Yeremia 25 - Katɔti Ɔku Kedee

Yudaƒuɔ Bábla Bekyuli Bamba Kabla Akwa Liti Ku Aavlanyɔ

^1-2 Na lɛkwa linedi kemmo uwi ɔni na Ɔga Yehoiakim ɔɔdi lɛga na Yuda kalɔ lɛlɔ ni, Ɔga Nebukadnesar lɛnɔ úse kalɔ ɔɔdi lɛga lɛkwa lideedi na Babilon kalɔ lɛlɔ. Na uwi ɔmmɔ kemmo na Unwoti ɔ́su-mi ɔnii nkɔ lɛsa nte Yuda kadi bekyuli ku Yerusalemƒuɔ. Anwuɔsu lɛ́su-ma nnini,

³ “Akwani ndi lɛkwa aavlanyɔ-lɛtɛdi ka líse kalɔ mɔɔsu-mii lɛla lɛni na Unwoti ɔnii nsu-mii ɔ́si Ɔga Yosaia lɛga bɔdi lɛkwa leevu-lɛtɛdi kemmo, nsu bíni na bítenu.

⁴ Unwoti ɔ́tala kenye bediene ɔ́kya-mii kɔlɛ kɔlɛ, nsu bíni na bítenu-nwu litemi.

⁵ Básu-mii ka Unwoti ɔsu ɔnini, ‘Bɛvumana bina ngba uliedu! Na si bɛ́bla lɛni na bɛda likyulikpi ala bɔbla bɛ́ya ni, ndubɔya na bilie kalɔ kani na líti líte bina bati kuuku mɛni lɛlɔ uwi ƒui.

⁶ Naaayɔ nnii mɔɔbla-mii likpidi lɛdi. Anwuɔsu bitakya-mi kɔnyi na bina baƒiɔ ku ala bamba adi bɔkpa ɔsu.’

⁷ “Nsu bíbulo ɔmɛni ƒui na bítenu mina kenye bediene etemila ani na básu-mii. Anwuɔsu ami Unwoti lɛ́su ka bɛ́kya-mi kɔnyi na ɔni na bɛkya bɛɛkpá baƒiɔ ɔsu na amii náƒɔ ɔlɛ na bina ɔbladu ɔsu.

⁸ Bíbulo na bítenu-mi litemi.

⁹ Na ɔƒaani ni, ndubo bɔya na kadi bekyuli bani nási kalɔ kammɔ katɔ kakɛ bebékpo-mii na ɔni ntulo ƒui ndi mina kabla ɔblane Nebukadnesar ɔni ndi Babilonƒuɔ ɔga. Amii ku bina liku bekyuli kɔlɔ lɛlɔ bekyuli ƒui bɛdubo bukpi na bina lɛma ku kɔlɔ ƒui kɔdubɔsɔ kuwi ukpludi na lɛla biala lɛyii udu. Na ɔtɔtɔ bonwu ɔdubɔgyu ukyuli biala manu ɔmɛni, nsu ɔmmɔ ƒui kama bɔma kani na badubo-mii na beteedumi-mii.

¹⁰ Ndubɔya na bina emeyi bɔdi ku beleku bɔwɛɛ ƒui kenye kekulo. Na ɔdi ɔsɔ ɔɔɔdubo ɔlaaƒɔ bɔkɔ na mɛni iye ɔkya mɛni na ɔtu lɛsogya lɛdi usien.

¹¹ Kalɔ kamɛni ƒui kadubɔta kenwini aani kɔnwinimi kalɔ kakwiidi, ɔsika ndubɔya na bina ƒui binwini Babilonƒuɔ Ɔga Nebukadnesar kabla bablane akwa liti ku aavlanyɔ sɔɔn.

¹² “Na si bɛ́kya mmɔ na uwi ɔmmɔ údu ɔ́wɔlɔ ni, ndubɔni Babilonƒuɔ ɔga ku nwuna bekyuli ƒui kɔtu na ala ƒui na badubɔbla na aaakɛnku ulu ɔbuni ɔmmɔ lɛlɔ ɔsu na lɛya na bana kalɔ kammɔ kenwini kalɔ kani nsɔ naaadubo bɔdia lɛla lɛdi bɔbla kudii.

¹³ Mina kabla ɔblane Yeremia ɔ́ɔsu-mii lɛla lɛni na lɛ́su ka mabla Babilonƒuɔ ku kɔlɔ bamba ƒui. Na únweni ala ammɔ ƒui ɔ́kya ɔku ɔmɛni kemmo úse. Liƒu lɛla biala na lɛ́su-ma líse ka mabla-ma ni, ndubo-ni bɔbla.

¹⁴ Likpidi biala na Babilonƒuɔ bábla ni, ndubo-ma lɛla lɛmmɔ kayu bɔƒɔ. Na baga bayikune badubɔsi kɔlɔ pii lɛlɔ bebo babadi Babilonƒuɔ lɛlɔ na benye-ma lɛlɔ na benwini bana kabla bablane.”

Yeremia Ɔ́nu Ɔƒɛɛ Ɔni Na Katɔti Kɔnyi Kúyi Aani Ntɛ

¹⁵ Unwoti Israel Katɔti údie lɛla lɛdi ɔ́tina-mi na kɔyu kemmo na ɔ́su-mi ɔnini, “Yeremia, aanu ɔɔƒɛɛ ɔdi mɛni ɔni kemmo na ntɛ bɔni nnye nte mina kɔnyi kúyi tɛtɛɛtɛ. Ƒɔ na aya na kadi biala bekyuli bani bɔdi.

¹⁶ Badubo bɔdala na bataabla gyegyengye na kekpo kani na ɔɔƒɛɛ ɔmɛni ɔdanku ɔduboku-ma lɛlɔ ɔsu.”

¹⁷ Amu na lɛ́ƒɔ ɔɔƒɛɛ ɔmmɔ lɛ́siku Unwoti kɔnu kemmo na lɛ́tɔlɔ lísie kadi baga bammɔ kudɔ na lɛ́ya na ɔdi biala ɔ́ni bɔdi.

¹⁸ Na líse kalɔ lɛ́si Yerusalem lɛlɔ ku lɛma lɛni na Yuda kalɔ lɛlɔ. Na sɔsɔ békpeli baga bammɔ ku bana lɛku batine ƒui bébo kalɔ ɔ́siku bana kunyekɔ ku agaboku lɛlɔ ku kɔƒa. Na ukyuli biala ɔda-ma lɛnyi ku lɛma na kesi kesii na beeti-ma anyi teewida bekyuli ka bana ɔgbankpi ɔmmɔ udu ɔdubɔlɛku bekyuli bani na beeyuda mmɔ.

¹⁹ Kesii kanyɔdi kani na lísie ndi Egyipte kalɔ lɛlɔ. Na mmɔ ni, lɛ́ya na ukyuli biala ɔ́ni ntɛ ku ɔɔƒɛɛ ɔmmɔ. Baga ku bana bakutine ku aban ɔmmɔ kabla bablane bamba ƒui ku bekyuli bammɔ ƒui báni-mu.

²⁰ Lɛni kani na baƒɔ bani ƒui nkya kalɔ kammɔ kemmo lɛnɔ báni-mu. Ɔmmɔ kama ni, lísie Us ɔma ɔga kudɔ ku Ƒilistiƒuɔ baga ine bani mɔɔdi Askelon ku Gasa ku Ekron ku ɛlɛɛ bani nébu na Asdod lɛlɔ mmɔ lɛnɔ kudɔ.

²¹ Na lísie Edom ku Moab ku Amonƒuɔ baga lɛnɔ kudɔ.

²² Lísie Tiro ku Sidon ku baga kudɔ ku bana kɔlɛkɛ bamba kɔni nkya-ma kalɔ ka baanu-ku lɛlɔ si ávia ɛpu lɛnɔ kudɔ.

^23-24 Ɔmmɔ kama ni, lísie Dedan ku Tema ku Bus adua ani bekyuli nási Arabia kalɔ kakwiidi kemmo baga kudɔ ku

²⁵ Simri ku Elam ku Media.

²⁶ Na lísie kɔlɔ kɔni nde na kɔkya katɔ kakɛ ku ɔgyu ƒui kemmo. Nkɛ lɛ́vi kayawi kɔlɔ kɔmmɔ lɛlɔ ƒui atɔ asia na ntédu Babilon na kɔwɔlɔkɔ.

²⁷ Unwoti ɔ́su-mi ɔnii nsu bekyuli bammɔ nnini, “Unwoti Ɔyikune Ƒui, Israel Katɔti, uubó-mii ɔda ɔnii ɔga biala ɔni ntɛ ku ɔɔƒɛɛ keyile bɔmɛni bɔni nnye nte nwuna kɔnyi mɛni. Na bɔdubo-mii bɔda butédu ka bɛdubɔdala muedi. Na si uwi ɔni na Unwoti ɔ́ya na kekpo kébo-mii lɛlɔ ni, badubɔdi-mii lɛlɔ ƒui kede kede.”

²⁸ Unwoti ɔ́su-mi ɔnii si ukyuli ɔdi úni ɔnii uláni na ɔɔƒɛɛ ɔmmɔ kemmo ni, na lɛsu-nwu nnini, “Ami Unwoti Ɔyikune Ƒui muudie lɛdi teete-ɔ nnii ni ntɛ bɔmmɔ!

²⁹ Ukyuli biala ɔdubo abi bubo na kekpo kani ndubo mmɔ ɔsu na ɔdubuse kalɔ ɔsi mina kadi bekyuli lɛlɔ na Yerusalem. Anwuɔsu lɛɛɛdubo bɔya na ɔdi ɔkɛ kuƒi kɔdi ukeli na lɛbibo lɛmɛni kenye na lɛla lɛdi lilákɛku-nwu.”

³⁰ Unwoti ɔsɔ ɔ́su-mi ɔnii nsu bekyuli bammɔ ɔnini, “Ndubo bɔkwanyi momoomo aani kalɛ na katɔ keedu bɔsiku mina kakpakɔ kedee kemmo uwi ɔni na ndubo-ma butaanya teesusu aani kalɛ na baamana kutu.

³¹ Na bekyuli ƒui badubunu-mi lɛdi na kalɔ kammɔ lɛlɔ kesi kesii ka mɔɔdu-ma kɔtɔ na bana likyulikpi ala bɔbla ɔsu. Na ndubɔdu badi kukpi kɔtɔ muedi ka badu-ma.”

Ɔgbankpi Ɔdubo Bekyuli Lɛlɔ

³² Unwoti Ɔyikune Ƒui ɔ́sɔ ɔ́su ɔnini, “Bɛdubɔnu ka ɔgbankpi ɔmmɔ úse kakɔ uugyingya ɔ́si kalɔ kammɔ lɛlɔ na ɔgyu kakaaka ɔ́si kalɔ úsie kalɔ aani kalɛ na ɔƒɛƒɛɛ kpakplaa ɔdi uukpó.

³³ “Uwi ɔni na ala amɛni adubuse kalɔ ataalɛ ni, ndubo bekyuli pii bɔdu buwi kalɛ aani kalɛ na beebó alakpi teewi kalɔ na kakya kalɔ kammɔ lɛmwi. Na ukyuli ɔdi ɔsɔ ulébu na wava ɔkpanadi iye uwulo-nwu lɛnɔ.”

Unwoti Ɔdubɔni Yudaƒuɔ Batɔnkune Kɔtu

³⁴ Unwoti bekyuli bese bete-nwu aani nwuna baƒonu kalɛ na amii bana batɔnkune nádi nwuna baƒonu bammɔ lɛlɔ banune. Nsu ɔƒaani ni, bina lɛlɔ na údu ka bebeyi-mii badu aani baƒonu bammɔ kalɛ. Na bɛdubo bɔbwɛ bugyingya aani kalɛ na lɛkyami lɛbwɛdi lɛni mɔɔdia bɔnu lɛɛlɛ́ teebo teegyingya kɔkɛ kɔkɛ. Anwuɔsu bɛyu bɛtɛ kalɔ na biteewulo na biteebo teeminime na lɛti akɔ.

³⁵ Biiibo kesii kadi na bɛdubo bukeli busie iye bitábɛ.

³⁶ Teenu kalɛ na baƒonu badane bammɔ baava

³⁷ uwi ɔni na Unwoti kɔnyi kɔ́ya na bekisine beekpó teebile ala na kalɔ kammɔ káta keenwíni kalɔ kakwiidi kani nsɔ naaadubo lɛla lɛdi bɔdia bɔbla.

³⁸ Unwoti úni nwuna bekyuli na báda bana kɔduli béwi aani kalɛ na gyata ɔɔlɛ́ nwuna lɛtabi ubu taatɔlɔ na ɔda ubu ɔmmɔ uwi.