Yeremia 46 - Katɔti Ɔku Kedee

Unwoti Ɔ́tɛmi Ɔ́siku Kadi Bekyuli Ƒui Lɛlɔ

¹ Unwoti ɔɔsu-mi ala ani na lɛsu kadi bamba bekyuli bakladi lɛlɔ bɔsu bɔsu.

Unwoti Ɔ́su Lɛla Lɛdi Ɔ́siku Egyipte Lɛlɔ

² Uwi ɔni na Yehoiakim ɔɔdi lɛga na Yuda lɛkwa linedi kemmo ni, Babilonƒuɔ Ɔga Nebukadnesar ɔ́di Egyipteƒuɔ ɔga ɔni baalɔ Neko lɛlɔ na kekpokɔ na ɔma unengudi ɔni baalɔ Karkemis na mmɔ ude Euƒrate Ketu. Na lɛla lɛni na Unwoti ɔ́su-mi ɔnii nsu nsiku Egyipteƒuɔ bekpone lɛlɔ na bɛdubo bunu mɛni.

³ “Uwi údu ka bɛta kekpo, anwuɔsu bikeyi bina agyumanala,

⁴ na bɛbala bina bapɔnkɔ ekpola, na bisusu bina atula nnɔ. Biti bina kekpo kɔbwa bibi eli na bɛda kekpo adala bamba lɛnɔ ƒui na biténye bina kɔgyumanakɔ.

⁵ Ami ndaku kekpo kammɔ bɔnu kalɛ na kaaví na báadi-mii lɛlɔ kuuku na bíkeli bɛɛtɔlɔ na kama bunwini bɔnu buuubo ina kunwi. Liƒu bonwu lɛ́ka lɛ́mana-mii lɛƒɛnyi ƒui lɛlɔ.

⁶ Bibo lɛlɔ ɔkplu na beekeli usi momoomo, nsu bilakana bukeli bɔtɔlɔ bina bekisine kudɔ. Kekpo kéƒie-mii na Euƒrate Ketu kɔtu.

⁷ “Kadi kamani bekyuli nákɔ badubo mɛni lɛni aani kalɛ na Nil Ketu keeyi taavia nwuna utubili?

⁸ Egyipte na ɔdi mɔɔkɔ́ lɛni aani kalɛ na ketu keeyi ku kɔku momoomo na ɔɔsu ɔnini, ‘Ndubuyi na lɛƒɔ kalɔ lɛlɔ ƒui na lɛbwɛ lɛma linengudi na lɛdu bekyuli bani ƒui nkya-ni kemmo.’

⁹ “Egyipte, awɔ sie anumi na asu ƒula bekpone ku bana lɛkɛɛkɛ lɛni bada ƒui anii bikpo-ma kpakplaa. Na edie lɛdi ete ƒula bekpone akpa ammɔ anii babwɛ balɛ ku Kus bekpone ku Libia badi lɛnɔ bani nda agyumanala ku Lida bekpone bani nda kɔtaminta ku atula ƒui.

¹⁰ Nsu Unwoti Ɔyikune Ƒui ɔdubo lɛlɔ bɔdi na kekpo kamɛni kemmo na udie nwuna bekisine kasi. Nwuna kewii kadubɔkɛ bɔdi na ɔni ubugya umo kaduɛ. Badubɔdu bekyuli bammɔ na kalɔ kammɔ katɔ kakɛ na Euƒrate Ketu kudɔ aani akpala bete Unwoti.

¹¹ “Egyipte, kuvo kɔdi kɔɔɔdubo-ɔ bɔkana bɔbwi, na Gilead nnɔmii bɔni mɔɔyala ɔlɔna buɛɛ mmɔ muedi bɔɔɔdubo-ɔ kebunku kadi bute.

¹² Kadi bekyuli ƒui badubo ƒula keku kani na eewulo bunu. Ɔsika bagyi ka ádi kɔƒa. Ƒula bekpone ƒui bebi kalɔ ɔni na beebuli teebo bana bakpana lɛlɔ.”

Bébo Egyipte Ɔda Kpakplaa Ɔdi

^13-14 Uwi ɔni na Babilonƒuɔ Ɔga Nebukadnesar ɔkɛ ulu ka ubekpo Egyipteƒuɔ ni, Unwoti úbo-mi ɔda kpakplaa ɔdi ɔkɛnku Egyipte ɔma biala lɛlɔ, na bani ɔdi ntulo ƒui ndi Migdol ku Mimƒie ku Taƒanes lɛma lɛlɔ. Na ɔ́su-mi ɔnii nsu-ma ɔnini, “Bɛklibi lɛlɔ na binye kagyumana bite lɛlɔ! Bukpi kani na bekyuli beekpi na bina kalɔ kammɔ lɛlɔ kesii biala na kekpokɔ.

¹⁵ Bina baƒiɔ benengudi bani ndi Apis ni, líibo-ma lɛ́ƒiɛmi kalɔ na lɛ́bɔku-nwu na úkeli ɔ́tɔlɔ.

¹⁶ Na ƒula bekpone ni, bubuli kani na beebuli teebo bana bakpana lɛlɔ na baasu lɛlɔ banini, ‘Ta nye! Amu ntu bukeli na bukele búsie bula kalɔ lɛlɔ amu bekisine badubo-bu bɔdu.’

¹⁷ Sia Egyipteƒuɔ ɔga lɛnyi lɛwɔdi lɛmɛni anini, ‘Kenye Kétulo-nwu na Ulakana Lɛla Lɛla.’

¹⁸ “Egyipte, ami Unwoti Ɔyikune Ƒui ndi Ɔga geen. Na ɔni na nli ngba mɛni bɔdi ni, bekisine bani muukpó-mii badubo-mii lɛlɔ bɔdi na bakuku betulo-mii aani kalɛ na Tabor Kɔbi kɔ́kuku kútulo abi ani náka ámana-nwu ƒui, iye kalɛ na Karmel Kɔbi kunye kangyaa na ɛpu kɔtu.

¹⁹ Badubo-ɔ bɔkpanku bɔtɔlɔku aani ukyuli uƒiedi, anwuɔsu bo ala alɛɛ ani na adubuti ada ulu obo. Ƒula ɔma unengudi Memƒis ɔdubo buwi ukpludi ka ɔ́bwɛ úbie ɔsu.

²⁰ “Egyipte ɔbuni, ukisine ɔdi ɔdubɔsi katɔ kakɛ ubekpo-ɔ aani kalɛ na alɔlɔ ɔɔdu ɔmantɛ akɔ.

²¹ Na baƒɔ bekpone bani na átáƒɔ kayu kenye badubo bunwini na bekeli batɔlɔ. Nsu ama ɔdi lɛnɔ ɔ́sa aani ɔmantɛ bakɔ bebi bani na bányuɛ-ma na bélie lɛmwi na bákpanku-ma béselaku kadukɔ.

²² Bekisine bekpone lisu bonwu lɛdi badubɔgyu batɔ aani baalɔlɔ kalɛ. Na bina bekpone badubo bɔnu ka beeebo kablakɔ kadi na bana bekisine bammɔ kudɔ aani kalɛ na kɔlakpi kɔɔkya lɛku kemmo.

²³ Na si egyii badane ku bana kɔdadi bése kalɔ baaƒɛ egyii ammɔ teewi kalɔ ni, uƒiomu kani na baavwi na baawia kasiakɔ.

²⁴ Kɔƒa kɔdubo bina bekyuli bukpo na bana bekisine bani nási katɔ kakɛ mmɔ beƒie-ma.

²⁵ “Ami ndi Unwoti Ɔyikune Ƒui, Israel Katɔti. Na uwi ɔsɔ uletu asa na ndubɔni Tebes baƒiɔ bani baalɔ Amon ku Egyipte baƒiɔ bamba biala na bakya kɔtu. Na ndubɔni Egyipteƒuɔ baga ku bana bekyuli bammɔ ƒui ku bani ƒui néti bana anu básia Egyipteƒuɔ ɔyikun lɛlɔ kɔtu.

²⁶ Na ndubo-ma bɔnyonu bɔ́kya Ɔga Nebukadnesar ku nwuna bekpone enu kemmo. Nsu muusé kenye lɛnɔ ka limeyi lɛdi ni, Egyipte ɔdubo bekyuli bɔsɔ bɔkɛ na belie mɛni aani kalɛ na bákya kuuku. Ami Unwoti násu.

Unwoti Ɔdubo Israel Bɔkpanku Buboku Ɔma

²⁷ “Limeyi lɛdi ni, ndubo-mii bɔkpanku bɔsiku baƒɔ kɔlɔ kɔni lɛlɔ na bɛkya búboku ɔma. Na amii ku bina bebi ku bawɔ ƒui bilie na atu bɔyɔ kemmo ɔni na bɛsɔ bilayia lɛla lɛdi.

²⁸ Anwuɔsu bɛsɔ bitayia ina bɛ́manku ka bani-mii kɔtɔ na bégyingya-mii bákya baƒɔ kɔlɔ lɛnɔ lɛlɔ ɔƒɛni. Nsu si uwi ɔni na lɛ́yila-ma udu ni, ndubo-mii bɔgyumana. Ami Unwoti násu.”