Yesaia 25 - Katɔti Ɔku Kedee

Bemwi Unwoti

¹ O Unwoti, awɔ ndi mina Katɔti, ndubumwi-ɔ na lɛkɔliku ƒula lɛnyi katɔ, ɔsika ádi ƒula etemila lɛlɔ na ábla ala ebendi geen ani ndi ulu ɔni na áta ése ɔ́si kukuuku.

² Na awɔ nábwɛ ɔma unengudi ɔni na bátu awodu bámana mmɔ na ásala-nwu lisu álɛ aani kebu. Ɔma ɔni na kemmo na báƒɔ béyi-nwu mmɔ ni, awɔ nábwɛ-nwu na ɔsɔ ɔɔɔdi ɔma na ɔdi ɔnu ɔti ka ɔ́kya dii. Na basɔ balakana-nwu bɔsɔku bɔtu lɛnɔ kudii.

³ Ɔmmɔ ɔsu kadi kani bekyuli mbo ɔyikun badubuti ɔbu bete-ɔ. Na bani lɛnɔ mɔɔdi bekyuli lɛlɔ na baanya-ma taakya badubo-ɔ lili kalɔ butaakya na ƒula ɔyikun bonwu ɔsu.

⁴ Katamikukɔ kpakplaa na adi ete bawabane ku bani mɔɔyaki ala na baanya-ma taakya. Na adi kabɛkɔ ku ɔyuli ete-ma si kadi kaabi éte bani na ala eekpóku-ma geen. Ɔsika balalane bammɔ kɔnyi kuse aani kalɛ na ɔƒɛƒɛɛ kpakplaa uuƒwimi ala taatáƒiɛni kowodu lɛlɔ.

⁵ Na úlie ku kɔnwinimi kalɔ kakwiidi lɛlɔ liwulu. Na baƒɔ bani ndi Israelƒuɔ bekisine mmɔ ni, aabala-ma bɔkwanyi ku lɛsɛ lɛni na baakya aani kalɛ na liƒlukutu ɔyuli ɔɔyala liwulu biala kenye na babla kpoo.

⁶ Na Sion Kɔbi kɔmɛni lɛlɔ ni, Unwoti Ɔyikune Ƒui ɔdubɔlɔ bekyuli ƒui limeyi buni kadikɔ. Na use adila abuni geen ute-ma ku lɛna ku ntɛ bɔbuni ƒui geen.

⁷ Na kɔbi kɔmɛni lɛlɔ ni, na ala ani béti bákwa bekyuli ƒui lɛlɔ aani ukpine kɔvadi bébo báda-ma lɛlɔ ni, Unwoti ɔdubo-nya bɔmami budie ku aduni ani nda-ma lɛlɔ ƒui.

⁸ Ɔdubɔyila kukpi aani kalɛ na beebweli lɛla lɛdi na kɔsɔ kulakya lɛnɔ kudii. Unwoti Katɔti ɔdubuni imii udie ukyuli biala anumi na kɔƒa kɔni muukpó nwuna bekyuli kɔdubukeli ƒui kede kede na kayawi kemodi kammɔ kemmo, ɔsika Unwoti ɔlati násu ɔmɛni úse.

⁹ Na limeyi lɛmmɔ lɛlɔ na bekyuli ƒui badubɔsu banini, “Sɔsɔ geen ni, bula Unwoti Katɔti ɔmmɔ na ɔdi mɛni. Anwu na bunye bɔɔnu ulu teete ka ubaƒɔ-bu. Bɛɛnu Unwoti ɔmmɔ, bɛya na lɛlɔ litaayɔ-bu na bɔkɛ ebiti geen na kalɛ na úbo ubaƒɔ ɔsu.”

¹⁰ Unwoti ɔlati kɔnu kɔdubɔgyumana kɔbi kɔmɛni. Nsu badubɔnya Moab kadi bekyuli ama bakya aani kalɛ na bebuo baanya keti taakya libi akɔ.

¹¹ Na beteebo enu ka balɛ mmɔ aani kalɛ na ukyuli ɔni muubumo ketu uubó enu. Nsu ina bi na bana enu aata ala lɛlɔ na bebo kɔkwɛ muedi ni, Unwoti ɔdubo-ma bɔyila na bana lɛlɔtina ku ulikplu ala bɔbla ɔsu.

¹² Na ɔdubɔƒɔ bana awodu ani na bátu bámana bana kalɔ na atɛ kalɔ na utu-nya ɔ́bwɛ kpɛtɛ kpɛtɛ unwini ɔtumu.