒui lɛnɔ benwini awɔ badi. Ndubɔƒɔ-ma aani etela na bekyuli beti ɔbu bete mina kakpakɔ kammɔ.

⁸ “Bi nkɛ kayaa mɔɔví mmɔ aani liƒlukutu? Na use aani babloduma néveyi bésela bana kakyakɔ?

⁹ Ƒula bekyuli benye bagya ami Unwoti na ntuntɛ kɔlɔ kɔni nkya ɔgyu kakaaka mmɔ. Na ɛpu lɛkɔlɔ bonwu lɛmmɔ lɛ́ɛgyu lɛtɔ kalɛ na litéti-ma liboku ɔma, ku bana sika ugyiedi ku ɔƒualadi ƒui. Ami Unwoti nábla ɔmɛni líte ƒula bekyuli kalɛ na bekyuli beti ɔbu bete ami bina Unwoti Israel Katɔti Kedee na bataanu kalɛ na biikeye.

¹⁰ “Yerusalem, ƒula ɔma unengudi awodu ani náka ámana-nwu ni, baƒɔ ndubo-nya bɔsɔku bɔtu. Na bana baga benwini bina kabla bablane. Lɛ́ni-mii kɔtu na mina livoƒi kemmo nsu ɔƒɛni amu ndubɔnu-mii kɔnyana ku mina lɛƒɔndia.

¹¹ Bɛdubɔlɛmi bina lɛban kayakun kenye biwi usien ku ɔƒɛ na kadi bamba batɔnkune bakpanku bana bekyuli beboku-mii ku bana akɛla ani na bebo ƒui.

¹² Na lɛga kadikɔ iye kadi bani néni banii balakya-mii kalɔ na babla-mii kabla ni, badubɔyii udu na ɔdi ɔsɔ ulénu-ma kɔku.

¹³ “Na Lebanon egyii kpakplaa enengudi lidu lɛni nkya-ma ƒui ni, badubɔlɛku-ni beboku. Na badubuti-ni banwi ala beti bakya mina kakpakɔ bɔdia kesii kani na mina lɛgba lɛɛnya.

¹⁴ Na bekisine bani nékpoku-mii ni, bana bawɔ badubɔlɛ akɔnkɔ kalɔ na bina lɛgba akɔ na basu-mii banii, ‘Sion ɔdi Unwoti Israel Katɔti Kedee ɔma unengudi.’

¹⁵ “Bekyuli békisi-mii na béni-mii uwi ɔni návi nsu ndubɔbla-a ɔma unengudi ɔni mɔɔdia bɔnu geen na bataakun lɛmɛnɛ na ƒula lɛlɔ úsela uwi ƒui.

¹⁶ Na adubɔkpala kadi bamba ku bana baga akɛla asiku-ma kudɔ ƒui kede kede na bɛnu bɛti ka ami Unwoti Israel Katɔti nédie-mii na lɛ́ƒɔ-mii ngba.

¹⁷ Na ndububoku-mii sika ugyiedi na abualagyie kenye, na liboku-mii sika ɔƒualadi na kalɔ kemmo abuala kpakplaa kenye. Na liboku-mii abualagyie na ligyii kenye na liboku-mii abuala kpakplaa na atabi kenye Na keyi buɛɛ ku litemi bɔtɛ ulu siin lɛlɔ na ndubɔya na utaadi-mii lɛlɔ aani bina batɔnkune kalɛ.

¹⁸ Na basɔ belénu kekpo ku ala bubile kɔku na ƒula liku. Na ndubo-mii bɔgyumana aani kalɛ na awodu aaka taamana lɛla lɛdi na bimwi-mi ka lɛ́ƒɔ-mii ngba ɔsu.

¹⁹ Na bɛ́sɔ bilawia ɔƒɛ iye kɔbuli bukeye bɔdi na ɔƒiiwi iye usien, ɔsika ami Unwoti ɔlati bukeye ndubo-mii buteewi úsela uwi ƒui.

²⁰ Bina ɔƒɛ iye kɔbuli kɔsɔ kɔɔɔdubo bɔnu kudii. Ɔsika ami bina Unwoti ndubunwini bina bukeye uwi ƒui. Na bina keku ku kɔnyana buwulo emeyi ƒui adububo kawɔlɔkɔ.

²¹ Bina kadi bekyuli badubulie siin na kalɔ kammɔ kabla bana ɔdi. Bese aani egyii ani na lɛ́lɛ na áta kalɛ na bedie mina bukeye keyi.

²² Kaduli kani bekyuli nse blii suɛ ƒui muedi badubunwini kadi bekyuli bani mbo ɔyikun geen. Ami ndi Unwoti na ndubo ala amɛni ƒui bɔbla kɔnakunwi si uwi na ana ɔblawi údu.”