Yesaia 34 - Katɔti Ɔku Kedee

Unwoti Ɔ́tɛku Kadi Bekyuli Ƒui Litemi

¹ Bɛlɛ bibo, amii kadi ƒui bekyuli, na amii bayawine ku kalɔ lɛlɔ ala ediedi ƒui, bɛni bide, na bise atu, na binu kenye kadi!

² Unwoti úti kɔnyi kpakplaa ɔ́kya kadi bekyuli ƒui geen, na ɔ́ɔdu-ma kɔtɔ ka bakyula-ma na bayii udu.

³ Na baaadubo ɔdi bɔva, mmomu bekpine bammɔ badubuwi mmɔ na bebun beteenwenyi, na bana ubugya ɔdubɔƒɔ abi lɛlɔ ƒui.

⁴ Ayabi ƒui adubɔyii akya, na kayaa kemodi kammɔ kakono aani kalɛ na baakono ɔku. Na ɔƒɛ ku kɔbuli kɔdubɔnu aani kalɛ na evete ku egyiibi aanú egyii lɛlɔ ƒui.

⁵ Na si uwi ɔni na Unwoti úti nwuna kewii na ɔ́bla lɛla lɛni na ɔɔyɔ́ ɔ́wɔlɔ ni, ɔdubɔyu uduo Edom kadi bekyuli bani na ɔ́ɔdu kɔtɔ úse ka ɔkyula lɛnɔ lɛlɔ.

⁶ Na Unwoti kewii lɛlɔ ƒui kadubɔƒɔ ubugya ku lɛmwi, na kalɛ na ɔ́tu-ma aani baƒonu ku bese bammɔ útálɛ bana akabi lɛlɔ ɔsu. Ɔsika Unwoti ɔdubo akpala bɔbla na Bosra ɔma unengudi ɔmmɔ kemmo, na ɔdu bekyuli pii geen na Edom.

⁷ Edom bekyuli bese aani ɔmantɛ ku lɛku kemmo bakɔ bagyani bani na bebo ɔkplu geen sɔsɔ, nsu ama lɛnɔ badubo bukpi aani bakladi kani. Na kalɔ kemodi kammɔ kadubɔƒɔ bekyuli ubugya na bana lɛmwi lɛsala ku lɛti lɛmmɔ.

⁸ Unwoti ɔlati ɔ́ɔƒuna uwi ku lɛkwa lɛni na ɔdububo ubedie bekyuli kasi ute Sion.

⁹ Na Edom ntukpa ƒui bɔdubunwini nnɔ tonwu bɔni na beewi ulu lɛlɔ, na kalɔ kammɔ lɛti lɛta linwini kɔnu aƒɛ. Na kalɔ kammɔ kaƒɔ ogya na kataada.

¹⁰ Na ogya ɔmmɔ ɔdubo butaada usien ku ɔƒɛ na ulada uyɔ bɔlɛ uláya uwi ɔdi. Edom kalɔ kammɔ ƒui kadubɔkywi na kɔsa kaladi lɛla lɛdi bɔbla ɔ́si kaba útédu kaba. Na ukyuli ɔdi ɔɔɔdubo bɔkana na usie ulu ɔdi na ɔsia kalɔ kammɔ kemmo ɔlɛ.

¹¹ Bekuku ku basangbii ku lɛku kemmo bebuo bamba badubuti mmɔ babla bana kuliekɔ. Na Katɔti ɔdubɔkɔku kalɔ kammɔ ƒui ɔnu ka bubile kani na ɔdi ka bebile-ka na bayila bekyuli bammɔ ƒui udu.

¹² Na bekyuli badubɔlɔ mmɔ bani lɛga kadikɔ kani na lɛƒua liiibo na kalɔ kammɔ lɛlɔ badine lɛnɔ beeebo kenyekɔ kadi.

¹³ Baga kesii ku kɔgyumanakɔ kɔni na bátu bényene ƒui kɔdubunwini liyu alakpi sɔɔn ɔni na beƒukutu ku bekuku ndubo mmɔ bulie.

¹⁴ Na kalɔ kakwiidi kemmo bebweyi ku bebuoƒuala ndubo butaadi taasa na mmɔ. Na alakpi akɔ bese badubo butaava taalɔ lɛlɔ. Na usien bebweyi lɛnɔ badubɔƒɔ mmɔ ƒui.

¹⁵ Bekuku badubo bana ayu bɔbla na mmɔ, na bava bevuo banyuɛ bana bebi na bana avwi kalɔ. Na basangbii badubo ɔƒɛɛlɛ butaakya na kayaa mmɔ ɔdi biala ku ɔgyani.

¹⁶ Na Unwoti bunweni kedee ɔku kemmo ni, bénweni ka Unwoti ɔ́su ɔnini, “Ami násala bebweyi bamɛni ƒui ɔkɛnku mina Kɔyu ɔyikun lɛlɔ, na bana akɔ ina unwi ɔɔɔdubo bɔyii, na ɔdi lɛnɔ ulayila ɔgyani iye uledi.”

¹⁷ Unwoti ɔlati nálɛ ugyii úse úte bana keliekɔ na mmɔ, na badubo bulie uwi ƒui ɔ́si kaba úsie kaba.