Yeremia 12 - Katɔti Ɔku Kedee

Yeremia Ɔ́su Unwoti Ala Ani Muukpóku-nwu

¹ Unwoti, uwi biala na lɛ́su-ɔ ala ani muukpóku-mi ni, eenú na aabla lɛla biala na ulu siin lɛlɔ. Nsu ɔƒaani ni, mbo ala adi na liye-ɔ ɔ́siku kalɛ na aatɛ etemila lɛlɔ. Bi ɔsu na mɔɔnu aani ka ngba buse buɛɛ bute alaekpidi bablane? Na bi ɔsu na bana ala ƒui aatɛ teete-ma?

² Eenyene-ma kunyekɔ kɔbuni aani egyii ani na álɛ na aalɛ́ lili kaduɛ taanwu ebi. Na si ina beemwi-ɔ lɛnɔ ni, aanu taati ka ɔɔɔdi ku bana kaƒɔ nwaa na baabla ɔmmɔ.

³ Nsu ni, Unwoti agyi kalɛ na nsiaku-ɔ kama na ńtalɛ-ɔ kama kudii iye mina kasusu muedi katimi ƒula lɛlɔ. Anwuɔsu ni, bekisine bamɛni lɛku na ebeyi-ma adu aani baƒonu kalɛ.

⁴ Uwi ɛlɛ na adubɔya na kalɔ kamɛni kayaku ntu na kakwii lɛni ketédu? Na uwi ɛlɛ na livo lɛdubɔyɛyɛ linye bebuo kadikɔ lɛni utédu? Bebuo ku baasɛ bammɔ ƒui békpi na ɔdi ɔsɔ uuubo. Na bekyuli bamɛni alaekpidi ani na baabla ɔsu na ala amɛni ƒui aalɛ́ lɛni. Nsu bamu benye baakun lɛmɛnɛ taasu banini, “Katɔti ulánu alaekpidi ani na bɔɔbla.”

Unwoti Údie Yeremia Litemi Kenye

⁵ Unwoti ɔnini, “Yeremia, si anii eekeli ada bekyuli na lɛlɔ líitu-ɔ lɛni ni, dɛ na aakali ka adubɔkana bukeli bɔda bapɔnkɔ? Na si kalɔ ntɛ nwaa mɛni na adaku bubuli ni, bi ndubo bɔlɛ na lɛku kemmo na Yordan Ketu kɔtu?

⁶ Awɔ ɔlati ƒula lɛlɔ bekyuli muedi báta bénye-ɔ lɛlɔ. Baabla ala anumi kemmo aani bɔyɔ na bada-a, nsu tanyonu lɛlɔ tete-ma lo. Ulu na baawia kalɛ na bakɛ-ɔ aani kalɛ kani na bekyuli bamba benye baawia kuƒi kɔmmɔ.

Unwoti Úti Kɔnyi Kpakplaa Ɔ́kya Nwuna Bekyuli

⁷ “Lɛ́yɔ mina bekyuli na lɛ́ƒuna-ma línwini mina badi geen. Nsu ɔƒɛni ni, ndubo-ma buni na liti-ma lɛkya bana bekisine enu kemmo.

⁸ Mina bekyuli báta bénye-mi lɛlɔ na baakwanyiku-mi aani bagyata, anwuɔsu na muukisi-ma.

⁹ Mina bekyuli bese aani aasɛ ɔni na basangbii básala beebó na lɛƒɛnyi ƒui lɛlɔ. Bɛsu beƒiebuo bammɔ na bebo na babakun na badi bemo.

¹⁰ “Mina kalɔ kabuni kammɔ kébie aani kalɛ na baƒonu badane baakpanku bana bebuo na besusu kemo kadi ku kana edula ƒui na asɔ alanu lɛdila lɛdi.

¹¹ Na kadubɔƒɔ lɛlɔ katɛ ukpludi na mina anumi, na kasɔ kaladia lɛla lɛdi bɔbla ɔsika ukyuli ɔdi ɔɔɔdaku-ka lɛda.

¹² Bekpone bani muubile ala badanku lɛlɔ badubo na kalɔ kakwiidi ulu lɛlɔ na beekpó kesi kesii. Na ama ndi mina kewii kekpidi kani nda muukpó na ɔdi biala uuubo bɔnwuna iye ɔkɛ bɔƒɔ bɔdi na bana enu kemmo.

¹³ Mina bekyuli, kamu na bɛ́kya, nsu ka líti kɔnyi lɛ́kya-mii ɔsu ni, livo kani na lɛya na lɛ́kwɛ. Anwuɔsu bíbo abi ekpludi na bítakɛ ku lɛla!”

Unwoti Ɔdubɔnu Kadi Bamba Bekyuli Kɔnyana

¹⁴ Unwoti ɔnini, “Mina bekyuli Israelƒuɔ na líti kalɔ kamɛni líte. Nsu bekisine bani náka bámana-ka bekpo na béyu-ka ƒui. Ɔmmɔ ɔsu ndubo-ma bɔgyu budie bana kɔlɔ lɛlɔ aani kalɛ na ndubo Yuda bɔgyu budie nwuna kalɔ lɛlɔ.

¹⁵ Nsu kama ƒui ni, ndubo kɔlɔ kɔmɛni bekyuli kɔnyana bɔnu na lɛsɔku-ma liboku bana kɔlɔ lɛlɔ.

¹⁶ Ama nátina mina bekyuli kalɛ na baakpá Baal baƒiɔ uwi ɔdi návi kemmo. Nsu si bánu-mi báti ka ami lɛti kani ndi Katɔti geen ɔmmɔ na bátuna na mina bekyuli bátina-ma kalɛ na bakpa-mi ni, ndubɔƒɔ ama lɛnɔ na babla mina bekyuli.

¹⁷ Mmomu si bétenu-mi litemi ni, ndubo-ma bɔgyu budie bana kalɔ lɛlɔ na lɛyila-ma udu ƒui kede kede.”