Yesaia 56 - Katɔti Ɔku Kedee

¹ “Bɛbla ala bɛsiaku ulu geen ɔmmɔ lɛlɔ, ɔsika ndubo uwi klukwii mbaƒɔ-mii ngba. Na bekyuli ƒui badubɔnu mina ɔyikun ɔni na mbo na lɛƒɔ ukyuli ngba na kalɔ kamɛni lɛlɔ kesi kesii.

² Ukyuli biala na ɔɔbu lɛnwunameyi lɛmmɔ na uláwia ka ɔbla likpidi ni, ndubute-nwu kusɛ kusɛ.

³ “Na kadi bamba bekyuli bani ƒui mɔɔbu-mi na baakya-mi lili kalɔ ni, batasu banini, ‘Unwoti ɔɔɔdubo-bu buti bubunku nwuna bekyuli lɛlɔ.’ Na banana bani nsɔ naaadubo bɔkana bɔwɔ ni, basɔ batasu banini, ‘Abu búnwini ekyweni akwiidi bunye.’ ”

⁴ Unwoti ɔnini, “Amii bɛdi lɛnwunameyi lɛmmɔ lɛlɔ ku mina litemi lɛlɔ kaduɛ kani, na bɛsia mina bunyimi bɔmmɔ anu.

⁵ Na ndubɔtu likpose atabi bɔlɛ mina kakpakɔ na linweni bina anyi lɛsia-nya lɛlɔ. Na ɔmmɔ lɛti ɔdia utulo si bɛ́wɔ bebi, ɔsika atabi ammɔ adubunye mmɔ uwi ƒui.

⁶ Kadi bamba bekyuli badubɔsiaku-mi kama na bayɔ-mi na bakpa na mina lɛnyi lɛlɔ. Badubɔbu mina lɛnwunameyi na badi mina bunyimi lɛlɔ.

⁷ Na ndubo-ma bɔkpanku buboku mina kɔbi kedee lɛlɔ na badubɔkɛ lɛlɔyɔ na mina kaduli kani kemmo na baakpali-mi kemmo. Na bana etela ku akpala ani na badubuti beboku-mi na mina lɛkpabi lɛlɔ adubɔƒɔ-mi anu. Badubɔlɔ mina kesii banii kaduli kani kemmo na bayawine ƒui baakpali katɔ.”

⁸ Unwoti ɔni mɔɔkpanku nwuna kadi bekyuli beƒiedi taabasala úse kenye kadi ɔnini, “Ndubɔkpanku mina bekyuli bani na béƒie bátɔlɔku lɛsiku kesii biala na béti-ma bésienku, na babasala ku bana banwani.”

Katɔti Ɔ́tɛku Balane Litemi

⁹ Amii beƒiebuo ƒui bɛlɛ bibo na bibaduli bina bebuo beƒiedi bibweli.

¹⁰ Amii Israel kadi benengu, amii na nka ɔlɛka binye bitaagyumana mina bekyuli aani bakpewe bani mɔɔgyumana kaduli. Nsu biiinye bilasia lɛla biala anu na bilebo-ma ɔda ɔdi lɛnɔ. Mmomu bulie kani na bilie biisié taasɔ na bɛɛlɛɛ.

¹¹ Batɔnkune badɔlɔdi, bítavumanaku bakpewe bani na bɔdi kani na bagyi na lɛla lɛla lilemo-ma kudii. Baƒonu badane bekpidi bani muulie taabla bana bebuo ulikplu na bɛdi, na amii lɛti bɔdia kani na bilie bite.

¹² Na bɔsu kani na bɛɛsu lɛlɔ bɛnini, “Bɛya na bɔni-mu na bukpi-mu! Na kɔnaadi lɛnɔ ɔsia-nwu lɛlɔ lɛni kani, na bɔkya lɛlɔ ebiti.”