Yesaia 33 - Katɔti Ɔku Kedee

¹ Bɔbuɛ ute awɔ ala ubilene, nsu ɔdi útebile-ɔ lɛla lɛdi kudii! Bɔbuɛ ute awɔ ɔni mɔɔví bekyuli kalɔ, nsu ɔdi útavi-ɔ kalɔ kudii! Si uwi ɔni na áda bekyuli ala bubile áya ni, badububile awɔ adi lɛnɔ. Na si uwi ɔni na áda bekyuli kalɔ bɔvi áya ni, badubɔvi-ɔ kalɔ awɔ lɛnɔ.

² Unwoti, buvele na bɔda-a, tina-bu ƒula lɛƒɔndia! Ƒula lɛlɔ na bɔsia anu. Ya na bɔkɛ ɔyikun ɔtanta biala, na ebo na ebedie-bu si uwi ɔni na búduo ɔgbankpi kemmo.

³ Kadi bekyuli beegyingya si édie lɛdi na átina kalɛ na ébomo.

⁴ Buukpóku bula bekisine aani baalɔlɔ, na buuƒie bana ala ƒui taaƒɔ.

⁵ Awɔ Unwoti eli katɔ na etulo ukyuli biala. Áya na litemi lɛlɔ bɔdi ulu lɛlɔ ku ala bɔbla siin bɔ́ƒɔ Yerusalem.

⁶ Awɔ ndi kowodu kalɔ ɔka ɔni lɛlɔ na bunye ɔmwi. Ɔsika aaƒɔ́-bu ngba uwi biala na eete-bu lɛnunda ku lɛlati. Na lɛla bamba biala lɛ́sɔ lítaƒɔ-bu kuye lítetulo ka butaadi ƒula litemi lɛlɔ.

⁷ Bɛnu! Bukeli na bula bekpone benengudi ƒui bakɛ beekeli na lɛblɔnu ƒui lɛlɔ taakpali banii bebebunku-ma. Na bula batu bani nésie betéwi kenye ntu na beboku keyi buɛɛ bénwini bébo ɔma ku keku.

⁸ Ɔdi ɔsɔ ulakana ulu bɔyu busie kesii kadi anwuɔsu alanu ukyuli ɔdi na ulu ɔdi lɛlɔ. Bébile ala ani na búnyimi búse. Na si ina ɔdi anii ataadi linyese lɛdi lɛlɔ muedi ukyuli ɔdi ɔsɔ ulábu-ɔ.

⁹ Mmo bɔ́kywi bunye na lɛla lɛla liiibo-mu kemmo. Na Lebanon lɛku lɛ́yɛyɛ linye aani ukyuli ɔni na kɔƒa kúƒie. Na Saron Ɔkwalɛ únwini kalɔ kakwiidi. Na Basan ku Karmel aku ƒui éwiile evete.

¹⁰ Nsu Unwoti ɔnini, “Ɔƒɛni na ndubo lɛla lɛdi bɔbla na bekyuli banu na bemwi-mi geen.

¹¹ Bina ablala ƒui ese aani keti kani na amii alati bina ɔƒɛƒɛɛ ɔni na bɛɛnwuna na bɛdubuti bɛkya ablala ammɔ ogya.

¹² Bɛdubo bɔkywi bunwini ntɔ aani liyu alakpi na bákya ogya.

¹³ “Amii bani nde ku bani nási ɔlɔgyu ƒui, bɛlɛ bibo na bibanu lɛla lɛni na lɛ́bla, na bɛnu ɔyikun bonwu ɔni na mbo!”

¹⁴ Liƒu líƒie alaekpidi bablane benengudi bani nkya Sion Kɔbi lɛlɔ na lɛlɔ lɛɛtɔ́-ma kpakpaakpa na béye banini, “Dɛ na bɔdubɔkana kesii kani na ogya ɔni mɔɔkywí teebile ala uwi ƒui na uléni mɛni bulie?”

¹⁵ Nsu bekyuli bani nli ngba siin na baasu litemi geen lɛmmɔ ni, badubo bana lɛyuƒɔla bɔƒɔ ku bani na balayɔ ka baƒɔ egulabi adi na bɔbɛ kemmo iye benye ukyuli ɔdi lɛlɔ na beƒie-nwu lɛla lɛdi baƒɔ ku bani nkisi ka bewi ukyuli ubugya kalɔ na balayɔ lɛsɛ ku udunkpi bamba ƒui lɛnɔ ni,

¹⁶ badubulie bekpone kagyumakɔ kpakplaa kemmo na lɛtakpɛ lili na bakɛ adila badi kaduɛ na bani lɛnɔ kaduɛ.

¹⁷ Amii alati bɛdubɔnu Ɔga ɔni muukeye mmɔ, ku kalɛ na nwuna lɛga kadikɔ kadubo bɔbɛbɛ busie amadɔ ku ɔgyu kakaaka.

¹⁸ Mmɔ na amii alati bɛdubuye bɛnini, “Wɛ na benengu bani muunye-bu lɛlɔ na baayila-bu banii buteete kuyii bonwu bonwu mmɔ bávi?”

¹⁹ Na bɛsɔ bɛɛɛdubo baƒɔ bani mɔɔtalaku lɛlɔ katɔ, bani lɛdi na bilenu na bilatɛmi mmɔ bɔnu na bina akɔ.

²⁰ Bɛkɔliku anumi bɛnu Sion Kɔbi kesii kani na bɔɔdi bula emeyi buni. Bɛdubɔnu kalɛ na Yerusalem unye kalɔ kpi aani kevo kani na bédi kpakplaa na nwuna kɔbuli kpakplaa kɔda ewele na alɛ kalɔ na lɛla lɛdi lilakana-ka bɔgyu.

²¹ Bula Unwoti Ɔyikune ɔni muukeye ɔdubɔsiaku-bu, na ntukpa bɔni nábɛbɛ na bɔ́gyu bɔdubɔka bɔmana-bu, na bekisine lɛkɔlɔ libendi lɛdi lilakana-mu lɛlɔ bɔsia bɔvi.

²² Unwoti ndubɔtɛ bula litemi ute-bu, na ɔdi-bu lɛlɔ. Unwoti ndi bula ɔga ɔni ndubɔda-bu, na lɛla lɛdi lilékpoku-bu.

²³ Nsu ƒula kadi bekyuli ni, bese aani ɔkɔlɔ ubendi ɔni na nwuna lɛta ku adi ƒui adaku bugyingya na bátakɔliku adi ani mɔɔƒɔ́ ɔƒɛƒɛɛ na uutiku ɔkɔlɔ ɔmmɔ. Limeyi lɛdubo ɔni na bina bekyuli bani náƒɛ bewi kalɔ muedi badubɔkɛ kekpo ala ani na beƒie báƒɔ bekisine kudɔ mmɔ adi.

²⁴ Unwoti ɔdubuti bina ekpidi ɔkyiɛ-mii, na ɔdi ulasu ɔnii uuƒi.