Yesaia 26 - Katɔti Ɔku Kedee

Bátu Bumwi Ɔnu

¹ 1Na limeyi lɛmmɔ lɛlɔ ni, badubɔtu kɔgya kɔmɛni na Yuda badubɔtu ɔnu bedie banini, “Ɔƒɛni amu bɔ́kɛ kagyumanakɔ ɔma unengudi kpakplaa. Na Katɔti ɔ́ya na awodu ku awodu akpa ani náka ámana-nwu adi ngba bɔƒɔ.

² Bɛlɛmi ɔban kɔyakun kɔmmɔ, na kadi bani bekyuli nse siin beduo. Ama bani náƒɔ bádi na bada bɔƒɔtaadi bɔmmɔ.

³ Ukyuli ɔni na nwuna anu ku kasusu kasia-a lɛlɔ kpakplaa ni, adubɔda-nwu kɔkɔɔkɔ na uulie na atu bɔyɔ kemmo, ɔsika ƒula lɛlɔ na úkpo kama.

⁴ Ti ƒula anu ƒui sia Unwoti lɛlɔ uwi ƒui, ɔsika anwu ndi kama kekpokɔ lɛtakpɛ lɛni nnye uwi ƒui.

⁵ Na bekyuli bani mɔɔkɔliku lɛlɔ katɔ ni, uuboku-ma kalɔ. Na lɛma linengudi lɛni bekyuli mɔɔnu lɛlɔ katɔ katɔ ni, uutú-ni teegyingya na lɛɛbla kpɛtɛ kpɛtɛ teenwini ɔtumu.

⁶ Lɛgba na badubɔnya mmɔ bavi na bawabane ku bekyuli bani mmomu na baanya taakya ndubɔkɔ-ma lɛlɔ bavi.”

⁷ O Ati ɔni nse kedee, bekyuli bani ablala nse siin ni, bana kasiakɔ biala kaatɛ kalɔ ƒiaa. Na bana kɔvinkɔ ni, aayá na kɔɔbla suɛlɛ suɛlɛ.

⁸ Unwoti, ka aatɛ litemi siin ɔsu ni, bunye bɔɔnu-ɔ ulu, ɔsika bɔɔwia ka buteemwi-ɔ lɛnyi kedee na butaabla-a lɛyɔla uwi ndi uwi.

⁹ Mɔɔwia-a kpakplaa usien umodi, na ɔtanta ni, ƒula kɔka kɔɔda mina kɔyu. Ɔsika si átɛku bayawine litemi ni, kayawi bekyuli baatɛya kalɛ na babla ƒula lɛyɔla.

¹⁰ Si ina bi lɛƒɔndia na ábla belikplune ni, baaadubo bɔti kalɛ na baabla ala siin. Kesii kani na siin bɔbla bɔkya muedi ni, ama likpidi bɔbla lilu lɛlɔ kani na baasia uwi ndi uwi na balánu kalɛ na Unwoti úbomo na uukeye lɛnɔ taati.

¹¹ O Unwoti, áakɔliku ƒula kɔnu ése ka ebo-ma na ani-ma kɔtu, nsu balánu taati. Unwoti, ya na bekyuli bamɛni banu bati kalɛ na anumi égyie-ɔ ka agyumana ƒula kadi bekyuli na kɔƒa kukpo-ma. Na aya na ogya ɔni na áklibi ése ka ɔkyula ƒula bekisine ubakyula-ma.

¹² O Unwoti ya na bulie na atu bɔyɔ kemmo, ɔsika ɔkɛnku ƒula ɔyikun kemmo na bɔ́kana na bɔ́bla ala ani na bɔ́bla.

¹³ O Unwoti bula Katɔti, benwoti bamba báadi-bu lɛlɔ na ƒula kama nsu awɔ ƒula lɛnyi kani na buudie kenye teemwi.

¹⁴ Na bekyuli bani kabla na bɔ́bla ƒui béekpi báyii udu na basɔ baaadubo bɔta bubo mɛni! Awɔ nékpo-ma na áyila-ma udu ƒui na bekyuli báyiƒala-ma.

¹⁵ Nsu abu ni, Unwoti, áya na búmomo búbu na ƒula lɛnyi líkeye. Bula kalɔ lɛmii lísie kama líbu na bula kalɔ kábɛbɛ kébu.

¹⁶ Unwoti, uwi ɔni na lɛbibo lɛ́siaku-bu na bɔ́ɔnɔ na bula lɛtuni kemmo ni, bɔ́wia-a kama ulu.

¹⁷ Búse aani uleku ɔni na ɔtɛ kɔwɔ na uubó adi ka kawɔƒɔ kaadu-nwu. Na lɛni na bɔ́da bɔ́lɛ awɔ Unwoti anumi.

¹⁸ Bɔ́kali bɔnii bula lɛbibo lɛdubɔlɛ-bu kɔsia aani kalɛ na ɔƒɔndane ɔni na ɔtɛ kɔwɔ ɔɔwɔ ubi, nsu únwini lɛƒua. Bútakana na bukpo bɔƒɔ kalɔ na bekisine kudɔ. Na bútakana kayawi kadi bekyuli bammɔ lɛnɔ lɛlɔ bɔdi.

¹⁹ Nsu bani na badi awɔ badi ina ka békpi ni, badubɔsɔ bata ku bana ɔlɔna na belie ngba. O amii bani nkya kaƒiɔtɔ kemmo, bɛta na bidie lɛnu ku lɛlɔyɔ! Ɔsika ɔtanta amii na adi muuwi-mii lɛlɔ. Na kalɔ kammɔ kadubo kana bekpine bammɔ bɔwɔ bɔlɛku mmɔ.

²⁰ Mina bekyuli, bɛgyu lɛgba na bitákalɛ lɛlɔ bɛkya lɛtɔ wetédu ka Unwoti kɔnyi kɔni ala na ɔdubo bina bekisine bɔbla kɔ́vi.

²¹ Ɔsika Unwoti ɔ́si ɔdubo na ubani kayawi bekyuli ƒui kɔtu na bana ekpidi ɔsu. Na kalɔ kammɔ kadubɔsu ubugya ɔni na bekyuli bádu béwi-ka lɛlɔ. Na ɔsɔ ulakana ɔdi bɔbɛla lɛnɔ.