Yesaia 44 - Katɔti Ɔku Kedee

¹ “Israelƒuɔ, binu, ami náƒuna-mii aani mina kabla bablane.

² Ami ndi bina Udiene. Na ami návɔ-mii na kaƒɔ kemmo na ami kani ndubo-mii lɛlɔ bɔnu. Liƒu litada-mii, mina kabla bablane baƒunadi na bɛdi na mina kayi kasia-mii lɛlɔ geen.

³ Ndubɔya na ɔnantu ɔna uwi kalɔ kani mɔɔwia ntu na ntukpa bɔlɛ kalɔ kakwiidi kammɔ kemmo. Na ndubuti mina Kɔyu lite bina bawɔ na mina kusɛ kusɛ ɔsiaku bina kaba kemmo bebi.

⁴ Na badubɔlɛ lili aani livo ku ketudɔ egyii ani mɔɔlɛ́ lili gyɛnglɛɛ.

⁵ Na badubɔkun lɛmɛnɛ na ɔdi ɔsu ɔnii, ‘Unwoti ɔdi na ndi.’ Na ɔbambadi ɔsu ka ‘Yakob kaba ubi na ndi.’ Na ɔbambadi unweni ɔsia nwuna kɔnu lɛlɔ ɔnii, ‘Unwoti mbo-mi.’ Na bana ƒui badubɔsu ka Israelƒuɔ na badi na Unwoti mbo-ma na ɔɔɔdi baƒiɔ.

⁶ “Ami ndi Unwoti Ɔyikune Ƒui, udeedi ku ukplodi, Israel Katɔti unwi ɔni kani nkya, na ndi bina Ɔga ɔni náƒɔ-mii ngba.

⁷ Ɔma na ɔnii anwu use aani mina kalɛ? Ukyuli ɔmmɔ ɔlɛ ubo na ubedie lɛlɔ kenye. Ɔda ɔlɛ-mi anumi na ɔsu ala ani ƒui na lɛ́su líse ɔ́si mina kuuku uwi bekyuli lɛlɔ ku ani nsɔ masia ɔmmɔ kama, na ubimi ana ƒui kemmo na bunu.

⁸ Lɛ́ɛsu-mii ɔ́si kukuuku nnii, bɛsɔ bitayia na bitaatɔ kpakpaakpa ku liƒu munu munu na bítenu? Ami lɛti kani ndi Katɔti na ɔdi ɔsɔ ɔɔɔdi katamikukɔ kpakplaa aani lɛtakpɛ bonwu mina kalɛ.”

⁹ Bekyuli bani ƒui mɔɔnwí ala na baavɔ́ ala teete lɛlɔ aani baƒiɔ, baaadi bekyuli badi ama alati, na ala ani na bánwi mmɔ na béti anu básia-nya lɛlɔ lɛnɔ aaadi lɛla lɛdi. Baƒiɔ bakpane ƒui badi banumbwɛne bani naaagyi lɛla lɛdi. Na bana lɛla tati bɔmmɔ ndubo bɔya na anumi ewi-ma kalɔ geen.

¹⁰ Dɛ na baanwí lɛla iye baavɔ́ lɛla teese lɛlɔ anii ataakpa nsu kɔsia kuuubo-nwu kemmo ka ulakana lɛla lɛdi bɔbla ɔsu?

¹¹ Bekyuli bani mɔɔnwí baƒiɔ bamɛni ku bani mɔɔkpá-ma badi bekyuli keeke bani na bana kawɔlɔkɔ kadubɔbla kɔnyana geen. Nnye ngya-ma na litemi katɛkɔ na badubo babasiaku-mi na ulése-ma buɛɛ.

¹² Ala ɔkywɛne ni, ogya liwulu ku lɛbuala lɛni na uuti teebo ala na uuti taakywɛ baƒiɔ bamɛni. Ɔyikun ɔni nkya-nwu kɔnu na uuti teetu lɛbuala bamba na ɔɔkywɛɛ baƒiɔ bammɔ udu ɔni na ɔɔyɔ́. Nsu si kɔka ku utukwɛ use kalɔ ɔɔda-nwu ni, ɔyikun ɔmmɔ ɔɔsá na lɛlɔ lɛɛbla-nwu kpɛtɛ kpɛtɛ.

¹³ Na ligyii ɔnwine ni, ugyii likuku na ɔɔkɔ́ku na ɔta ukyuli ɔni udu na ɔɔwia ɔnwi ɔsia-nwu lɛlɔ. Ɔmmɔ kama na ubeyi ugyii ɔmmɔ na ɔnwi ukyuli udu ɔni na ɔɔwia na beti-nwu batálɛ bana kakpakɔ na ɔƒiɔtɔ.

¹⁴ Na lɛku kemmo egyii kpakplaa lidu kemmo na ɔnwine ɔɔƒuna teeti taanwi ala ammɔ udu. Na uwi pii banwine bammɔ alati baalɛ egyii ammɔ na ɔnantu ɔna ubo-nya asa na abi lɛlɔ na ɔdia bɔnwi.

¹⁵ Egyii ammɔ kakɛ kadi na beeti taakya ogya na eete liwulu iye baanwá adila. Na likuku lɛkladi na ɔnwine uuti taanwi baƒiɔ bani na ɔɔkya lili kalɔ teete ɔnii ɔɔbu.

¹⁶ Kugyii kɔmmɔ kakɛ kadi nkya ogya ɔɔda, na uute ukyuli ɔmmɔ liwulu na lɛlɔ lɛɛbla-nwu gugungu. Na agyabi ammɔ lɛlɔ na úƒi lɛna ɔɔkun na lɛɛyu-nwu emini.

¹⁷ Ɔmɛni ƒui kama ni, na ukyuli ɔmmɔ ɔlɛ akɔnkɔ ute ligyiiku lɛkladi lɛni na ɔ́nwi ɔnii ɔɔbu taasu ɔnini, “Gyumana-mi! Awɔ ndi mina baƒiɔ bayikune.”

¹⁸ Bekyuli bani ƒui mɔɔbu baƒiɔ ni, anumi ábwɛ-ma na balánu na kasusu lɛnɔ kékpi-ma na belenu lɛla lɛdi kalɔ.

¹⁹ Beeebo kasusu kani na bati beye lɛlɔ banini, “Ligyiiku lɛmɛni kakɛ kani na líti lɛ́kya ogya líƒulo adila ku lɛna na kakɛ kakladi na líti lɛ́nwi lɛla lɛni neeebo kalɔ na lɛɛɛdi lɛla lɛdi mɛni. Bi ɔsu na ɔlɛka ntaabu ligyiiku?”

²⁰ Bi ɔsu na ɔlɛka ukyuli ɔdɔlɔ laa lɛni utédu ka unye utaabu lɛla lɛni na bakana bakyula benwini ntɔ na ulanu taati ka ɔkɔ ala bɔbla na adi mmɔ, na ɔmmɔ uláƒɔ-ma ngba ka baaadi baƒiɔ bayikune ɔsu?

²¹ O Israel kadi bekyuli, bitaakali ala amɛni taanu, ɔsika mina kabla bablane na bɛdi, na budie na lídie-mii nnii bitaabla mina kabla. Anwuɔsu lɛɛɛdubo-mii bɔyiƒala kudii.

²² Binwini bibo-mi kudɔ, ɔsika lɛ́ƒɔ-mii ngba na lídie bina ekpidi ƒui bina lɛlɔ aani kalɛ na liƒlukutu lɛɛyii takya kayaa.

²³ Bidie lɛnu ku ebiti, amii bani nkya katɔ ƒui ku bani nkya kalɔ lɛlɔ, ɔsika Unwoti nábla ala amɛni. Na abi ku lɛku kemmo egyii ƒui asalaku-mii na lɛlɔyɔ lɛnu lɛmɛni kemmo. Unwoti údie nwuna kadi bekyuli Israelƒuɔ, na ɔ́tina kalɛ na uukeye na badubo-nwu bɔbu.

²⁴ “Israel, bɛnu bɛti ka ami ndi Unwoti, na mina kudɔ na ngba ƒui bɔɔlɛ́ taasi. “Ami náƒɔ-mii ngba, na ami nédie lɛla biala na lɛkya katɔ úbalɛ kalɔ lɛlɔ ƒui.

²⁵ “Ami muubile ɔkɔ kenye bediene ala bɔsu na mɔɔyá na bekebone baadɔlɔ na banundane lɛlati liinwíni kɔdɔlɔ lɛla lɛni kemmo na kasusu keeebo.

²⁶ Ndubɔya na mina kenye bediene ala ani básu banini, ‘Bekyuli badubo bumomo na baƒɔ Yerusalem ƒui na Unwoti ɔsɔku ɔma ɔmmɔ ɔda ubo-nwu kemmo.’

²⁷ “Ami muudie lɛdi taakya ɛpu ku ntukpa ƒui na bɔɔkwii.

²⁸ Ami násu nnii, ‘Kores ndubɔtɔnku mina bekyuli aani baƒonu ɔdane kalɛ na babla lɛla lɛni mɔɔyɔ́-mi kaƒɔ. Na badubɔsɔku Yerusalem ku kakpakɔ kammɔ batu.’ ”