Yesaia 45 - Katɔti Ɔku Kedee

¹ Unwoti ɔ́su nwuna ukyuli ɔƒunadi Kores ɔnini, “Ami nda-a kɔdianu kɔnu kalɛ na libunku-ɔ na adi kadi bekyuli pii lɛlɔ. Na abɔku baga pii alɛku bana lɛga kadikɔ. Badubɔlɛmi lɛma linengudi lɛban kenye bewi-ɔ na balakalɛ ɔdi belenyene.

² Ɔni na ntɔnku-ɔ mɛni ni, ndubo abi ƒui bɔbwɛ na ebo kalɔ. Na ndubɔƒɛ abuala ani na béti bábala abuala kɔyakun kɔlɛmikɔ na lɛma linengudi lɛban ƒui kenye.

³ Ndubuti akɛla ani nkya kabɛkɔ ku kasuudikɔ ƒui lite-ɔ. Na adubɔnu ati ka ami Unwoti Israel Katɔti nákpali-ɔ na ébo-mi kudɔ ku lɛnyi lɛni na lɛ́sia-a.

⁴ Kores, ina ka aaagyi-mi ni, lɛ́kpali-ɔ ku lɛnyi lɛni na lɛ́sia-a na líti ɔbu líte-ɔ geen na mina kadi bekyuli Israelƒuɔ bani na lɛ́ƒuna na badi mina kabla bablane ɔsu.

⁵ Ami lɛti kani ndi Unwoti! Na ɔbambadi ɔdi ɔsɔ uuubo mina kalɛ. Ami nábla-mii na bibo ɔyikun ina ka bɛɛɛgyi-mi.

⁶ Na ɔƒaani ni, ukyuli biala ɔ́si ɔƒɛ katukɔ útédu ɔƒɛ kanukɔ ɔdubɔti ka ami ndi Unwoti ɔmmɔ na baƒiɔ badi beeebo na badi lɛla lɛdi geen mina kalɛ.

⁷ Ami nédie bukeye ku lɛdisa, na ami muute kusɛ kusɛ na ɔgbankpi lɛnɔ ɔɔsiáku ukyuli. Ami Unwoti mɔɔbla ɔmɛni ƒui.

⁸ “Ndubɔya na ala bɔbla siin bɔsi katɔ na liƒlukutu kemmo bubo aani kalɛ na ɔnantu ɔɔna. Na ngba bɔƒɔ ku ala bɔbla siin bɔkwɛ aani livo na bɔƒɔ kalɔ kammɔ lɛlɔ ƒui kalɛ na ami Unwoti lídie-ka nnii use kalɛ.

⁹ “Libui lɛvɔdi lilákyaku nwuna ɔvɔne unyeƒi. Anwuɔsu ni, Israel, eeebo kuƒi kɔdi ka awɔ ku ƒula Udiene bɛkya unyeƒi ɔdi, ɔsika lɛvɔbui kani na adi na ɔvɔne ɔ́vɔ-ɔ kalɛ na ɔɔyɔ́. Na lɛvɔbui liléye nwuna ɔvɔne ɔnini, ‘Bi ɔsu na ávɔ-mi lɛni iye átati-mi bɔvɔ na átabla-mi lɛmɛni ku lɛni ngye?’

¹⁰ Bebi beeebo kuƒi ka beye bana bawɔne banini, ‘Dɛ na bɛ́bla na bɛ́wɔ-bu na bɔdi bekyuli bani na bɔdi?’ ”

¹¹ Unwoti Israel Katɔti Kedee ɔni ndi bana Udiene ɔnini, “Buye na ukyuli ɔdi ɔdubɔkana na use kayi uye-mi lɛla lɛdi ɔ́siku mina kadi bekyuli lɛlɔ iye lɛla lɛni ndubo libalɛ uwi ɔni mebo lɛlɔ?

¹² Ami nédie kayawi na lɛ́bla ukyuli lɛ́kya-ka kemmo. Ami ɔlati néti mina enu na línene kayaa lɛ́ƒala katɔ ku ala ekeyedi ani ƒui nkya kayaa mmɔ.

¹³ Ndubɔya na Kores únwini ɔyikune ɔni mɔɔdi lɛlɔ na ulu siin lɛlɔ. Na ndubɔya na nwuna kasiakɔ ƒui kabla-nwu kpɛtɛ kpɛtɛ. Ami ndi Unwoti Ɔyikune Ƒui! Na Kores na lɛ́ya na ɔdubɔsɔku Yerusalem mina ɔma unengudi bɔtu na ɔya na mina bekyuli bakɛ bɔnwuna na belie ku atu bɔyɔ. Nsu ɔɔɔdi lɛyuƒɔla lɛdi kenye. Lɛla lɛni na ami Unwoti lɛ́su na lɛdi mmɔ.

¹⁴ “Egyipteƒuɔ ku Kusƒuɔ ku Sebaƒuɔ bani nákuku kangya kangya mmɔ akɛla adubunwini amii adi. Na badubunwini bina kabla bablane na bibo-ma kɔgba bɛda bitaavinku na basiaku-mii kama. Badubɔkya lili kalɔ bete-mii na bevele-mii basu banini, ‘Sɔsɔ na ɔdi ka Katɔti ɔsiaku-mii na anwu lɛti lɛnɔ ndi Katɔti ɔmmɔ.’ ”

¹⁵ Awɔ ɔni mɔɔƒɔ́ Israelƒuɔ ngba ni, sɔsɔ na ɔdi ka adi Katɔti ɔni mɔɔbɛla lɛlɔ.

¹⁶ Bekyuli bani ƒui mɔɔvɔ́ baƒiɔ ni, badubo-ma kɔƒa bɔkya na anumi ewi-ma kalɔ.

¹⁷ Nsu Unwoti ɔdubudie Israel na bakɛ ngba uwi ƒui ɔni na kɔƒa kulékpo-ma iye anumi ewi-ma kalɔ kudii.

¹⁸ Unwoti lɛti kani ndi Katɔti! Anwu nédie katɔ ku kalɔ kesii kani na bekyuli bakana bulie, utulo ka udie ketele kalɔ kakwiidi sɔɔn kani kemmo na lɛla lɛdi liiibo. Unwoti lɛti kani ndi Katɔti, na ɔbambadi ɔdi ɔsɔ uuubo.

¹⁹ Unwoti útatɛmi útasiku kasuudikɔ iye ɔsu Yakob kaba kemmo bebi ɔnii bawia-nwu kama ulu kekeeke. Mmomu litemi geen na Unwoti ɔɔsu ɔnini,

²⁰ “Bɛsala-mi kudɔ amii bani nébu na kadi biala bekyuli akɔ na kɔlɔ kɔmmɔ kemmo! Na bɛnu bɛti kalɛ na ɔdi kɔdɔlɔ ka binye bitaabu baƒiɔ iye ala anwidi na bitaakpali-ma bɛnii ama mebunku-mii aani bina Unwoti, nsu balakana-mii bɔƒɔ.

²¹ Bɛta na bɔsa na litemi katɛkɔ, munuu ńtasu-mii ɔ́si kukuuku lɛla lɛni ndubo libalɛ? Ami lɛti kani ndi Katɔti ɔmmɔ! Na ɔdi ɔsɔ uuubunku-mi. Ami kani mɔɔƒɔ́ bekyuli ngba na ami kani mɔɔbla ala ulu siin lɛlɔ.

²² “Bɛlɔ kayawi bekyuli ƒui na bebo-mi kudɔ na bakɛ ngba bɔƒɔ. Ami lɛti kani ndi Katɔti! Na badi baasɔ baaadi lɛla geen lɛdi.

²³ Líse kenye kpakplaa kani na kalavumana kudii, na ukyuli biala ɔdubo lili kalɔ bɔkya bɔbu-mi.

²⁴ Na bana ƒui badubɔtuna ka sɔsɔ na ɔdi ka ami lɛti kani mɔɔbla ala ulu siin lɛlɔ. Na ɔdi biala na úti kɔnyi ɔ́kya-mi ni, kɔƒa kɔdubo-nwu bukpo geen na unwini ubo-mi kudɔ.

²⁵ Ami Unwoti ndubo bɔya na Israelƒuɔ badi lɛlɔ na lɛya na baƒɔ lɛnyi geen.”