Yesaia 47 - Katɔti Ɔku Kedee

Babel Úbuli

¹ “Babel, awɔ ɔni nse aani ugblebi adagyaa, ta ƒula lɛgadi liboku lɛlɔ, na etélie ɔtumu akɔ, ɔsika ukyuli ɔdi ɔsɔ ɔɔɔdubo-ɔ bɔlɔ ɔnii ukyuli ɔni náƒɔ kuye na baabu-nwu.

² Teesie na atálɛ akɔnkɔ na kukɔ lɛlɔ na ataakɔ ɔlaaƒɔ. Na ada ƒula lɛdiku lɛni na eetile anumi ebimi. Na ani ƒula awu gyɔlɔɔ ɔmmɔ akɔliku katɔ na edie ƒula lɛgba ku ebuli ewi na akya ntu lɛgba avia ketu kammɔ.

³ Bekyuli badubo-ɔ kasɔngya bɔnu na kɔƒa kukpo-ɔ, ɔsika adubo bɔvi ku kasɔngya. Na ndubo kasi budie na ɔdi ulébu iye ukeli.

⁴ Ami ndi Unwoti Ɔyikune Ƒui, Israel Katɔti, Kedee. Na ami mɔɔƒɔ́-ma ngba.

⁵ “Babel, bile kenye kpoo na asɔ elie kasuudikɔ mmɔ, ɔsika kadi kadi bekyuli basɔ baaadubo-ɔ bɔnu aani bana uleku ɔga.

⁶ Kɔnyi na líti lɛ́kya mina bekyuli anwuɔsu na lɛ́ya na bíƒie-ma kalɔ bɛ́ƒɔ, na bɛ́ya na kɔƒa kúkpo-ma na anumi éwi-ma kalɔ. Bítanu-ma kɔnyana munu munu, mmomu bɛ́bla-ma kalala útédu bana benengu ƒui lɛlɔ.

⁷ Ɔ́bla-mii aani bɛdubo lɛga lɛmmɔ bɔdi buteesie uwi ƒui. Na bɛ́sɔ bítabu ala ani na bɛɛbla lɛlɔ bítanu, na ubo-mii kasusu kemmo ka lɛla lɛdi lɛdubo amii lɛnɔ bɔbla.

⁸ “Bɛ́bu bɛnii amii kani ndi bayikune ntulo ƒui, na amii bilénwini bekpinele, na bina bebi lɛnɔ belekpi. Mmomu lɛla lɛni kani lɛlɔ na bina anu asia ndi, bɔdi ku bɔni ngba emini. Nsu binu lɛla lɛni na mɔɔsu-mii ɔƒɛni.

⁹ Bina evo ku bɔkanti ƒui kenye kadubo bukulo na binwini bekpinele, na bina bebi lɛnɔ bekpi kɔnakunwi ɔni na kama bɔnu buuubo.

¹⁰ Bɛ́bɛ binye bina ekpidi pii ani na bɛɛbla kama aani kekpo lɛgyumanala na bíse kayi bɛɛsu bɛnini, ‘Ukyuli ɔdi ulanu-bu!’ Nsu bina lɛlati ku lɛnunda líse-mii lisusu, na bɛ́kali ka amii kani ndi bayikune bani mɔɔdi lɛlɔ.

¹¹ Nsu na bina tati tese kemmo ni, ɔgbankpi ɔdubo-mii bɔlɛku, na bina evo ammɔ ƒui aaadubo-mii bubunku munu munu.

¹² “Amii binye bitaabla bina evo, na bitaakanti kalɛ kani na bítaabla, ɔƒɛni kalɛ bina evo ammɔ adubɔkya ukyuli ɔdi liƒu! Bɛya na buti-nwu lɛni.

¹³ Bíitu lɛlɔ bɛ́vi bɛɛwia kasusu na bekebone ku bani mɔɔnu kɔbuli taasu-mii ala kudɔ uwi gyɔlɔɔ mɛni. Bɛsɔ binwini bisie na bitéye-ma ala ani ndubo bɔlɛ ku kalɛ na bɛdubɔkɛ bɔƒɔ.

¹⁴ Bekyuli bani néti bana anu básia bekyuli bani mɔɔnu ayabi taasu-ma ala lɛlɔ ni, bana lɛlɔ libo kɔnyana geen utulo lɛtɔ lɛni na bákya ogya kemmo na lɛɛkywí. Na ukyuli biala ɔni mɔɔwa-a ogya ɔmmɔ udu muedi lɛlɔ lilábla gugungu.

¹⁵ Bekyuli bani na bɛ́bi bɛsiaku usien ku ɔƒɛ bina ngba emeyi ƒui ni, ɔmmɔ ndi bana kawɔlɔkɔ kebunku kani na bakana-mii bute, na ama alati baaagyi kesii kani na bésela na balakana-mii bɔƒɔ lɛnɔ.”