Yesaia 6 - Katɔti Ɔku Kedee

Katɔti Ɔ́lɔ Yesaia Na Ɔ́bla-nwu Sɛɛn

¹ Lɛkwa lɛni kemmo na Ɔga Usia úkpi na lɛ́nu Unwoti. Na uli lɛgaboku kangyaa lɛdi lɛlɔ. Na nwuna awu gyɔlɔɔ bonwu ɔni na ɔkya atu áƒɔ Katɔti kakpakɔ mmɔ ƒui.

² Na Katɔti batu benengudi badi muukeye na bebo avwi aku aku na baalɔ-ma Seraƒim benye bámana-nwu. Ɔdi biala avwi anyɔ ebi-nwu anumi na anyɔ ebi-nwu lɛgba asa na ɔda anyɔ akladi uuveyi.

³ Na bana ƒui baatu kɔgya ku lɛdi linwi momoomo banini, “Unwoti Katɔti, ese kedee, kedee, kedee! Katɔ ku kalɔ kéyi ku ƒula lɛlɔyɔ tɛɛ!”

⁴ Na ebiti lɛnu lɛni na beedie lɛ́kunku Katɔti kakpakɔ kammɔ útéduoku kalɔ kemmo ƒui na uyɔ ɔ́ƒɔ Katɔti kakpakɔ kammɔ ƒui.

⁵ Amu na lɛ́su nnini, “Mina bɔkywi uwi údu, ɔsika alaekpidi ɔblane na ndi na alaekpidi bablane kaba kemmo na lɛ́si, nsu mina anumi ánu Ɔga ɔni ndi Unwoti Katɔti Ɔyikune Ƒui!”

⁶ Batu bamɛni akɔ unwi úveyi ɔ́vi lɛkpabi lɛmmɔ eli na údie lɛgyabi gaganga lɛdi ku lɛbuala lɛdi ɔ́siku ogya kemmo.

⁷ Na úti útuku-mi enyekuli na ɔ́su-mi ɔnini, “Nu, líti ogya lɛƒɛ lɛmɛni lítuku-ɔ enyekuli lɛlɔ. Na ɔƒɛni ni, Katɔti údie ekpidi ƒui na ƒula lɛlɔ.”

⁸ Amu na línu ka Unwoti uuye ɔnini, “Ɔma na ndubɔtala aani mina ɔtu kalɛ lɛkya mina bekyuli na ɔma ndubusie ute-bu?” Mmɔ na lɛ́su nnini, “Ami ndubo busie! Tala-mi!”

⁹ Na ɔ́su ɔnini, “Ɛɛn, awɔ sie! Tásu mina bekyuli anini, “ ‘Bɛdubunu mina etemila, nsu bɛɛɛdubo-nya kalɔ bunu. Na bɛdubɔnu ala ani mɔɔbla nsu bɛɛɛdubo-nya bɔnu bɔti na binu kalɔ.’

¹⁰ Geen ni, bana kɔyi kútili na bana atu áyu ɔkplu na bana anumi lɛnɔ ábwɛ. Si ɔɔɔdi lɛni ni, nka bana anumi adubɔnu nwaa na bana atu lɛnɔ adubunu na benu kalɔ na benwini bebo-mi kudɔ na lɛbwi-ma.”

¹¹ Mmɔ na líye Unwoti Katɔti nnini, “Uwi ɛlɛ kemmo na ndubuti lɛbla lɛla lɛmɛni?” Amu na údie kenye ɔnini, “Úti útédu uwi ɔni na ndubɔya na lɛma linengudi ƒui lɛbwɛ lɛyii udu, na bekyuli basɔ balakya-ni kemmo, na lɛtɔ lɛsɔ linye ukpludi, na kalɔ kemodi kammɔ ƒui kebie.

¹² Na ndubo bekyuli ƒui bɔbɔku budie kalɔ kammɔ kemmo na libile kalɔ kammɔ.

¹³ Na ina bekyuli bammɔ lɛkpa leevudi kani nébu ni, ama lɛnɔ ndubɔyila-ma udu. Nsu kalɛ na egyukwii eebú teenye si báda egyii báwɔlɔ ni, lɛni na mina badi bani na lɛ́ƒuna badi badubo bubu bulie kama.”