Yesaia 22 - Katɔti Ɔku Kedee

Básu Kenye Kadi Básiku Yerusalem Lɛlɔ

¹ Unwoti údie lɛla lɛdi ɔ́tina na Ala Bɔnu Kɔwɛ kemmo lɛlɔ. Bi mɔɔlɛ́ku-mii ɔsu na bina ƒui bíkeli bɛ́kɔ lɛtɔ eli na owogyo ɔda lɛni?

² Lɛlɔyɔ kudu kani nda ɔma umodi ɔmmɔ ƒui ku lɛsɛ. Na bani na békpi ni, ɔɔɔdi kuwii kenye na békpi, na ɔɔɔdi kekpokɔ lɛnɔ na bésie.

³ Bina batɔnkune ƒui básala na békeli, nsu béƒie-ma enu ku enu na ɔɔɔdi kuwii kenye, ina ka béesie ɔgyu kakaaka. Na bani ƒui na béƒie bénwini batɔntɛne.

⁴ Ɔmmɔ ɔsu na lɛ́su nnini, “Bɛkpɛ bɛlɛ-mi lɛlɔ na liwulo, na ɔdi utasia-mi kɔnu na mina bekyuli bani náyii udu ɔsu.”

⁵ Unwoti Ɔyikune Ƒui limeyi lɛni na liƒu bonwu lɛdubuƒie bekyuli na bakɛ beteetu lɛgba kalɔ taakɔ taayu ku bɔyia geen na baaagyi lɛla lɛni na baabla ni, ani na bɔɔnu na Ala Bɔnu Kɔwɔ kɔmɛni kemmo. Na badubɔƒɛ awodu bewi kalɔ na bekyuli bataava taakpali abi ka bebebunku-ma.

⁶ Elam kadi bekyuli bálɛku bana atula aƒo keyi, na bani nlie bapɔnkɔ kɛɛkɛ kemmo ku bani nlie bapɔnkɔ lɛlɔ lɛnɔ báda bálɛ. Na Kir kadi bekyuli bédie kayi bɔgyumana abuala keyi.

⁷ Bekpone bani nlie bapɔnkɔ kɛɛkɛ kemmo ku bani nlie bapɔnkɔ lɛlɔ báƒɔ ɔkwalɛ ɔmmɔ ƒui. Na bapɔnkɔ beliene bammɔ benye kagyumana na bina ɔma lɛban kenye.

⁸ Báƒɛ ɔban ɔni na bágyi bákya Yuda kalɔ ƒui mmɔ béwi kalɔ. Na bina anu ásia ekpola ani nse kesii kani na baalɔ Baga Kesii Lɛku mmɔ lɛlɔ.

⁹ Bɛ́nu Yerusalem, Dawid ɔma unengudi ɔmmɔ awodu kalɛ na áƒuaala ábla eƒi eƒi. Ɔmmɔ ɔsu na bɛ́ƒɔ ntu bíwi libiɔ lɛni na kada kakɛ mmɔ kemmo.

¹⁰ Na bɛ́sia lɛtɔ lɛdi anu na bɛ́bwɛ-ni bíwi kalɔ kalɛ na biti atabi ammɔ bɛsɔku bɛtu awodu ani náaƒɛ áwɔlɔ ƒui mmɔ na asɔ enye kpakplaa.

¹¹ Bɛ́bla ntu kaƒɔkɔ aani akpambui bɛ́kya kalɔ kemmo na ɔban awodu ammɔ ntɛ kalɛ na bitaaƒɔ libiɔ lɛkukudi lɛmmɔ ntu teewi, nsu bɛ́yiƒala Katɔti ɔni nábla lɛla lɛmɛni iye anwu ɔni nákya kasusu kammɔ úse ɔ́si kukuuku ƒui.

¹² Uwi ɔmmɔ ni, Unwoti Katɔti Ɔyikune Ƒui ɔ́lɔ-mii ɔnii biwulo keku ku kɔnyana geen, na bikpeyi bina eli na biti adikpi binyimi,

¹³ Nsu bɛɛnu ka lɛlɔ mmomu mɔɔyɔ́-mii, na bɛɛtɔ́ taaƒia taadi limeyi, na bɛɛdú bebuo taakun na bɛɛdi na bɛɛní ntɛ! Na bɛɛsu bɛnini, “Bɛya bɔdi na bɔni, ɔsika kɔnaadi bɔdubo bukpi.”

¹⁴ Nsu Unwoti Ɔyikune Ƒui ɔ́su-mi ku mina atu nwaa ɔnini, “Bɛdubo likpidi lɛmɛni kayu butaaƒɔ laa útédu bina likpimeyi, na lɛɛɛdubo kɔtu bɔni bɔmmɔ budie bina lɛlɔ.”

¹⁵ Unwoti Ɔyikune Ƒui ɔ́tala-mi ɔ́kya Sebna ɔga kesii lɛlɔ ɔnune ɔnii ntéye-nwu ɔnini,

¹⁶ “Sebna, bi na aabla mɛni? Na ɔma néte-ɔ kuƒi ɔsu na aanwí kaƒiɔtɔ ete lɛlɔ, na aakya-ka bɔdia lɛni na katɔ mmɔ na lɛtakpɛ lɛmmɔ kemmo?

¹⁷ “Nu kaduɛ, ɔsika Unwoti ɔdubo ubada-a kpakplaa na uƒuimi-ɔ utáva kalɔ momoomo ina ɔni na aanu lɛlɔ ka ebo ɔyikun mɛni!

¹⁸ Na ɔdubo-ɔ bɔmana bɔkono kunu kunu na ubo-ɔ utáva kalɔ bɛbɛɛbɛ kadi lɛlɔ na eminime esié etékpi na mmɔ. Na bapɔnkɔ kɛɛkɛ buni ɔni kemmo na éteelie ɔsu na áƒɔ lɛnyi ni, nwuna kawɔlɔkɔ kadi mmɔ. Na ɔga ɔni kesii lɛlɔ na átaanu mmɔ anumi ewi kalɔ.

¹⁹ Ndubukpeli-ɔ libo ƒula kabla kablakɔ, na lɛƒɔ ƒula kenyekɔ lɛlɛku-ɔ enu kemmo.

²⁰ “Na limeyi lɛmmɔ ni, ndubɔlɔ mina kabla ɔblane Eliakim ɔni ndi Hilkia ubidi ka ubenye ƒula kenyekɔ.

²¹ Ndubuti ƒula awu gyɔlɔɔ lɛkya-nwu, na liti ƒula kadii lɛbala-nwu kavobi, na liti ƒula lɛlɔ bɔdi ɔyikun ugyii lɛkya-nwu lɛkɔkɔ. Na anwu ndubunwini Yerusalem kadi bekyuli ku Yuda ɔtɔ kemmo bekyuli ƒui ɔti.

²² Na ndubuti ɔtɔ lɛlɛmila ɔyikun likposela lɛsia-nwu lɛmangba, na ɔdubuti-ni ɔlɛmi Dawid lɛga kadikɔ kammɔ ɔtɔ biala. Na si ɔ́lɛmi ni, ukyuli biala ulakana bɔkalɛ. Na si ɔ́kalɛ lɛnɔ ni, ukyuli biala ulakana bɔlɛmi.

²³ Na ndubo-nwu bubo bɔlɛ kalɔ kpakplaa aani liwele. Na use aani lɛgaboku lɛni mbo lɛnyi ku ɔbu ute ɔti kaduli.

²⁴ Na anwu ndubɔya na nwuna ɔtɔ kemmo bekyuli ƒui bekeye ɔ́si bebi útédu bawɔ aani kalɛ na baaklibi kanwakɔ ala ƒui teese sɛɛn, ɔ́si ani na baaƒuƒwɛ útédu ani náƒɔ kuye lɛlɔ.

²⁵ “Ɔƒɛni si limeyi lɛni na lɛ́su líse mmɔ lídu ni, liwele lɛni na líbo lɛ́lɛ kalɔ mmɔ lɛdubo bɔkpa na ala ani nda-nwu lɛlɔ ku kɔbuli mmɔ adubukulo alɛ-nwu lɛlɔ. Unwoti násu.”