Yeremia 19 - Katɔti Ɔku Kedee

Yeremia Ku Libui Lɛvɔdi Lɛlɔ Litemi

¹ Unwoti ɔnini, “Yeremia, sie ebui ɔvɔne ala kavɔkɔ na etéye libui lɛdi. Na akpanku ɔma ɔmmɔ bakutine ku bakpane benengu ada.

² Na bisie Hinom Kɔwɛ kemmo na kesii kani baalɔ banii kavɔ abwɛdi ɔban kenye na asu bekyuli bammɔ anii ami nnini,

³ ‘Ami ndi Unwoti Ɔyikune Ƒui, Israel Katɔti, na mɔɔyá na amii Yudaƒuɔ baga ku Yerusalem bekyuli ƒui bɛti ka ɔlɛka bise atu na binu lɛla lɛni mɔɔsu-mii na ɔdia-mii utulo. Ɔsika ndubo bɔya na ɔgbankpi bonwu lidu lidu libo libalɛ na kɔwɛ kɔmɛni kemmo ɔni na ukyuli biala menu kɔku kɔmmɔ ɔdubo bɔyia geen.

^4-5 Yuda kadi bekyuli béni na basɔ balakpa-mi na béti kɔwɛ kɔmɛni kemmo bénwini Baal baƒiɔ ku baƒiɔ lidu bamba bani nétebunku ama ku bana bati kuuku iye bana baga badi kudii kakpakɔ. Na bádu bekyuli na mɛni na baakyula bana bebi bani naaagyi lɛla lɛdi na bátabla lɛla lɛdi lɛnɔ teeti taakpa baƒiɔ bammɔ. Na ami ńtakali kudii nnii mɔɔsu-mii na bɛbla lɛla lɛmɛni udu bite-mi.

⁶ Anwuɔsu binye kagyumana! Limeyi lɛdi lɛdubo ɔni na basɔ baaadubo mɛni bɔlɔ banii Toƒet iye Hinom Kɔwɛ. Mmomu badubɔlɔ mɛni banii Bekyuli Kadukɔ Kɔwɛ!

⁷ “ ‘Amii Yuda ku Yerusalemƒuɔ bɛdubɔbla kasusu bɛsiku ala enengudi lɛlɔ, nsu mɛni na ndubo kɔsusu kɔmmɔ ƒui kemmo bubile na lɛya na bina bekisine badu-mii na baasɛ baduli-mii ɔlɔna bebweli ƒui kede kede.

⁸ Ndubɔya na ɔma unengudi ɔmmɔ únwini aani kebu alakpi ku lɛmala na ɔbla bekyuli bammɔ kalɛ kadi na ukyuli biala ɔni násia mmɔ ɔɔví ɔpii-mii na udumi-mii lɛnɔ na bina ɔgbankpi ɔsu.

⁹ Na uwi ɔni kani na bina bekisine badubɔbwɛ beduo-mii lɛlɔ na beteekpoku-mii mmɔ lɛlɔ kani na bina adila adubo bɔsa ƒui. Na kɔka kɔdubo-mii bɔda ɔni na bɛdubo bina bakpana ku bebi muedi ɔlɔna bɔkun aani lɛna.’

¹⁰ “Na si uwi ɔni na ásu ɔmɛni ni, Yeremia, na ebo libui lɛmmɔ abwɛ na bekyuli bammɔ anumi mmɔ kani.

¹¹ Na asu-ma ka lɛ́su lɛnɔ nnini, ‘Ami ndi Unwoti Ɔyikune Ƒui na mɔɔsu-mii kpakplaa ka ndubo Yuda ku Yerusalem kadi ku kalɔ kammɔ bɔbwɛ aani kalɛ na libui lɛmɛni lɛ́bwɛ na bɔsa bɔsɔ buuubo-ni lɛlɔ. Na Toƒet mɛni na bɛdubo bina bekpine bɔva. Na bina akɔ pii bɛdubo bukpi ɔni na kalɔ kasɔ kaaadubo bɔkya na bava bina ƒui.

^12-13 Ndubo bɔya na Yerusalem uteese lɛlɔ aani Toƒet kalɛ na uwi ɔni na bekpine badubɔƒɔ ɔma ɔmmɔ kemmo ƒui ɔsu. Na lɛla lɛni ɔsu na ndubo ɔmɛni bɔbla ndi ka bɛ́kɔ bísie bina lɛtɔ eli na lɛsa na bítákyula oloƒui bíte ayabi ani nƒa kayaa aani baƒiɔ kalɛ na bíti ntɛ bɛ́bla akpala bíte kadi bamba baƒiɔ.’ ”

Yeremia Únye Kakpakɔ Kaduli Kemmo Na Ɔ́tɛmi

¹⁴ Ɔmmɔ kama ni, lɛ́gyu lísie Toƒet kesii kani na ńtásu bekyuli bammɔ lɛla lɛni na Unwoti ɔ́su. Na lɛ́vi lísie kakpakɔ kaduli kemmo na ńtákɔ lɛsa líte bekyuli bammɔ nnini,

¹⁵ “Bina ɔdi biala use kɔtu na unu! Uwi ɔdi návi kemmo ni, Unwoti Ɔyikune Ƒui, Israel Katɔti, ɔ́su-mii kpakplaa ka ɔdubɔya na ɔgbankpi ubo Yerusalem lɛlɔ ku lɛma lɛni na amadɔ mmɔ ƒui. Nsu bɛbla atuɔkplu na bíbulo-nwu litemi bunu. Na ɔƒaani ni, Unwoti ɔdubo bɔya na ɔgbankpi ɔmmɔ ɔlɛ aani kalɛ na úse kenye úse.”