Yesaia 43 - Katɔti Ɔku Kedee

Israel Kadi Ɔƒɔne

¹ Unwoti ɔnini, “Ami nédie amii Yakob kaba kemmo bebi na lɛ́bla-mii na bɛdi Israel kadi. Bɛda bɔyia bɛya, ɔsika ami nédie-mii. Lɛ́sia-mii lɛnyi lɛni na mɔɔlɔ-mii na ɔƒaani bɛdi mina badi.

² Na si bɛɛvia ketu bonwu kani nágyu dɛ muedi ni, nliku-mii na bilánu-ka. Na si ogya kemmo na bɛkɛ muedi ulakyula-mii. Na ogya unyemi ɔmmɔ lɛnɔ ulekeyi-mii.

³ Ami ndi bina Unwoti Israel Katɔti Kedee ɔni mɔɔƒɔ́-mii ngba. Na kalɛ na amii bɛkɛ bɔnwuna ɔsu ni, lídie Egyipte ku Kus ku Seeba kadi bekyuli ƒui atu.

⁴ Bɛ́ƒɔ-mi kuye geen na mɔɔyɔ́-mii. Anwuɔsu na lídie kɔlɔ bamba ku bana bekyuli atu kalɛ na lɛƒɔ-mii.

⁵ Bitayia, ɔsika nliku-mii. Na ndubɔsala-mii lɛsiku ɔƒɛ katukɔ ku kanukɔ ƒui liboku liku linwi.

⁶ Na ndubɔsu kɔlɔ kɔni na katɔ ku kada kakɛ bekyuli nnini, ‘Bɛnyonu mina bebi bananabi ku belekubi na benwini basi kalɔ ɔgyu ɔgyu mmɔ bebo.

⁷ Ɔsika mina bekyuli na badi, na lídie-ma kalɛ na beti ɔbu bete mina lɛnyi.’

⁸ Bɛsala mina bekyuli bite-mi. Bebo anumi ku atu, nsu belenu na balanu.

⁹ Bɛsala lisu amii kadi ƒui bekyuli. Bina ɔdi biala ulakana kɔnu kayi bubo bɔsu ɔnii lɛla lɛni na bina akɔ ɔdi ɔ́su nébo líte mɛni. Na si ɔdi ɔkya-mii akɔ na wakana bɔsu ɔnii bina ɔdi ɔ́su lɛla lɛdi úse na líbo lɛni sɔsɔ ni, na ubedie kenye na bunu.

¹⁰ Mina bekyuli, amii ndi mina kabla bablane ku litemi lɛmɛni kenye bediene. Na mɔɔwia ka bɛti-mi na biti bina kayi bɛsia-mi lɛlɔ na binu kalɔ ka ami lɛti ndi Katɔti. Ami kani nákya uwi ɔni návi na ami kani ndubo bɔkya uwi ɔni lɛnɔ mebo, ɔsika ɔdi ɔsɔ uuubo mina kalɛ.

¹¹ Ami lɛti kani ndi Unwoti ɔmmɔ, na ami ndubɔƒɔ-mii ngba.

¹² Lɛ́su-mii líse ka ndubudie-mii, na lɛ́di mina linyese lɛlɔ sɔsɔ. Amii ndi mina kenye bediene ka ɔdi ɔ́sɔ útabla ɔmɛni udu kudii. Na bɛti ka ami Unwoti mɔɔtɛmi.

¹³ Ami ndi Katɔti ɔƒɛni ku uwi ɔni mebo lɛnɔ úsela ƒui. Ukyuli ɔdi ulakana-mii buƒie bɔƒɔ mina kudɔ na ɔdi lɛnɔ ulakana bunye bɔda-mi ulu lɛlɔ.

¹⁴ “Ami ndi Unwoti Israel Katɔti Kedee. Na mɔɔwia ka binu kenye kani na muusé-mii. Na amii ɔsu ni, ndubɔtala bekpone badi na Babel kalɔ lɛlɔ na batákpɛ-ma balɛku mmɔ ku keku uwi ɔni na baatɔlɔ.

¹⁵ Ami ndi Unwoti bina Katɔti Kedee ɔni nédie Israel na ndi-nwu ɔga.

¹⁶ “Ami nékulo kuƒi lɛ́va ɛpu bonwu ɔmmɔ kemmo.

¹⁷ Ami kani nédie bekpone badi ulu na báta básia-mii kama na belie bapɔnkɔ lɛlɔ ku kɛɛkɛ kemmo. Nsu ɔƒaani ni, bana ƒui békpi ɔni na bɔsɔ bɔta buuubo ɔdi lɛlɔ. Na bélieku asogya ɔni kabuli mɔɔda na báni-ka bédie-nwu kemmo kɔnakunwi.

¹⁸ Bɛyiƒala uwi ɔni návi, na bɛda kuuku uwi etemila bidie kasusu, na ɔdi ɔsɔ uteti ɔmmɔ utada.

¹⁹ Bɛnu, lɛla lɛwɔdi na muudie keyi ɔƒɛni! Munuu bina anumi alanu ka lɛ́kɔ lɛɛlɛ́? Lídie lilu lɛ́siaku kalɔ kakwiidi kemmo na ntukpa bɔ́lɛ kalɔ kakwiidi kani mɔɔwia ntu geen kemmo.

²⁰ Beƒiebuo ƒui baabu-mi ku bekuku ku beƒukutu na ntu bɔni na líte mina kadi bekyuli baƒunadi ka bani na kalɔ kakwiidi kemmo ɔsu.

²¹ Lɛ́bla-ma na badi mina kadi bekyuli kalɛ na beti ɔbu bete-mi.

²² “Ami Unwoti lɛ́su amii Israelƒuɔ nnii bíitu lɛlɔ geen, nsu ɔɔɔdi ami na bɛɛkpali.

²³ Ɔsika bíteti baƒonu badi bítabakpa bítete-mi. Na bileti bina akpala adi teeboku teebete-mi ɔbu. Ami lɛnɔ ńtenye-mii lɛlɔ nnii biti etela adi biboku-mi aani antabi ku kakpa udu ɔdi lɛnɔ iye bebuo bamba badi. Na ńteye-mii akpala adi muedi iye lɛsu-mii nnii bɛkyula oloƒui iye ugyulo ku ɔnyi ƒɛƒɛɛ ɔdi bite-mi.

²⁴ Bíteboku-mi kutu akyala ƒɛƒɛɛ adi iye bɛƒuna bina bebuo bani na bɛ́du kabunikɔ ƒui biboku-mi. Mmomu ami na binye biikpóku ku bina ekpidi bonwu bonwu pii ani na bɛɛbla.

²⁵ “Nsu na ukyuli ɔni na ndi ɔsu ni, mɔɔƒɔ bina ekpidi teedie-mii lɛlɔ uwi biala. Anwuɔsu ndubo bina ekpidi ani ƒui na bɛ́bla bɛ́ƒiɔ-mi bɔyiƒala.

²⁶ Bibo bibasiaku-mi na litemi katɛkɔ na bidie lɛlɔ kenye ka amii ɔdi ɔ́tɛ na bítaƒiɔ.

²⁷ Bina bati kuuku ku bina batɔnkune ƒui báta bénye-mi lɛlɔ.

²⁸ Ɔmmɔ ɔsu nsɔ ńtete kuƒi ka bina bakpane babla-mi kabla. Mmomu lɛ́ya na bákyula Israel kadi na bákya bina bekyuli kɔƒa.”