Yeremia 5 - Katɔti Ɔku Kedee

Ukyuli Biala Ulásu Litemi Geen Na Ɔsiaku-mi Kama Siin

¹ Unwoti ɔ́su-mi ɔnini, “Sie na atáwia Yerusalem ƒui na anu si bekyuli badi bakya na baasu litemi geen na baawia ka basiaku-mi kama siin. Na si ákana na ákɛ ukyuli ina unwi ni, ndubuti kɔtu bɔni bɔmmɔ lɛkyiɛ ɔma umodi ɔmmɔ.

² Ukyuli biala nése kenye kadi na mina lɛnyi kemmo ni, uládi-ka lɛlɔ.”

³ Mmɔ na lɛ́su nnini, “Geen ni, ngyi ka awɔ Unwoti aawia ka butaasu litemi geen. Na ɔkɔ bɔnyi bɔmmɔ ɔsu na áni ƒula bekyuli kɔtu, nsu ɔmɛni ƒui atu ɔkplu kani na baabla teebu na bébulo ka bani bede-ɔ.”

⁴ Na lɛ́bla kasusu nnini, “Bekyuli keeke bani mɔɔyaki ala na bádɔlɔ badi. Na balanu lɛla lɛni na bana Unwoti Katɔti ɔɔwia taasiku-ma kudɔ bati.

⁵ Ndubusie ntátɛmiku batɔnkune bammɔ, ɔsika ama bagyi lɛla lɛni na Unwoti ɔɔwia ka babla, nsu ama muedi béni na bálɛ ugyii ka belénu Unwoti litemi.

⁶ Bekyuli bammɔ báta bénye Unwoti lɛlɔ na béni-nwu kɔlɛ kɔlɛ na ɔ́ɔvi ntu. Anwuɔsu bekisine badubo bebekpo-ma aani bagyata bani nálɛ bási lɛku kemmo iye beƒukutu bani nási kalɔ kakwiidi kemmo. Bekisine bammɔ badubunye bataasia Yuda lɛma lɛmmɔ anu na ɔdi biala masu ɔnii ɔɔlɛ́ usie kesii kadi ni, na bani-nwu babwɛ aani bebuoƒuala.”

Bekisine Badubo Yuda Kɔtu Bɔni

⁷ Unwoti ɔnini, “Amii Yudaƒuɔ, dɛ na ndubɔkana na liti bina kɔtu bɔni lɛkyie-mii? Líte-mii lɛla biala na bɛɛwia, nsu bíni-mi na bísie bɛɛkpá baƒiɔ. Amii banana bɛ́lɛ bina beleku kama na bísie bɛsiaku bayalɛ.

⁸ Bítavumana ku bebuo, ɔsika lɛlɔ bɔtɛnku bɔmmɔ kani kasusu nkya-mii na biisié bekyuli bamba beleku kudɔ.

⁹ Bi ɔsu na útalɛka lɛni Yuda kadi bekyuli kɔtu?

¹⁰ “Ndubo bana bekisine bɔsu nnini, ‘Bisie mina adingyii kemo kammɔ kemmo na bikulo kɔgba kɔmmɔ ƒui biwi kalɔ mmomu bitadu kugyii kɔmmɔ ɔlati, ɔsika kɔgba kɔmmɔ ndi bekyuli bani naaadi mina badi.

¹¹ Yuda ku Israel bálɛ-mi kama ulu biala lɛlɔ.’

¹² “Bana kenye bediene baanyi ɔkɔ taasu banini, ‘Unwoti ɔɔɔdubo-bu kɔtu bɔni. Na bɔdubo bulie na atu bɔyɔ kemmo na bulayaki adila lɛnɔ.’

¹³ Ɔkɔ ɔmɛni udu na baanyi taatɔlɔ bekyuli na mina lɛnyi kemmo. Anwuɔsu ɔƒaamu badubo bukpi na kekpokɔ iye kɔka kɔdu-ma.

¹⁴ “Yeremia, ami ndi Unwoti Katɔti Ɔyikune Ƒui, na lɛla lɛni geen na mɔɔwia ka asu ni, ndubo-ɔ lɛla lɛmmɔ bɔsu. Ƒula etemila adubo buse aani ogya kalɛ na Yuda ku Israel badubo buse aani ekyweni.

¹⁵ Binu amii Israel kadi bekyuli, lɛ́ɛbla mina kasusu líse. Na bekpone badubo bɔsi kalɔ ɔgyu kakaaka bebo na bebekpo-mii. Na bekyuli bammɔ badi bekyuli bani lɛdi na bilenu na bakya ɔ́si kukuuku.

¹⁶ Bekpone na bana ƒui badi na bana atula adanku kukpi.

¹⁷ Bina edula na kadi bekyuli bamɛni badubo bɔdi na bakun bina bebuo. Na adingyii ebi adi elébu na bina adingyii mmo. Na ina ka bɛɛkali bɛnii bɛ́kɛ kakyakɔ na bina awodu kpakplaa ani na bɛ́tu bɛ́mana bina ɔma ɔmmɔ kama ni, badubo-mii lɛma bubo bɔbwɛ na badu bina bebi.”

Israel Kadi Bekyuli Béni Ka Bakpa Unwoti

¹⁸ Unwoti ɔ́su ɔnini, “Yeremia, bekisine bekpone bammɔ baaadubo ukyuli biala bɔdu na Yuda.

¹⁹ Na bani ndubo bubu bulie ngba badubuye banini, ‘Bi ɔsu na Unwoti, bula Katɔti, ɔ́bla lɛla linengudi lɛni muukpóku-bu mɛni udu?’ Na adubudie-mi kenye asu anini, ‘Ami ndi Unwoti, nsu bíni-mi na bísie bítétiku baƒiɔ bamba bíbo bɛɛkpá na amii alati bina kalɔ. Anwuɔsu badubo-mii buƒie bɔtɔlɔku na biténwini bekyuli bamba kabla bablane na kaƒɔ.’

²⁰ “Amii Yudaƒuɔ bani ɔti kuuku ndi Yakob bibo ɔmɛni kudu bite lɛlɔ na ukyuli biala unu.

²¹ Bi ɔsu na bilenu ala kalɔ si mɔɔtɛmiku-mii, amii badɔlɔdi?

²² Bi ɔsu na útalɛka lɛlɔ litaatɔ-mii na bitaayia-mi ku ɔbu? Ami násia ubili líte ɛpu na ɔ́bala ntu bɔmmɔ. Ntu bɔmmɔ buubó taababwɛ teewi ubili kowodu kɔmmɔ, nsu bulávia teebo kama teetulo kesii kani na lɛ́sia-mu ɔmii.

²³ Amii batuɔkplune bɛ́ta bínye-mi lɛlɔ na bínwini kama bɛ́kya-mi.

²⁴ Bíbulo bɔsu bɛnini, ‘Bɛya na bɔbu Unwoti! Anwu ndi ukyuli ɔni mɔɔyá na ketudi ɔnantu ku kaƒɛndi ɔnantu ɔɔna teete-bu. Na ɔɔyá na edula aadia-bu na bɔƒɛ.’

²⁵ Anwuɔsu na naaakana na mete-mii kusɛ kusɛ.

²⁶ “Ɔgbini ɔɔkywɛɛ kamia teeƒie aasɛ taakya lɛyu kemmo. Nsu bina badi ni, bekyuli na bɛɛkywɛɛ kɔkpagyuɛ na biiƒie-ma teenwini bina kabla bablane.

²⁷ Bibo likyulikpi na bɛɛnyi ɔkɔ na bɛɛnya bekyuli taakya kalɛ na amii binwini balakɛne na bɛɛdi-ma lɛlɔ ku ɔyikun

²⁸ na ala adianku-mii, nsu bíni na bilébunku bekyuli bamba. Na bɛɛbla bawabane lɛla lɛni na bɛɛkali ka lɛ́manku-ma.

²⁹ Ɔlɛka bani-mii kɔtu, anwuɔsu ndubo-mii kasi budie.

³⁰ “Ɔƒɛ ɔɔdá-mi na likyulikpi ala bonwu bonwu ani udu na binye bɛɛbla na kalɔ kammɔ lɛlɔ na eekpóku bekyuli ɔsu.

³¹ Kenye bediene baakɔ́ bana etemila lɛsa na baƒiɔ lɛnyi kemmo. Na mina bakpane baláwia ka babla-mi kabla. Na amii mina kadi bekyuli lɛnɔ bɛɛyɔ́-nwu lɛni! Na ɔgbankpi limeyi ni, ɔma na bɛdubo bukeli bɔtamiku bɛnii ubunku-mii?”