Yeremia 26 - Katɔti Ɔku KedeeYeremia Úsie Útásu Kenye Kadi Na Katɔti Kakpakɔ 1 Ka bése Yehoiakim lɛga na Yuda uwi klukwii ɔdi kama ni, Unwoti ɔ́su ɔnini, 2 “Yeremia, mbo litemi lɛdi nte ukyuli biala ɔni mɔɔsí Yuda lɛma kemmo teebo taabakpa na mina kakpakɔ. Anwuɔsu sie mina kakpakɔ kaduli kemmo mmɔ na atásu-ma litemi biala na ndubɔsu-ɔ. 3 Ɔƒɛni kalɛ badubunu ɔƒaamu. Na si báda ekpidi bɔbla báya ni, ndubɔvumana mina kasusu na nsɔ lɛɛɛdubo-ma kɔtu bɔni. 4 Su-ma anii ami násu nnini, ‘Bíni bɛnii bilenu-mi litemi na ala ani mɔɔtina-mii ku mina ɔda bubo ƒui bíni na biladi-nya lɛlɔ. 5 Lɛ́sia kama lɛ́tala mina kenye bediene bani mɔɔbla-mi kabla lɛ́kya-mii kɔlɛ kɔlɛ ka babakɔ lɛsa bete-mii, nsu bíni ama lɛnɔ. Na ɔƒaani ni, mɔɔlɛ-mii kpakplaa ka si bítavumana udu na bise kalɔ bitaadi mina etemila lɛlɔ ɔƒaani ni, 6 ndubo kakpakɔ kamɛni bɔbwɛ aani kalɛ na lɛ́bwɛ Siloa ɔma. Mmɔ mina kevo kedee kénye dii. Na Yerusalem ɔdubunwini kesii kani na ukyuli biala ɔdubɔkpali uwida ɔnii ɔdubɔlɛku-ɔ aani Yerusalem.’ ” Yerusalem Kadi Bekyuli Bíkpoku Yeremia 7 Kenye bediene ku bakpane ku bekyuli bani ƒui nkya kakpakɔ mmɔ bénu lɛla lɛni na lɛ́su. 8-9 Anwuɔsu ɔni na lɛ́wɔlɔ butemi kani na bana ƒui báta bébewi-mi lɛlɔ na baava teeye-mi banini, “Bi ɔsu na ákɔ lɛsa ásu anii Unwoti ɔdubo kakpakɔ kamɛni bɔbwɛ aani kalɛ na Siloa? Ɔlɛka badu-ɔ na kenye kani na ásu mɛni ɔsu.” Anwuɔsu báya na béƒie-mi. 10 Ɔga kesii bakutine bénu lɛla lɛni nálɛ na bási ɔga kesii mmɔ bébo kakpakɔ ɔban kayakun kawɔdi kammɔ kenye aani bekyuli bani ndubukulo litemi lɛni na baatɛku-mi na mmɔ kemmo. 11 Uwi ɔni na bekyuli bása na beli beenú ni, bakpane ku kenye bediene bammɔ básu kasalakɔ bekyuli bammɔ banini, “Bina ƒui bínu ka Yeremia ɔ́su úse ka badubɔbwɛ Yerusalem. Na ɔmɛni ɔsu ɔlɛka badu-nwu aani nwuna kɔtu bɔni.” 12-13 Ɔmmɔ ɔsu ni, lɛ́su litemi batɛne bammɔ ku ukyuli biala ɔni na ɔkya mmɔ nnii, “Unwoti ɔlati nátala-mi ɔnii mbasu-mii agyala ani na ɔdubo-mii bɔbla ku Yerusalem ku kakpakɔ kammɔ ƒui. Nsu si bɛ́vumana udu na biinú Unwoti litemi ni, ɔdubɔvumana nwuna kasusu. 14 Amii alati bɛlɛ ugyii lɛla lɛni na bɛdubo-mi bɔbla. Na mɔɔsu-mii nnii bɛbla lɛla lɛni na amii bɛ́nu ka lɛdia-mii. 15 Nsu si bɛ́du-mi ni, bɛti ka bina akɔ ɔdi biala na Yerusalem ɔ́bla likpidi na bɛ́du ukyuli ɔni na útabla lɛla lɛdi. Ɔsika lɛla biala na mɔɔsu ni, Unwoti kudɔ na lɛ́si.” 16 Litemi batɛne ku bekyuli bakladi bammɔ ƒui básu kenye bediene bammɔ banini, “Ka Unwoti bula Katɔti kenye kani na ɔ́su Yeremia kani na anwu lɛnɔ ɔ́sɔku úbasu-bu ni, utalɛka ka bɔbla kasusu bɔnii lɛla lɛni námanku-nwu ndi kukpi.” 17 Amu na benengu bani nási lɛma bamba bébo mmɔ badi bálɛ bébo anumi na básu kasalakɔ bekyuli bammɔ banini, 18 “Kuuku uwi ɔni kemmo na Hesekia útaadi lɛga na Yuda kalɔ lɛlɔ ni, Katɔti kenye udiene ɔdi baalɔ banii Mika ɔ́kya na ɔ́si ɔma ɔnii baalɔ banii Moreset kemmo. Anwu násu ɔnini, ‘Ami Unwoti Katɔti Ɔyikune Ƒui mɔɔsu ka bekisine badubo Yerusalem bɔtu bunwini bubi aani kalɛ na beeti anwami teegulu kalɔ na ɔma ɔmmɔ ubie ɔyii udu. Na liyu alakpi kani ndubo bɔkwɛ bɔƒɔ abi ammɔ lɛlɔ kesii kani na kakpakɔ kammɔ kenye ɔƒɛni.’ ” 19 Amu na benengu bammɔ bésie anumi banini, “Ukyuli ɔdi útadu Mika na lɛla lɛmmɔ bɔsu ɔsu. Mmomu Ɔga Hesekia ɔ́kpali Katɔti ku bɔyia na lɛlɔ lɛnɔ lɛɛtɔ́-nwu na úvele-nwu ɔnii ɔnu-ma kɔnyana. Ɔmmɔ ɔsu Unwoti ɔ́bla kasusu ka ɔsɔ ulayila Yerusalem ɔma ɔmmɔ udu ina ka lɛni na nka ɔ́ɔsu ka wabla. Ɔmmɔ ɔsu ni, Yudaƒuɔ kadi bekyuli, bɔdubuti ɔgbankpi bonwu buboku lɛlɔ si bɔ́du Yeremia.” 20-24 Ka benengu bamɛni báwɔlɔ bɔtɛmi lɛni ni, unengu ɔdi na baabu-nwu geen na baalɔ-nwu banii Ahikam ɔni na ɔdi Saƒan ubidi ɔnanabi lɛnɔ ɔ́tɛmi údie-mi kenye. Anwuɔsu béteti-mi bétete kasalakɔ bekyuli bammɔ na badu-mi. Uwi ɔni kemmo na Yehoiakim ɔmu ɔɔdi lɛga na Yuda kalɔ lɛlɔ ni, Semaia ubidi ɔnanabi ɔni baalɔ banii Uria ɔ́tɔlɔ nwuna ɔma ɔni baalɔ Kiriat-Yearim úbo Yerusalem. Na Uria ɔmɛni ɔdi Katɔti Kenye bediene akɔ unwi. Na lɛla lɛni na mɔɔsu mɛni ni, lɛla linwi pɛ lɛmmɔ kani na anwu lɛnɔ útaasu taasiku Yerusalem ku Yuda lɛlɔ. Na uwi ɔni na Yehoiakim ku nwuna bakutine benengu bénu lɛla lɛni na Uria ɔ́su ni, báyɔ ka beƒie-nwu, nsu úkeli ɔ́tɔlɔ-ma kudɔ úsie Egyipte kalɔ lɛlɔ. Anwuɔsu Yehoiakim ɔ́tala Akbor ubidi ɔnanabi ɔni baalɔ Elnatan ku banana bamba badi ɔnii basia Uria kama. Na ama lɛnɔ bététiku-nwu béboku. Na Ɔga Yehoiakim ɔ́ya na bádu Uria na bébo-nwu bátákya ubu ɔni kemmo na baavá bekpine bamba lɛnɔ ƒui. |
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
Wycliffe Bible Translators, Inc.