Yesaia 53 - Katɔti Ɔku Kedee

¹ Ɔma náƒɔ-bu ɔ́di? Na ɔma bene na Blɔti údie nwuna ɔyikun ɔ́tina?

² Unwoti kabla ɔblane ɔmɛni ɔɔlɛ́ lili na Unwoti anumi aani kugyii kebi kani nákwɛ na keedie evete iye kugyii ugyitu ɔni muutulo taalɛ kalɔ kakwiidi kemmo. Na ɔɔɔdi ɔga ɔni mɔɔdia bekyuli bɔnu. Nwuna lɛla lɛdi liiise ɔni basu banii ani mɔɔda bekyuli kayi.

³ Bekyuli békisi-nwu na béni-nwu ɔni na nwuna ngba ƒui bɔdi kɔnyana ku lɛbibo sɔɔn. Ukyuli ɔdi uláwia-nwu ulánu na búdie-nwu atu na bɔɔɔdaku-nwu lɛda!

⁴ Anwu ɔlati ɔ́bwi-bu lɛlɛ na únu ɔlɛ pii na abu ɔsu. Na kawɔlɔkɔ ni, bɔsu na bɔ́su bɔnii anwu ɔlati ekpidi ɔsu na Katɔti ɔ́ni-nwu kɔtu lɛni.

⁵ Nsu ɔkɛnku bula ekpidi ɔsu na bébo-nwu ulikplu kemmo bákya-nwu ɔlɛ lɛlɔ na báƒɛ-nwu lɛlɔ ekpo ƒui kpɛtɛ kpɛtɛ. Na lɛbibo lɛmɛni kemmo na ɔ́sia na ɔ́ƒɔ ngba úte abu na bɔ́kɛ bɔnwuna.

⁶ Bula ƒui buse na buse aani baƒonu bani náyii ulu, na ɔdi biala úti nwuna ulu úsela kesii kani na ɔɔyɔ́. Na lɛtuni lɛni na nka ɔlɛka bɔƒɔ ni, ani na Unwoti úti úte-nwu na bula lili.

⁷ Bekyuli bédumi-nwu na básupa-nwu ɔni na nka ɔɔɔdi anwu na babla lɛni, nsu útakpete na ɔsu lɛla lɛdi. Mmomu úbile kenye kpoo na bada-nwu béselaku aani koƒonu kɔni béti batádu. Na ɔkɛ aani koƒonu kɔni naaadaku-ni si beekúlo-nwu linwini na útebimi kenye.

⁸ Bákya-nwu kɔƒa na útakɛ ukyuli ɔni náƒɔ-nwu kenye. Údie kaba kadi? Bi na ɔ́bla úse asa baadú-nwu na kayawi kamɛni kemmo? Alaekpidi ani na mina bekyuli bábla ɔsu na bádu-nwu lɛni.

⁹ Útanyi ɔkɔ ɔdi iye ɔta unye ukyuli ɔdi lɛlɔ, nsu báva-nwu básalaku balakɛne ku bekyuli bekpidi.

¹⁰ Nsu Unwoti ɔlati nése ɔmɛni úse lɛni ɔnii nwuna kabla ɔblane ubo abi amɛni udu na badu-nwu, na ɔƒɔ kayu na bekyuli ƒui lili na bana ekpidi ɔsu. Na ina ka úbo lɛni muedi ni, ɔdubulie na ɔnu nwuna bawɔ bawɔ. Na ɔkɛnku nwuna lɛlɔ ni, lɛla lɛni na Unwoti ɔ́lɛ ugyii úse lɛdububo-nwu kemmo.

¹¹ Ɔdubɔnu lɛla lɛni ndubɔlɛ lɛsi kɔyu kemmo abi ani na úbo, na kaƒɔ kaba-nwu. Ka mina kabla ɔblane ɔni nse siin ɔgyi mina lɛyɔla ɔsu ni, ɔdubɔya na bekyuli pii ku Unwoti ntɛ bɔdia. Na anwu ɔlati ɔdubɔƒɔ-ma ekpidi uti.

¹² Unwoti ɔdubɔƒɔ kayu kabuni bute-nwu na ute-nwu kenyekɔ kenengudi ku ɔyikun na kalɛ na úbo abi útédu ku kukpi kemmo na ɔ́ƒɔ kayu na bekyuli ƒui lili ɔsu. Báka-nwu bákya bekyuli bekpidi akɔ. Ɔsika bekyuli pii ekpidi na ɔ́ƒɔ ɔ́sia lɛlɔ, na úti lɛlɔ ɔ́kpa na bana lili, na ɔ́ƒɔ-ma ngba.