Yesaia 2 - Katɔti Ɔku Kedee

Unwoti Kɔbi Lɛlɔ Kɔtɛ

¹ Ala ani ndubo mɛni na Amos ubidi Yesaia ɔ́nu ɔkɛnku Yuda ku Yerusalem lɛlɔ.

² Na uwi ukplodi kemmo ni, kɔbi kɔni lɛlɔ na Katɔti kakpakɔ kenye ndubɔbla kɔbi kɔni náƒɔ kuye kutulo abi ƒui akɔ. Kɔdubɔkuku kɔvia abi ƒui eli, na kadi bekyuli ƒui badubukeli besie mmɔ.

³ Bekyuli badubɔsi kɔlɔ pii lɛlɔ bebo na babasu banini, “Bɛya na bɔkɔ busie Unwoti Katɔti kɔbi lili na Yakob Katɔti kakpakɔ, na ɔtina-bu nwuna lilu na bɔsia-ni lɛlɔ.” Ɔsika Sion mmɔ na badubɔtina-bu ala, na bunu Unwoti litemi bɔsiku Yerusalem.

⁴ Na Unwoti ɔdubɔtɛ litemi na ɔklibi kadi ku kadi unyeƒi ɔni nkya-ma ntɛ. Na bana kuwii ƒui ni, ama alati badubuti-ku bakywɛ anwami bonwu ani muunwíni kalɔ. Na beti bana atula bakywɛ asaaka. Na kadi ku kadi basɔ balata kekpo, na basɔ balatumini bekyuli belete kekpo lɛnɔ.

⁵ Israel kadi bekyuli, bibo na bɔsia Unwoti bukeye kemmo.

Katɔti Ɔ́su Bekyuli Úse Ka Ɔdubɔtɛku-ma Litemi

⁶ Unwoti úni Israel kadi bekyuli, ɔsika bábla unwi ku ɔƒɛ katukɔ kadi bamba bekyuli bani na evo ala bɔbla bɔ́ƒɔ-ma lɛlɔ kemmo, na beebó like aani Ƒilistiƒuɔ kalɛ. Na baakya kadi bamba bekyuli lɛnɔ kɔgbu.

⁷ Na Israelƒuɔ bebo akɛla lidu lidu aani sika ɔƒualadi ku ugyiedi ku bapɔnkɔ ku bana kɛɛkɛ pii.

⁸ Baƒiɔ béyi kalɔ kammɔ lɛlɔ. Na bekyuli bammɔ baakya eli kalɔ taakpa ala ani na béti bana enu bábla béte lɛlɔ.

⁹ Ɔmmɔ ɔsu Unwoti ɔdububoku bekyuli ƒui kalɔ. Na ukyuli biala ɔyila nwuna kenyekɔ. Teti takyiɛ-ma!

¹⁰ Bikeli bitéduo atakpɛ libu. Na bɛbɛla bina lɛlɔ bɛsiku Unwoti ɔni mɔɔda liƒu, na nwuna lɛgadi liikeye kudɔ.

¹¹ Limeyi lɛmmɔ ni, bekyuli bekpidi bani mɔɔnu bekyuli ɔnusɛ bɔdubɔkya lili kalɔ, na lɛlɔ katɔ bɔkɔliku biala bɔdububo kalɔ.

¹² Unwoti ubo nwuna limeyi na lɛsia ulu lɛdubo lite bani mɔɔkun lɛmɛnɛ na baanu lɛlɔ katɔ katɔ. Na ɔdububoku lɛlɔ katɔ bɔkɔli biala kalɔ limeyi lɛmmɔ.

¹³ Na Lebanon egyii kpakplaa enengudi ammɔ ƒui ɔdubukulo-nya uwi kalɔ ku Basan adi kpakplaa ammɔ.

¹⁴ Na ɔdubɔbwɛ abi ku abinkpo ƒui uwi kalɔ.

¹⁵ Na bagyumane kɔgyumanakɔ kpakplaa biala ni, ɔdubɔƒɛ-ku ku awodu ƒui uwi kalɔ.

¹⁶ Na ɔbwɛ beyedine lɛkɔlɔ libendi ƒui ku lɛkɔlɔ libliidi lɛni nnye lɛkɔlɔ kalɛlɛkɔ.

¹⁷ Na bekyuli atuɔkplu ku lɛlɔ katɔ bɔkɔliku ƒui ɔdububoku-mu kalɔ. Na Unwoti lɛnyi kani ndubɔkɔ katɔ limeyi lɛmmɔ.

¹⁸ Na Unwoti ɔdubɔyila baƒiɔ biala udu.

¹⁹ Na uwi ɔni na Katɔti ɔdubɔta unye ɔnii ɔɔkunku kalɔ kammɔ ni, nwuna bekisine badubɔkpɛ na bekeli beduo ubu. Na babɛ na libu kemmo na atakpɛ akɔ, na Unwoti bɔyia ku kalɛ na uukeye ɔsu.

²⁰ Na limeyi lɛmmɔ ni, sika ɔƒualadi ku ugyiedi baƒiɔ bani na bávɔ bése lɛlɔ baakpá ni, badububo-nwu bewi baƒiamu ku bagyina.

²¹ Badubo bukeli butéduo atabi libu bonwu kemmo, na batábɛ atabi yayaaya ammɔ kɔka, na bekeli Unwoti kɔnyi limeyi lɛmmɔ ku nwuna lɛgadi lɛni muukeye na limeyi lɛni na ɔdubɔta unye ɔnii ɔɔkunku kayawi.

²² Bɛsɔ bitasia ukyuli ɔyawine anu ka ɔƒɛƒɛɛ kani na nkya-nwu enwu. Bi kɔsia na ɔdubɔlɛ ute-mii?