Yesaia 18 - Katɔti Ɔku Kedee

Básu Kenye Kadi Básiku Kus Lɛlɔ

¹ Bɔbuɛ beete kɔlɔ kɔni lɛlɔ na baalɔlɔ bani avwi mɔɔbla kɔku mɛni bakya, na Kus kalɔ kemmo ntukpa adɔ,

² ama bani nátala batu na bakɛ ɛpu lɛlɔ badubo, na beli lɛkɔlɔ lɛni bánwi ku ketu kemmo ligyii kemmo. Biti usi momoomo na bisie kalɔ kani bekyuli nákuku na bana ɔlɔgyii use suɛlɛ suɛlɛ na ɔɔdia bɔnu kudɔ. Bekyuli bebo-ma lɛlɔ liƒu úsie ɔgyu ɔ́mana na bana kɔnyi ku kalala kani na baabla bekyuli ɔsu, bekyuli bani na ntukpa búle-ma kalɔ kemmo ƒui bɔ́vi.

³ Amii bayawine ƒui, ku amii bani na bilie kalɔ lɛlɔ mɛni, bɛdubo bɔnu aƒlaga ɔdi si bákɔliku-nwu katɔ na abi lɛlɔ, na binu kakpɛɛ kadi kɔku si bávwi-ka.

⁴ Lɛni na Katɔti ɔ́su-mi ɔnini, “Ndubulie mina keliekɔ ntaanu kpoo, aani kalɛ na ɔƒɛ ɔɔyá na kadi kaabi, iye edula ɔƒɛwi liwulu lɛɛyá na amii aayu.”

⁵ Ɔsika asa na badubɔƒɛ edula ammɔ, kugyii kɔni anwula nénwini ebi na égyie na édu bɔƒɛ mmɔ ni, Katɔti ɔdubuti kewii na udie kɔgba wɛlɛ wɛlɛ kɔmmɔ, na ɔmɛnɛ kɔgba kunengudi kɔmmɔ uwi kalɔ.

⁶ Lɛni na bekpone bammɔ ɔlɔna ɔdubuwi ɔmana ute baasɛ bani muuƒie na abi lɛlɔ ku bakumbuo, na baasɛ bammɔ babaduli-ma kaƒɛndi na bakumbuo bammɔ bɔduli-ma kɔyɔ uwi ƒui.

⁷ Na uwi ɔmmɔ kemmo ni, bekyuli bani nákuku ku ɔlɔna suɛlɛ suɛlɛ mɛni, na bana lɛlɔ libo liƒu úsie ɔgyu ɔ́mana mmɔ, na bana kɔnyi ku kalala kani na baabla bekyuli ɔsu, na ntukpa búle-ma kalɔ kemmo bɔ́vi ƒui, badubuti etela beboku Unwoti Ɔyikune Ƒui. Na etela ammɔ adubuse Sion Kɔbi lɛlɔ kesii kani na baakpá Unwoti Ɔyikune Ƒui.