Yesaia 11 - Katɔti Ɔku Kedee

Yese Kugyii Kagba Lɛlɔ Kɔtɛ

¹ Yese kaba kemmo ligyukui lɛdi lɛdubɔta, na nwuna ugyitu ɔdubudie kagba na kanwu ebi.

² Na Katɔti Kɔyu kɔdubɔƒɔ-nwu lɛlɔ kemmo ƒui, kɔyu kɔni ndanku lɛnunda ku ala kalɔ bunu kakwɛ ku ɔyikun ku lɛlati ku Katɔti bɔyia.

³ Nwuna lɛƒɔyɔ ndi ka bekyuli ƒui beti ɔbu ku bɔyia bete Unwoti. Na ɔɔɔdubo anumi bɔnu bɔtɛ litemi, iye unu bekyuli litemi ɔtɛ lɛla lɛdi.

⁴ Mmomu ɔdubɔtɛ litemi siin bute bawabane na ukulo litemi kemmo ulu geen ɔmmɔ lɛlɔ ute kalɔ kamɛni lɛlɔ bawabane. Nwuna kenye litemi na ɔdubuti ɔni bekyuli kɔtu aani lɛbuala na ɔyila-ma udu.

⁵ Na ala bɔbla siin ndi kadii kani ndubɔda-nwu kavobi, na litemi geen lɛlɔ bɔdi ndubɔdi lɛduni lɛni nda-nwu lɛmana.

⁶ Na limeyi lɛmmɔ lɛlɔ ni, kegidi ku koƒonu badubɔtɛ liku linwi, na ebuoƒuala ku ese besie bavi kpɛtɛ kpɛtɛ. Na ɔmantɛ bakɔ bebi ku bebuo bamba bani bebi nétedu tɔ lɛkwa linwi badubusie bavi bagyata ntɛ. Na ɔnamu blii kani ndubɔtɔnku bana ƒui.

⁷ Na ɔmantɛ bakɔ bebi badubɔdi na begidi akɔ, na bebuo inyɔ bammɔ batɛ liku linwi basala, na gyata ɔkun livo aani ɔmantɛ akɔ kalɛ.

⁸ Ubiwɔ ɔni na anyi ntu amu akya-nwu akpu ɔdubɔƒia na balakpi bani mbo ugyulo ukpidi libu kenye, na ɔkya-ma kɔnu libu, nsu lɛla lɛdi lilabla-nwu.

⁹ Ɔdi ɔsɔ ulabla ɔkpanadi kalala, na basɔ baládu lɛlɔ lɛnɔ na mina kɔbi kedee lɛlɔ na Sion mmɔ, ɔsika kayawi bekyuli badubɔƒɔ-mi na bati ami bana Unwoti geen aani kalɛ na ntu bɔɔƒɔ́ ɛpu kemmo tɛtɛɛtɛ.

¹⁰ Na limeyi lɛmmɔ lɛlɔ ni, Yese kugyii ugyiitu ɔdubɔlɛ unye aani ngba bɔƒɔ aƒlaga ute kayawi bekyuli ƒui. Na kadi ƒui bekyuli badubukeli bebo-nwu kudɔ na kesii kani na uli, ɔsika mmɔ kadubɔbla kesii kani muukeye na bekyuli baakɛ́ bɔnwuna.

¹¹ Ɔƒɛni na limeyi lɛni na Unwoti ɔlati úse úse lɛlɔ ni, ɔdubɔsɔ ɔkɔliku aƒlaga katɔ ute-ma na ɔsɔku nwuna kadi nkyuli ɛlɛɛ bani mebu ubasala ɔsiku Asiria ku Egyipte ku Patros ku Elam lɛnɔ.

¹² Ɔdubo bunyene aƒlaga ɔdi ute kadi ƒui bekyuli, na ɔkpanku Israel kadi bekyuli bani na béƒie bésienku kɔlɔ bamba ku Yudaƒuɔ bani na bégyingya bakya ƒui ɔsiku kayawi lɛƒɛnyi ine bɔmmɔ ƒui ubasala.

¹³ Eƒraim ɔsɔ ulékpo kogyulo, na bekisine Yudaƒuɔ bukpoku kenye kadubo buklo. Na Yuda kadi bekyuli lɛnɔ basɔ belékpoku Eƒraim.

¹⁴ Mmomu badubɔsala lɛlɔ na babwɛ bayu Ƒilistiƒuɔ besie ɔƒɛ kanukɔ. Na basi mmɔ betékpoku kadi kani bekyuli nkya bésie ɔƒɛ katukɔ.

¹⁵ Na Unwoti ɔdubɔya na Ɛpugyie kaviakɔ kani nédie utukwalɛ aani lɛba mmɔ kakwii. Na ɔtalaku nwuna kɔnu ɔsia Euƒrate Ketu na utiku ɔƒɛƒɛɛ ɔni mɔɔkula ala na ukpo ɔvi-ka anumi na ule-ka ɔbla ntukpa wɛlɛ wɛlɛ maatɛ na ɔdia bɔvia ku lɛgba.

¹⁶ Na Unwoti ɔdubɔya na ulu bɛbɛɛbɛ ɔdi ɔsia mmɔ ɔvi ute nwuna kadi bekyuli bani na bébu bakya Asiria, aani kalɛ na ɔ́bla úte-ma uwi ɔni na bávi baalɛ́ Egyipte kalɔ lɛlɔ.