Timoteo 1 5 - Katɔti Ɔku Kedee

Bɛda Bekpinele Ku Batɔnkune Ku Kabla Bablane Kaduɛ

¹ Tadɔnku ukyuli ɔni nábi lɛlɔ utulo-ɔ momoomo. Mmomu die ala kalɔ te-nwu ku kayi buɛɛ aani ƒula ɔti kalɛ. Na ada bakloƒu aani banwani kalɛ.

² Da beleku bani nábi lɛlɔ bétulo-ɔ aani ƒula beni kalɛ. Na ada begblebi lɛnɔ aani ƒula banwani belekubi, na ataabla lɛlɔ kedee.

³ Bekpinele bani neeebo bebunkune ni, da-ma kaduɛ ku ɔbu.

⁴ Nsu si ukpinele ɔdi ubo bebi iye bawɔ ni, bebi bammɔ bese kalɔ bataatɛya bana kaduli bekyuli bɔda ku bana bawɔne bɔda aani bana bɔƒɔtaadi kabla kalɛ. Ɔmmɔ mɔɔtina ka beesé bana bawɔne kɔdɛ. Ɔmɛni mɔɔyɔ́ Katɔti kaƒɔ.

⁵ Na ukpinele ɔni neeebo ubunkune ni, uuti nwuna anu ƒui taasia Katɔti lɛlɔ na ɔɔkpali Katɔti usien ku ɔƒɛ ka ɔɔwia-nwu kebunku ɔsu.

⁶ Nsu ukpinele ɔni mɔɔbla lɛyalɛ ni, uuubo ngba na Katɔti anumi ina ka uli ngba.

⁷ Bo-ma ɔda na ala amɛni lɛlɔ kalɛ na beletemi belewi-ma.

⁸ Na si bina akɔ ɔdi úni na uláda nwuna kaduli bekyuli kaduɛ ni, agyi anii ɔɔɔsiaku bɔƒɔtaadi bɔmmɔ kama, na nwuna litemi líbie litulo ukyuli ɔni nátaƒɔ útadi.

⁹ Teti ukpinele ɔni nátaƒɔ tɔ akwa liti ku leevu lɛnyi tebunku bekpinele lɛkpa lɛni nkya baƒɔtaadine bammɔ akɔ. Na ɔni nsia ni, ukpinele ɔni néduo lɛkpa lɛmmɔ kemmo ɔlɛka ɔbla uleku ɔni nélie kɔgya kunwi.

¹⁰ Ɔlɛka bekyuli bataalɔ-nwu lɛnyi lɛbuni na nwuna ala abuni bɔbla ɔsu. Na ɔdi uleku ɔni nányuɛ nwuna bebi kaduɛ na ɔɔƒɔ́ baƒɔ. Ɔlɛka ɔbla uleku ɔni na ubo kɔnu ute nwuna baƒɔtaadine bakpana. Na uute bekyuli ƒui kebunku na bana lɛbibo kemmo. Na sɔsɔ ni, úti nwuna ngba bulie ƒui úte lɛbuni bɔbla.

¹¹ Bekpinele bani nétedu tɔ akwa liti ku leevu ni, teti bana anyi tebunku bekpinele lɛkpa lɛmɛni. Ɔsika si ɔlɔna kɔgya bulie emini eekpóku-ma ni, badubɔlɛ Kristo kama na betélie agya bamba.

¹² Na ɔmɛni ɔdubɔya na baƒiɔ linyese lɛni nkya ama ku Katɔti ntɛ na ɔdu-ma kɔtɔ.

¹³ Ɔmmɔ kama ni, badububile uwi na bakɛ kɔnu bete bekyuli kɔduli bɔvi bataatɛmi atɛ keeke. Na ukpidi ƒui ndi ka ni, badubutaalɔ bekyuli anyikpi na beteekeyi atɛ. Na bataatɛmi bekyuli lɛlɔ kɔtɛ ku ala abambadi ani na útalɛka basu.

¹⁴ Anwuɔsu ni, mɔɔyɔ́ ka bekpinele bamɛni udu belie agya na bawɔ bebi na bataanu bana kɔduli ala lɛlɔ mmomu. Ɔmɛni ɔdubɔya na balabla ala ani nátamanku na wete bula bekisine kuƒi na bataasu ala taasiku-bu lɛlɔ.

¹⁵ Ɔsika bekpinele badi bénwini basiaku Satan kama.

¹⁶ Si ukpinele ɔdi ɔkya ɔƒɔtaadine ɔdi kaduli ni, anwu ɔnu-nwu lɛlɔ kalɛ na etila ammɔ asɔ alasia Katɔti baƒɔtaadine lɛlɔ. Na ɔya na baƒɔtaadine bamɛni bataanu bekpinele bakladi bani neeebo bebunkune lɛlɔ.

¹⁷ Na baƒɔtaadine batɔnkune bani mɔɔtɔnku bekyuli kaduɛ ni, ɔlɛka bakɛ lɛyuƒɔla lɛni nésie anumi. Na ɔni ntulo ƒui ndi bani mɔɔtina ala na baasu litemi buni lɛnɔ.

¹⁸ Ɔsika básu na Bunweni Kedee Ɔku kemmo banini, “Tenyimi ebuo ɔni muuwile edula teete-ɔ kenye si unye kabla lɛlɔ.” Lɛnɔ ni, “Ɔlɛka kabla biala ɔblane ɔkɛ nwuna kabla lɛlɔ lɛyuƒɔla.”

¹⁹ Si ukyuli ɔdi úbo ɔɔdá ɔtɔnkune ɔdi kenye ni, taƒɔ taadi si bétedu nkyuli inyɔ ku kama.

²⁰ Na bekyuli bani nli nte ekpidi bɔbla ni, ɔlɛka edie alɛ-ma na adɔnku-ma na baƒɔtaadine ƒui anumi. Na ɔmɛni ɔdubɔkya bakladi liƒu.

²¹ Anwuɔsu mɔɔlɛ-ɔ na Katɔti ku Kristo ku Katɔti batu ƒui anumi nnii sia ala amɛni anu kaduɛ na alanu ukyuli ɔdi anumi alabla lɛla lɛdi.

²² Wi lɛlɔ buɛɛ na tababla eti enu asia ɔdi lɛlɔ na ese-nwu likpo ete Katɔti kabla. Na tenye ekpidi bablane kama, mmomu da lɛlɔ sɛɛn.

²³ Na ƒula kaƒɔ ɔlɛ ɔsu ni, tasu anii ataani ntu lɛti. Ɔdia ka ataani ntɛ blii blii kuvo kalɛ.

²⁴ Bekyuli badi ekpidi eeebo ɔbɛ ɔni na anya alati áaka bana litemi kɔtɔ bɔdu budie bɔtina. Nsu badi ama ni, kama kama asa na ama adi lɛnɔ aalɛ́ keyi.

²⁵ Lɛni kani na ala abuni adi bɔbla lɛnɔ eeebo ɔbɛ, na ani nábɛ lɛnɔ adubɔlɛ keyi.