Timoteo 2 1 - Katɔti Ɔku Kedee

¹ Ami Paulo ɔni nkɛnku Katɔti lɛƒɔyɔ lɛlɔ na ndi Yesu Kristo ɔtalane ni, ami muunweni-ɔ ɔku ɔmɛni taasiku ngba bɔni na bɔdubɔkɛ na Blɔti Yesu Kristo lɛlɔ na abu ku-nwu unwi bɔbla kemmo.

² Mina ubi ɔyɔne Timoteo, muuvele Katɔti ku Blɔti Yesu Kristo lɛƒɔndia nnii lɛsiaku-ɔ na lɛnu-ɔ kɔnyana na lite-ɔ keyi buɛɛ.

Nye Kpakplaa Na Bɔƒɔtaadi Kemmo

³ Mɔɔgyá Katɔti ɔni na mɔɔkpá enu aani kalɛ kani na mina bati kuuku bátaabla. Na mɔɔbla lɛni na kayi kani naaadu-mi kɔtɔ kemmo. Lɛnɔ ni, mɔɔgyá-nwu enu usien ku ɔƒɛ na muuvele na ƒula lili si mɔɔkpali katɔ.

⁴ Na mɔɔkali taanu ƒula keku kani na éwulo na mɔɔwia geen ka lɛnu-ɔ kalɛ na ebiti ada-mi.

⁵ Mɔɔkali taanu ƒula bɔƒɔtaadi kpakplaa bɔni na ebo. Bɔƒɔtaadi bɔmmɔ nákya ƒ'inieku Lois ku ƒ'ini Eunike alati kemmo. Lɛ́ƒɔ lɛ́di ka awɔ lɛnɔ ebo-mu.

⁶ Kasusu kamɛni geen ɔsu na muunyimene-ɔ kalɛ na ada litela lɛni na Katɔti úte-ɔ kpakplaa uwi ɔni na líti mina enu lɛ́sia-a lɛlɔ na lɛ́kpali katɔ.

⁷ Ɔsika Katɔti úteti kɔyu kɔni náya na liƒu litaada-bu útete-bu. Mmomu ni, úte-bu Kɔyu kɔni mɔɔyá na bɔɔkɛ́ ɔyikun, na bɔɔyɔ́ lɛlɔ, na bɔɔkana na bɔɔtí lɛlɔ bɔda lɛnɔ.

⁸ Ɔmɛni ɔsu ni, taya na kɔƒa kukpo-ɔ ka enye Blɔti litemi kama, iye kɔƒa kukpo-ɔ na mina lɛlɔ aani ɔtɔntɛne kalɛ na Kristo ɔsu. Mmomu ni, awɔ lɛnɔ nye lɛbibo lɛmmɔ kenye kpakplaa na eteedie Blɔti litemi buni lɛmmɔ keyi. Ɔsika Katɔti úte-ɔ ɔyikun kalɛ na akana na abla ɔmɛni.

⁹ Blɔti ɔmmɔ náƒɔ-bu ngba na ɔ́lɔ-bu ɔnii bunwini nwuna bekyuli. Ɔɔɔdi bula lɛbuni lɛni na bɔ́bla ɔsu. Mmomu ni, Katɔti ɔmmɔ ɔlati kasusu ku lɛƒɔndia lɛni na ubo ute-bu ɔsu. Na ɔkɛ Yesu Kristo lɛlɔ na bɔ́kɛ Katɔti lɛƒɔndia lɛmɛni asa na údie kayawi.

¹⁰ Nsu ɔƒɛni na Katɔti údie ɔmɛni ɔ́tina-bu nwaa na Ɔƒɔne Yesu Kristo ɔmɛni bubo kemmo. Anwu nádi kukpi ɔyikun lɛlɔ. Na ɔkɛ nwuna litemi buni lɛlɔ ni, údie ngba bɔni nsɔ naaadubo bɔsa kudii keyi.

¹¹ Katɔti úti-mi ɔ́bla lɛsa ɔkɔne ku ɔtalane ku nwuna litemi buni lɛmɛni ala ɔtinane.

¹² Na ɔkɛ ɔmɛni lɛlɔ ɔsu muubó abi na kɔƒa kulekpo-mi. Ɔsika lɛ́ƒɔ lɛ́di geen, na ngyi ukyuli ɔni lɛlɔ na mina anu asia. Na ngyi lɛnɔ ka ɔdubɔgyumana-mi na lɛda lɛla lɛni na úti ɔ́kya-mii enu kemmo kaduɛ wetédu limeyi lɛkladi lɛmmɔ lɛlɔ.

¹³ Da etemila geen ani na lɛ́tina-a ƒui kaduɛ na abla asiaku-nya lɛlɔ. Nye bɔƒɔtaadi bɔmmɔ lɛlɔ kpakplaa na abla unwi ku Yesu Kristo na bɔyɔ kemmo.

¹⁴ Na ɔkɛ Katɔti Kɔyu ɔyikun ɔni nkya-bu lɛlɔ kemmo ɔsu ni, da ala abuni ani ƒui na Blɔti úti ɔ́kya-a enu kemmo kaduɛ.

¹⁵ Agyi ka Asiaƒuɔ baƒɔtaadine ƒui bálɛ-mi kama, na Ƒigelo ku Hermegene lɛnɔ báda-mi bése.

¹⁶ Muuvele Katɔti nnii ɔnu Onesiƒoro ku nwuna kaduli bekyuli kɔnyana, ɔsika kɔƒa kútekpo-nwu na mina lɛlɔ aani ɔtɔntɛne kalɛ. Mmomu ɔ́kya-mi lɛlɔ na úbunku-mi kaduɛ.

¹⁷ Na uwi ɔni na úbo Roma ni, ɔ́wia-mi ɔ́vi laa útédu uwi ɔni na ɔ́nu-mi.

¹⁸ Na muuvele Katɔti nnii ɔnu-nwu kɔnyana na Litemi Bɔtɛ Limeyi lɛmmɔ lɛlɔ. Awɔ ɔlati agyi kɔlɛ kɔlɛ kɔni na úbunku-mi na Eƒeso.