Yeremia 18 - Katɔti Ɔku Kedee

Yeremia Úsie Kesii Kani Na Baavɔ́ Ala

¹ Unwoti ɔ́su-mi ɔnini,

² “Sie kesii kani na baavɔ́ ala. Na si édu mmɔ ni, ndubɔsu-ɔ lɛla lɛni na adubɔsu bekyuli bammɔ.”

³ Amu na lísie mmɔ na ńtánu ka ala ɔvɔne ɔdi ka unye ɔɔvɔ́ ebui na nwuna kavɔ kalɛkɛ lɛlɔ.

⁴ Na uwi biala na ɔ́nu ka kavɔ kammɔ kalátɛ-nwu kalɛ na ɔɔwia ni, na ɔvumana kɔnu na ute libui lɛmmɔ udu bamba.

⁵ Ɔmmɔ kama ni, Unwoti ɔ́su-mi ɔnii nsu-ma nnini,

⁶ “Amii Israel kadi bekyuli, ami Unwoti mbo ɔyikun na bina lɛlɔ aani kalɛ na ala ɔvɔne ɔmɛni ubo ɔyikun na nwuna lɛvɔti lɛlɔ.

⁷ Si lɛ́kya-mii ngba liƒu ka ndubɔyila kadi bekyuli bani na bebo likyulikpi udu badi

⁸ na kadi kammɔ bekyuli bávumana bana udu na baabla lɛbuni ni, ndubɔvumana mina kasusu na kɔtu kɔni na nnii mɔɔní-ma lɛlɔ.

⁹ “Si líse kenye ka mabla kadi bekyuli badi na bakɛ ɔyikun

¹⁰ nsu bekyuli bammɔ bése kalɔ baabla atu ɔkplu ku likyulikpi ala na belenu-mi litemi ni, ndubɔvumana mina kasusu na nsɔ lɛɛɛdubo-ma bubunku munu munu.

¹¹ Anwuɔsu na mɔɔsu amii Yudaƒuɔ ku Yerusalemƒuɔ nnii binu-mi lɛdi! Lɛ́ɛbla kasusu ka lɛya na ɔgbankpi ɔdi ɔsiaku-mii momoomo na nsɔ lɛɛɛdubo mina kasusu bunwini amu ntu bínwini bina kasusu na bíse kalɔ bɛɛbla ala abuni.

¹² “Nsu ngyi ka bɛɛɛdubo ɔmɛni bunu na bɛvumana. Na bɛdubɔkana na bɛsu muedi bɛnini, ‘Ala ani na aasu ƒui ni, lɛdi lɛɛɛkɛ-bu. Bɔ́ɔbla bula kasusu ka butaabla atu ɔkplu ammɔ na lɛla lɛni na bɔɔyɔ́ na bɔdubo bɔbla.’

¹³ “Anwuɔsu na ami Unwoti lídie-mii lɛdi nnii biye kadi bekyuli bammɔ ƒui binu si badi báabla likpidi bonwu lɛni udu na bɛ́bla mɛni na bínu dii.

¹⁴ Ɔnantu kɔtakɛ ƒuala ƒuala kɔni mɔɔna teewi Lebanon abi lɛlɔ ni, alanyi taasa. Na ntukpa wɛlɛ wɛlɛ bɔni na bɔkya amadɔ mmɔ lɛnɔ ni, ntu bulákwii-nya kemmo kudii.

¹⁵ Nsu amii mina bekyuli bínwini kama bɛ́kya-mi na bísie bɛɛkyula oloƒui teete baƒiɔ bani neeebo kɔsia kɔdi. Na bɛ́da ulu kuuku ɔni lɛlɔ na bɛkɛ bɛ́va na bítéti ulu ɔwɔdi ɔni na bɛɛɛgyi na bɛkɛ biitulo baƒiɔ lidu lidu.

¹⁶ Bina kalɔ kemodi ƒui kadubo udu bɔyii na belusiene bani mɔɔsia mmɔ badubɔnu na liƒu lɛda-ma na bataapii-mii ku edumi.

¹⁷ Si bina bekisine báta beekpó-mii ni, ndubo-mii bugyingya bɔkya aani ɔtumu ɔni na ɔƒɛƒɛɛ ɔni nási ɔƒɛ katukɔ uubó taavinku. Na ɔgbankpi limeyi lɛmmɔ lɛlɔ ni, ndubunwini kama lɛkya-mii.”

Bása Lili Likpidi Na Yeremia Lɛlɔ

¹⁸ Bekyuli bammɔ badi básu banini, “Bɛya na bɔyila Yeremia udu! Na bakpane badubɔkya-bu kudɔ uwi ndi uwi na batina-bu Unwoti ɔda bubo. Na bɔdubɔkɛ banundane na balɛ-bu. Na bɔkɛ kenye bediene bani ndubɔsu-bu Unwoti kenye kani na ubo ute-bu. Anwuɔsu si ɔni na bɔsɔ buteenu Yeremia etemila bɔsu ɔsu ni, bɛya na bɔda-nwu kenye ka ɔ́bla likpidi bonwu lɛdi.”

Yeremia Ɔ́kpali Katɔti Úvele Nwuna Bekisine Lili

¹⁹ Unwoti, buvele nda-a nu-mi bɔkpali na aya na mina bekisine bada-mi kɔtɔ bɔdu baya banii lɛ́bla likpidi lɛdi.

²⁰ Lɛ́sia ulu biala lɛlɔ ka libunku-ma, nsu kayu kani na ama baaƒɔ-mi ndi ka bakɛ beekú-mi kalɔ ka lɛnu liduo bana kakpagyuɛ ubu ɔni na béku báva-mi kemmo. Na lívele-ɔ muedi nnii tani-ma kɔtu.

²¹ Nsu ɔƒaani anwu útulo-mi na muuvele-ɔ nnii ya na kɔka kɔdu bana bebi na bekpi iye badu-ma na kekpokɔ. Na aya na banana bekpi na bana beleku kudɔ na ɔlɛ ɔdu bana bebi na babla-ma kalala na bekpi.

²² Unwoti bekyuli bamɛni bédie libu bákya mina kavikɔ na bákywɛ-mi kɔkpagyuɛ. Ya na liƒu ala alɛku-ma na beteebo kɔnu kenye uwi ɔni na adubuti bana bekisine emene-ma na betékpo-ma na bana kɔduli kemmo ƒui.

²³ Agyi ka bábla kasusu ka badu-mi. Anwuɔsu ti kɔnyi kya-ma na ani-ma kɔtu! Na teti bɔƒiɔ bonwu bɔmɛni takyiɛ-ma kudii.