Yesaia 42 - Katɔti Ɔku Kedee

Unwoti Kabla Ɔblane

¹ Unwoti ɔnini, “Aanu mina kabla ɔblane ɔni na lɛ́ƒuna, mɔɔyɔ́-nwu geen na nnye-nwu kama kpakplaa lɛnɔ. Líti mina Kɔyu lɛ́kya-nwu lɛlɔ kemmo, na ɔdubuti ala bɔbla ulu lɛlɔ siin buboku kayawi kadi bekyuli ƒui.

² Ulakyaku ukyuli ɔdi unyeƒi iye bɔva. Na ɔdi ulénu-nwu lɛdi na kuyeya ulu lɛlɔ.

³ Ugyii ɔni na ɔ́bu unye ni, ulaƒɛ-nwu uledie. Na ogya ɔni mɔɔyuɛ ni, ulenine-nwu uledie. Mmomu ɔdubɔdi litemi lɛlɔ, na uti ala bɔbla ulu lɛlɔ siin uboku bekyuli akɔ uwi ƒui.

⁴ Ulayila nwuna lɛnunsia, na enu lɛnɔ alaƒɛ-nwu úti útédu uwi ɔni na ɔ́ya na ala bɔbla ulu lɛlɔ siin bɔ́ƒɔ kalɔ ƒui lɛlɔ. Na kadi bamba kɔlɔ bekyuli ƒui báƒɔ nwuna ala ani na ɔɔtina.

⁵ “Ami ndi Unwoti Katɔti ɔni nédie katɔ lɛ́ƒala kayaa. Na ami nédie kalɔ ku ala ani na akya-ka kemmo ƒui. Na bekyuli bani ƒui nli kalɔ lɛlɔ ni, ami muute-ma ngba ku ɔƒɛƒɛɛ ɔni na baanwuna.

⁶ Lɛ́ƒuna-a ka eti ala bɔbla ulu siin lɛlɔ eboku bekyuli akɔ. Na anwuɔsu na nnye-ɔ kudɔ. Lɛ́ƒuna-a na lɛ́tala-a ka enwini bukeye ku mina bunyimi kenye kani na líse ete kayawi kadi bekyuli.

⁷ Na adubɔya na banumbwɛne basɔ bataanu na aya na bekyuli bani na likpidi líbo-ma lɛkpu na bakya kasuudikɔ aani batɔntɛne bakɛ bɔnwuna na balɛ bana ekpidi kemmo.

⁸ “Ami ndi Unwoti na lɛɛɛdubo bunye bɔnu na baƒiɔ iye ukyuli ɔyawine ɔdi ɔta unye ɔnii ami ku-nwu buule mina bukeye ku bumwi bɔni na ɔlɛka bekyuli beti bete-mi.

⁹ Bɛnu! Ala ani ƒui na lɛ́su ka adubo abálɛ ni, álɛ lɛni sɔsɔ kalɛ kani na lɛ́su. Na ɔƒɛni ni, ndubo-mii ala ani nsɔ ndubo abálɛ bɔsu.

¹⁰ “Bɛsu kayawi ƒui na bedie ɔnu ɔwɔdi bete ami Unwoti. Na bɛsu bani ƒui nkɛ ɛpu anumi baaví ku bani nli kalɔ ɔgyu kakaaka ƒui bɛnii basalaku-mii na beti bumwi bete-mi.

¹¹ Bɛsu adua ani bekyuli nli kalɔ kakwiidi lɛlɔ ku bani na abi lɛlɔ ƒui bɛnii batɔ na badi limeyi na bedie lɛnu.

¹² Na bebo kudu kenye kani na ɔ́su úse na kesi kesii.

¹³ Unwoti ɔ́nya kalɔ ɔɔví aani ukpone, na uudie lɛdi ku kɔnyi momoomo uwi ɔni na uubó nwuna bekisine teewi kalɔ.”

¹⁴ Mmɔ na ɔ́su ɔnini, “Nnye mɔɔnu-mii kpoo, na naaakpete-mii uwi gyɔlɔɔ mɛni. Nsu ɔƒɛni amu ni, ndubo bɔva na nteedumo aani uleku ɔni ntɛ kɔwɔ.

¹⁵ Ndubo bɔya na abi ku abinkpo ƒui ayii udu, na livo ku lɛku kemmo egyii ammɔ ƒui akwii. Na lɛya na ntukpa ku abiɔ ƒui akwii.

¹⁶ Na ndubɔtɔnku mina banumbwɛne bɔsiaku ulu ɔni na baaagyi kudii lɛlɔ. Na lɛkpanku-ma lɛsiaku ulu ɔni lɛlɔ na bátasia kudii lɛlɔ. Na ndubɔya na kasuudikɔ kani na bakya kenwini bukeye. Na kesii kani na kese kpukplo kpukplo kabla suɛlɛ suɛlɛ. Na ndubo ala amɛni bɔbla ɔni na lɛɛɛdubo-nya bɔda buse.

¹⁷ Nsu bekyuli bani na baƒiɔ bani na bekyuli bávɔ na basia anu na baalɔ-ma baƒiɔ bayikune ni, badubo bunwini ku kɔƒa.

¹⁸ “Amii batutine binu, na amii banumbwɛne bɛnu!

¹⁹ Ɔma bene ndi banumbwɛne ku batutine bammɔ si ɔɔɔdi amii mina kabla bablane bani na lɛ́ƒuna na bɛdi mina batu?

²⁰ Bɛ́ɛnu mina ala bɔbla, nsu bɛɛdaku-ni, na bina atu ewi, nsu bɛnii bilénu lɛla lɛdi kalɔ.”

²¹ Ka Katɔti use siin na ɔɔbla lɛla biala kaduɛ ɔsu ni, ɔdi-nwu lɛƒɔyɔ ka bekyuli banu kalɛ na nwuna ɔda bubo buukeye na bemwi-nwu.

²² Nsu nwuna bekyuli bamɛni na béƒie bátɔlɔku na bákya-ma lɛtɔ ku libu kemmo na ukyuli ɔdi uuubo na udie-ma. Na béƒie bana akɛla ƒui báƒɔ na bekyuli bammɔ belenu kalɔ ka basɔku-nya bete-ma.

²³ Bi ɔsu na bekyuli bamɛni balatɛya kalɛ beenú litemi?

²⁴ Israelƒuɔ bábla likpidi na béni banii belenu Unwoti litemi iye basiaku nwuna ala bɔtina kama. Ɔmmɔ ɔsu na Unwoti ɔ́ya na béƒie-ma ala ƒui báƒɔ.

²⁵ Úti kɔnyi ɔ́kya-ma, anwuɔsu na ɔ́ni-ma kɔtu na kekpo kénwini ogya na ɔɔda na bana kɔlɔ lɛlɔ. Nsu ɔmɛni ƒui útabla-ma lɛla lɛdi na benu-nwu litemi. Na baaadaku-ni ina dɛ na ogya ɔmmɔ ɔ́ka ɔ́mana-ma na uuƒí-ma muedi.