Yeremia 13 - Katɔti Ɔku Kedee

Yeremia Ɔ́kya Lɛwuku Kpɛtɛ Kpɛtɛ Lɛdi

¹ Unwoti ɔ́su-mi ɔnini, “Sie na etéye lɛwuku kpɛtɛ kpɛtɛ lɛdi na akya-ni uwi klukwii ɔdi, nsu taƒɔ-ni.”

² Anwuɔsu lísie ntéye lɛwuku lɛmmɔ lɛ́kya kalɛ na ɔ́su-mi.

³ Nwuna kama ni, Unwoti ɔ́su-mi ɔnini,

⁴ “Die lɛwuku lɛmmɔ na esie Euƒrate Ketu na eti-ni atábɛla mmɔ na atakpɛ bonwu kɔka kɔdi kemmo.”

⁵ Na ami lɛnɔ lísie ńtábla lɛni kani.

⁶ Ka uwi klukwii ɔdi úbavi ni, Unwoti ɔ́sɔ ɔ́su-mi ɔnini, “Sɔ nwini sie na etéti lɛwuku lɛmmɔ.”

⁷ Línwini lísie na ńtéku lɛwuku lɛmmɔ lídie kesii kani na líti-ni lɛ́kya mmɔ. Nsu kɔdi kɔmmɔ kɔ́tɔ na lɛwuku lɛmmɔ líkulo.

⁸ Amu na Unwoti ɔ́su-mi ɔnini,

⁹ “Yeremia, ndubo Babilonƒuɔ butiku na bayila Yuda ku Yerusalemƒuɔ lɛlɔ katɔ bɔtalaku.

¹⁰ Yuda kadi bekyuli badi bekyuli bekpidi na bebo atuɔkplu na belenu litemi. Na baabla lɛla biala na ama baayɔ́ na baakpá baƒiɔ na mina litemi bunu kenye. Na si uwi ɔni na lɛ́wɔlɔ lɛla lɛni na nnii mɔɔblaku-ma ni, basɔ baaadubo lɛla lɛdi bɔdia bɔbla, ɔsika lɛni na badubo buse aani kalɛ na lɛwuku lɛmmɔ lise na aanu.

¹¹ Uwi ɔni na átaakya lɛwuku lɛmɛni ni, líƒie-ɔ na lɛ́da-a kavobi kaduɛ. Lɛni kani na lɛ́da Israel ku Yuda lɛga kɔdikɔ kɔmmɔ. Lɛ́da-ma lɛ́kya kpakplaa na lɛ́yɔ ka lɛbla-ma mina kadi bekyuli na baƒɔ lɛnyi kalɛ na kadi bekyuli bamba bataabu-mi na bemwi-mi lɛnyi, nsu béni banii belénu-mi litemi.”

Bɛdubuyile Bina Nte Ebui Ku Ntɛ Bɔbuni

¹² Unwoti ɔ́su-mi ɔnini, “Yeremia, su Yudaƒuɔ anini, ‘Unwoti, Israel Katɔti, údie lɛdi úte-mii ɔnii biyile bina ntɛ ebui ku ntɛ.’ Na ama badubudie kenye banini, ‘Buuyile bula ntɛ ebui ku ntɛ! Na bi ɔsu na awɔ nsɔ mɔɔsu-bu lɛla lɛni na bɔgyi buse na bɔɔbla?’

¹³ Si básu lɛni ni, na edie kenye anini, ‘Ami ndi Unwoti na lɛla lɛni na ndubo bɔbla lɛdubo bɔya na ukyuli biala na Yuda ku Yerusalem babla aani ntɛ na báni bémo. Na bani ɔdi ndubo butulo ndi baga bani nási Dawid ɔtɔ kemmo ku bakpane ku kenye bediene.

¹⁴ Na ndubo-ma buti bubonku lɛlɔ aani ebui ammɔ kalɛ. Na lɛɛɛdubo bakloƒu ku begblebi ku benengu bammɔ ƒui kɔnyana bɔnu, mmomu ndubo bana ƒui udu bɔyila. Ami Unwoti násu.’ ”

Badubo Yuda Kadi Bekyuli Buti Bɔtɔlɔku

¹⁵ Amii Yudaƒuɔ, bitatalaku lɛlɔ katɔ lɛni bitetuloku ka binu lɛla lɛni na Unwoti ɔ́su.

¹⁶ Binye bɛɛsia bukeye anu, nsu lɛdisa na Unwoti úti uumene-mii. Bɛɛnu ka ɔyuli kɔyu kɔ́ɔƒɔ abi ammɔ lɛlɔ suu ɔdubo. Anwuɔsu binwini bibo Katɔti kudɔ na bidie bina alaekpidi kalɔ bite-nwu asa na bigyiile bibuli.

¹⁷ Na si bɛ́talaku lɛlɔ katɔ na bítenu-nwu litemi ni, ami lɛti ndubo buwulo uwi ɔni na badubuti Katɔti bekyuli batɔlɔku aani bekyuli batɔntɛne.

¹⁸ Unwoti ɔnii nsu-mii ka ɔga ɔmmɔ ku uni ƒui badubɔta bana kuliekɔ na bebimi bana kɔgabwa.

¹⁹ Báaka bámana lɛma linengudi lɛni nkya kalɔ kakwiidi kemmo na kada kakɛ. Na ukyuli ɔdi ulakana na weduo iye ɔdi ɔkana bɔlɛ lɛnɔ. Na badubuti ukyuli biala na Yuda batɔlɔku.

²⁰ Yerusalem, awɔ nátaatalaku lɛlɔ katɔ ka aadi Yudaƒuɔ lɛlɔ ɔsu. Nsu wɛ na bakya ɔƒɛni? Nwini nu katɔ kakɛ na adubɔnu ƒula bekisine ka badubo.

²¹ Ama bana lɛlɔ na éti anu ási dii ka badubo-ɔ bubunku. Nsu ɔƒaani ndubɔya na badi-ɔ lɛlɔ. Bi ndi-ɔ kasusu na ɔmmɔ lɛlɔ? Adubo lɛbibo kemmo bɔkya aani uleku ɔni ntɛ kɔwɔ na uunú ɔlɛ.

²² Agyi lɛla lɛni ɔsu na ƒula adala ábwɛ-ɔ lɛlɔ na bekyuli beedumi-ɔ? Ɔkɛnku ƒula ekpidi bonwu bonwu ani na aabla ɔsu.

²³ Aakali ka adubɔvumana na ataabla lɛla lɛni na lɛdia ɔƒaamu?

²⁴ “Ndubo-mii bubo bugyingya aani kalɛ na ɔƒɛƒɛɛ ɔni muukpó na kalɔ kakwiidi lɛlɔ uubo aƒaaƒa teedie kamu ebi kemmo si baaƒɛ́-nya.

²⁵ Ami Unwoti násu lɛni na lɛɛɛdubo mina kasusu bɔvumana. Ɔsika bíni-mi na bísie bɛɛkpá baƒiɔ bani naaasu litemi geen.

²⁶ Búlie aani ɔgya ku ule, nsu bɛ́lɛ-mi kama na bítasiaku-mi kama siin. Na bínwini bayalɛ muedi na uwi ɔni na bɛkɛ abi eli ku mmo ƒui bɛɛkpá baƒiɔ bani muusé lɛlɔ mmɔ ɔsu.

²⁷ Anwuɔsu ndubo bina adala bɔni budie-mii lɛlɔ na bɛsɔ bɛkɛ kasɔngya ku kɔƒa kɔƒa na ukyuli biala utaanu-mii. Amii ɔdi ɔ́sa na bɛ́yii udu! Bɛɛƒɔ́ taadi ka bɛdubɔsɔ bɛbla bekyuli bani mamanku ka bɛsɔ bɛkpali-mi?”