Yesaia 16 - Katɔti Ɔku Kedee

¹ Moabƒuɔ, biti baƒonu bɛsiku Sela ɔma aani lɛlɔ bɔdi kayu bitéte kalɔ kammɔ lɛlɔ ɔdine na bɛsia kalɔ kakwiidi kammɔ bisie Sion Kɔbi lɛlɔ.

² Moabƒuɔ beleku bese aani baasɛ bani na bábɔku bálɛku ayu kemmo na batɛ Arnon Ketu kaviakɔ mmɔ.

³ “Bɛbla kasusu kabuni kadi bɛsiku-bu lɛlɔ, na bɛlɛ ugyii ka bɛdubɔgyumana-bu bula bekisine ɔsu aani kugyii ɔyuli ɔni nse aani usien si kadi kábi yayaaya, na bɛbɛla abu bani na baabɔku.

⁴ Bɛya na abu Moabƒuɔ bekeline bɔkɛ kakyakɔ na bina kudɔ, na binwini katamikukɔ bite-bu na bula bekisine ɔsu.” Bekyuli bekpidi uwi ɔdubo bɔsa, na bekyuli udu bɔyila bɔwɔ ulu. Na bekyuli bani nkɛ mɔɔbɔku bekyuli bamba na baayila-ma udu uwi ku ɔyikun ɔsa, na bayii udu na kalɔ kammɔ ƒui lɛlɔ.

⁵ Ɔmmɔ kama ni, badubuse lɛga kadikɔ kadi bese, na kadanku bɔyɔ ute bekyuli ƒui. Na ukyuli ɔni mɔɔdi litemi lɛlɔ ulu lɛlɔ ndubo lɛga lɛmmɔ bɔdi. Na ɔ́si Dawid ɔtɔ kemmo. Na anwu mɔɔtɛ litemi na ulu geen ɔmmɔ lɛlɔ. Na ɔɔbabla taasia anu taabla lɛla biala siin.

⁶ Mmɔ na ama básu banini, “Búnu Moab kadi bekyuli lɛlɔtina. Na bɔ́ti kalɛ na beekú lɛlɔ na balábu, ku kalɛ na baakɔliku lɛlɔ katɔ ukpludi.”

⁷ Anwuɔsu bɛya na Moab kadi bekyuli bakɛ beteewulo kɔnyana taavi, na bana lɛlɔ lɛni mɔɔkywí-ma ɔsu. Na badubo buwulo na emini ani bádi ɔsu, na bana ɔma unengudi na Kirhaset.

⁸ Edula mmo bɔni na Hesbon bɔ́yɛyɛ, na adingyii mmo bɔni na Sibma lɛnɔ bɔ́yɛyɛ. Na egyiibi ani lɛbuli nébimi lísie Yaser muedi kalɔ kammɔ lɛlɔ badine bésusu-ku bébile.

⁹ Ɔmmɔ ɔsu na muuwulo ku Yaser, na egyiibi ani náyii udu na Sibma ɔsu. O Hesbon, muuwulo teete awɔ ku Eleale ƒui. Ɔsika bɛsɔ bɛɛɛdubo egyiibi bɔkɛ bude ana udewi na ebiti ada-mii ku lɛlɔyɔ.

¹⁰ Egyiibi mmo bɔmmɔ bɔsɔ buláda kubiti, na elénu ka ɔdi ɔɔtu ɔnu ɔdi iye lɛlɔyɔ kɔvanu kɔdi, na ɔdi uuubo ntɛ kebulokɔ uláka egyiibi adi ntu, ɔsika lɛlɔyɔ ƒui kenye kékulo.

¹¹ Mina kayi keewulo ku Moabƒuɔ kɔnyana aani si ɔbentaa na nda muudie kɔnyana lɛnu, na Kirhaset litemi liikpóku-mii geen.

¹² Moabƒuɔ béetu lɛlɔ bésie bana baƒiɔ kɔdu na bátákpali na abi lɛlɔ, nsu kekeeke.

¹³ Geen ni, ala amɛni udu na Unwoti ɔ́su úse na Moab kadi bekyuli lɛlɔ úbavi kukuuku.

¹⁴ Nsu ɔƒɛni ni, Unwoti ɔnini, “Na akwa atɛ kemmo pɛpɛɛpɛ aani kalɛ na kabla ɔblane ɔɔká nwuna emeyi ani nébu na nwuna ɔtɔlati kudɔ na ɔbla-nwu kabla ni, Moab kalɔ kemodi ku nwuna akɛla ku nwuna bumomo ku lɛnyi lɛni na ɔ́ƒɔ na uukeye mmɔ lɛdubo bɔyii ku udu. Na bana ɛlɛɛ kani mebu na basɔ balákɛ ɔyikun ɔdi lɛnɔ.”