Yesaia 46 - Katɔti Ɔku Kedee

Babelƒuɔ Baƒiɔ Lɛlɔ Kɔtɛ

¹ Babelƒuɔ baƒiɔ bani ndi Bel ku Nebo ɔdi ɔ́sa. Bana baƒiɔ egyiiku na bála básia bebuo ala betine lɛlɔ bésela. Na ɔdi etila úte bebuo bani náanɔ geen mmɔ.

² Aanu baƒiɔ bammɔ enu ku akɔnkɔ nlɛ kalɔ, na bátakana na báƒɔ bekyuli bammɔ ngba na bana ɔgbankpi kemmo. Nsu básɔ bágyu-ma béti baatɔlɔku, ɔni na kekpo kéƒie-ma na bésela kalɔ bamba lɛlɔ.

³ “Amii bani nébu na Israel kalɔ lɛlɔ binu ami Unwoti lɛdi. Ɔsika ɔ́si limeyi lɛni na báwɔ-mii kani na líse kalɔ mɔɔnu-mii lɛlɔ, na nda-mii mɔɔvínku.

⁴ Na ami ni, kalɛ nse lɛni kani na ndubo buse uwi ɔni na amii bɛ́ɛbi lɛlɔ na eli áƒuala-mii, na ami ndi ukyuli ɔni nda-mii mɔɔnu lɛlɔ. Ami nédie-mii na ami kani ndubo-mii lɛlɔ butaanu na lidie-mii na lɛda-mii kɔkɔɔkɔ.

⁵ “Ukyuli ɔdi ɔɔɔdi-mi ligye na ɔdi lɛnɔ ulakana na weti lɛlɔ wakɔku-mi.

⁶ Bekyuli badi beesié taatáƒɔ ala bakywɛne na kayu kenye, na bete-ma sika ugyiedi ku ɔƒualadi, na betu-nwu babla baƒiɔ bete-ma na bataakpa.

⁷ Baagyú baƒiɔ bammɔ taasia lɛmangba taatáwia-ma kesekɔ, nsu ama alati balákana busie. Na si uwi ɔni na lɛla lɛdi lítulo bekyuli bammɔ ni, na besie batákpali-ma banii baƒiɔ bammɔ bebunku-ma nsu balákpete-ma na bedie kenye kadi na balákana-ma bubunku lɛnɔ.

⁸ “Ɔƒaani ni, mɔɔyɔ́ ka biƒie ɔmɛni bɛkya lili, amii alaekpidi bablane na bɛsɔ bitayiƒala.

⁹ Bɛbla kasusu bɛsiku ala ani nálɛ akwa pii ábavi lɛlɔ. Ami lɛti kani ndi Katɔti! Na ɔbambadi ɔdi ɔsɔ uuubo uuubunku-mi mina kalɛ.

¹⁰ Lɛla biala kalɔ kesekɔ ƒui na lɛ́su líse ala ani ndubo abálɛ asa na aalɛ́ ɔmwi na bɛɛnu. Na ɔɔtina ka lɛ́di mina litemi lɛlɔ.

¹¹ Lɛ́kpaku ukyuli ɔdi lɛ́siku kalɔ na ɔgyu ƒui, na úbo úbabla lɛla lɛni na mɔɔwia ka ɔbla ute-mi. Úkpo bekyuli ɔ́si ɔƒɛ katukɔ aani kalɛ na kasangbii kaatu taayu teeƒie lɛla lɛdi. Na ɔƒaani ni, ndubo mina litemi lɛlɔ bɔdi na lɛbla lɛla lɛni na lɛ́su líse.

¹² Bise atu na binu, bina atu ebo ɔkplu geen, na kalɛ na bɛkana na bilie ƒaa ku atu bɔyɔ bɔ́gyunku-mii.

¹³ Ndubo mbaƒɔ-mii, na uwi ɔsɔ uletu. Ńtagyunku-mii, ɔsu lɛɛɛdubo uwi ɔdi bubile. Ndubo Yerusalem budie na mina lɛnyi likeye na Israel.”