Yesaia 41 - Katɔti Ɔku Kedee

Israel Kadi Ubunkune

¹ “Amii ntuntɛ kɔlɔ ƒui bɛbla kpoo na mina anumi! Bise kayi na bɛni bide-mi ku bina etemila amii kadi kadi bekyuli ƒui. Na bɛya na bɔsa na litemi katɛkɔ.

² “Ɔma náƒuna lɛlɔ ɔdine ɔmɛni ɔ́siku ɔƒɛ katukɔ ɔnii ubabla-nwu kabla na ulu siin ɔmɛni lɛlɔ? Na ɔma náya na ɔɔdi kadi bekyuli ƒui ku baga baga lɛlɔ na uuboku-ma kalɔ? Na nwuna kewii ku atula eesusu-ma na beenwíni ɔtumu ɔni na ɔƒɛƒɛɛ uubó taavinku?

³ Ɔɔbɔku-ma ku usi ɔni na alati si nwuna lɛgba muedi lɛsɔ liitúku kalɔ. Na lɛla lɛdi lɛnɔ lilatu-nwu na ɔƒɔ ɔlɛ ɔdi.

⁴ Ɔma mɔɔyá na ala amɛni aalɛ́ na ɔɔnu ana bɔlɛ lɛlɔ na kaba kaba bekyuli akɔ ɔ́si kalɔ kesekɔ útédu kawɔlɔkɔ? Ami Unwoti na ɔdi! Ami nli asa na lɛla biala lɛdubuse kalɔ na ndubo bulie na lɛla biala libo kawɔlɔkɔ.”

⁵ Ntuntɛ kɔlɔ bekyuli ƒui útédu kalɔ kammɔ kawɔlɔkɔ bánu lɛla lɛni na lɛ́bla na liƒu líƒie-ma na baatɔ́ kpakpaakpa ɔni na bási badubo.

⁶ Na ɔdi biala uubunku ɔkpanadi na beesé lɛlɔ kayi taasu banini, “Bitaya na ɔmmɔ ukpoku-mii, binye momoomo!”

⁷ Na banwine ku bakywɛne ku baƒiɔ bammɔ kabla bablane bamba bákya lɛlɔ ogya na béte lɛlɔ adaku ka ama ndaku kabla. Na béku baƒiɔ bani na bávɔ mmɔ bálɛ kalɔ kalɛ na balálɛ belébo.

⁸ “Nsu awɔ Israel, Yakob kaba, adi mina kabla ɔblane. Lɛ́ƒuna-mii na bɛdi mina ɔkpana Abraham kaba kemmo bebi.

⁹ Lɛ́kpanku-mii lɛ́siku kalɔ ɔgyu na kana kɔkunɔ ƒui líboku mɛni na lɛ́su-mii nnini, ‘Amii ndi mina kabla bablane baƒunadi na ńteni-mii.’

¹⁰ Bitayia, nliku-mii. Liƒu lɛsɔ litada-mi na bitaatɔ kpakpaakpa. Ami ndi bina Katɔti. Ndubɔya na bɛkɛ ɔyikun, na libunku-mii. Ndubɔtalaku-mii katɔ ku mina ɔyikun ablala ani nse siin.

¹¹ “Ukyuli biala na uukisi-mii na ɔ́ta unye-mii lɛlɔ ka ukpo-mii ni, kɔƒa kɔdubo-nwu bukpo na ɔyii udu.

¹² Na bɛsɔ bilanu bina bekisine badi na kesii kadi, ɔsika badubɔyii udu ƒui na basa na kalɔ kammɔ lɛlɔ.

¹³ Ami ndi bina Unwoti Katɔti ɔni nda-mii kɔnu anwuɔsu bitayia, ɔsika nnye-mii kudɔ ka libunku-mii.

¹⁴ Amii Israel kadi bekyuli, bɛda lɛlɔ bukpoku bɛya ina bekyuli baanu-mii aani liklubi iye biiimomo na bɛɛɛdi lɛla lɛdi. Amii ndi Israel Katɔti kedee ɔni mɔɔgyumana-mii na mɔɔƒɔ́-mii ngba.

¹⁵ Bɛnu! Ndubo-mii bɔbla aani kukɔ kɔni anyi mbo ɔbi kaduɛ na bɛdubɔkɔ bɛvi abi ƒui lɛlɔ bɔbla kpɛtɛ kpɛtɛ aani ɔtumu.

¹⁶ Na bibo-nya bitéwi aani kalɛ na baaƒɛ́ lɛla lɛdi, na ɔƒɛƒɛɛ uti lɛla biala ɔtɔlɔku. Nsu amii ni, lɛlɔ lɛdubo-mii bɔyɔ na bimwi ami bina Unwoti Israel Katɔti kedee.

¹⁷ “Uwi ɔni na bawabane ku bani na bese kpɛtɛ kpɛtɛ beekpi utukwɛ na balakɛ ntu na bani ni, ami Unwoti Israel Katɔti ndubo na mbedie-ma na naaayiƒala-ma kudii.

¹⁸ Ndubɔya na ntukpa bɔlɛ bɔsi abi eli na bɔgba butéyi ɔkwalɛ ɔmmɔ ƒui. Na kalɔ kakwiidi kani na kaládia lɛla lɛdi kadubɔlɛ abiɔ na unwini lɛba muedi.

¹⁹ Na ndubɔya na egyii enengudi ani na ebo ɔkplu lidu lidu aƒɔ ketele kalɔ kakwiidi kammɔ kemmo ƒui aani Sida ku akasia ku abambadi udu.

²⁰ Na bekyuli ƒui badubɔnu ɔmɛni na bati na ɔbla-ma nwaa ka ami Israel Unwoti Katɔti kedee nédie ala amɛni ƒui.”

²¹ Ɔmmɔ kama ni, Unwoti ɔ́sɔ ɔ́su-ma ɔnini, “Ami ndi Unwoti Israel Ɔga! Biti bina litemi biboku na bɔtɛ bɔnu na bidie lɛlɔ kenye.

²² Na bɛlɛku bina baƒiɔ biboku na basu ala ani nálɛ ábavi ɔ́si kukuuku na bunu. Na basu ala ani ndubo abálɛ uwi ɔni mebo lɛnɔ na bɔti-nya buse ku uwi ɔni lɛnɔ na adubo bɔlɛ.

²³ Na bɛsu-bu lɛla lɛni na uwi ɔni mebo mmɔ ɔdanku ɔduboku, na bɔti ka bɛdi baƒiɔ bayikune. Bɛbla akɔla budie taatina bɔdi na bɔnu, likpidi lɛdi o-o, lɛbuni lɛdi o-o ni, na bɔnu bɔyia ku liƒu, na bina ala abla-bu yaa.

²⁴ Nsu amii ku bina ablala ƒui bɛdi lɛƒua na biiibo kɔsia kɔdi. Lɛni kani na ukyuli ɔni maƒuna-mii ɔnii bɛdi-nwu lɛla lɛdi ɔdi ukyuli ɔni muusé lɛlɔ geen.

²⁵ “Líitiku ukyuli ɔni ndubo ubadi-ɔ lɛlɔ lɛ́siku katɔ kakɛ na ɔdubɔsia ɔƒɛ katukɔ uteebo kalɛ na ubeti ɔbu ute mina lɛnyi. Na ɔɔkɔ́ taavi lɛlɔ badine lɛlɔ aani kalɛ na baawɔ́ lɛvɔti na kaawɛ kemmo.

²⁶ Bina akɔ ɔmani násu lɛla lɛmɛni udu úse na bekyuli bati batualaku lɛtɔtɔ na básu lɛnɔ ka lɛla lɛni na ɔ́su lɛdi sɔsɔ? Baƒiɔ badi bátasu ɔmɛni bétese dii. Na ukyuli ɔdi lɛnɔ uuubo na ɔsu ɔnii únu kenye kammɔ udu kudii.

²⁷ Ami náka Yerusalem kadi bekyuli lɛla lɛni mɔɔlɛ́ mɛni bɔsu. Na ami néti litemi buni lɛmmɔ lɛ́kya ɔtu ɔdi kenye.

²⁸ Baƒiɔ bamɛni akɔ ɔdi uuubo na uute kasusu iye udie lɛla lɛdi kenye si líye-nwu lɛla lɛdi.

²⁹ Baaadi lɛla lɛdi na balákana lɛla lɛdi lɛnɔ bɔbla. Mmomu buse na bese aani ɔƒɛƒɛɛ ɔni mɔɔnwuna taavi kani.”