Timoteo 1 1 - Katɔti Ɔku Kedee

¹ Ami Paulo ɔni ndi Yesu Kristo ɔtalane ɔkɛ bula Ɔƒɔne Katɔti ku Kristo Yesu ɔni lɛlɔ na bɔsia anu na muunweni ɔmɛni.

² Na líti muute awɔ Timoteo. Agyi ka ubi na adi-mi na bɔƒɔtaadi kemmo. Na muuvele Unwoti Katɔti ku Blɔti Yesu nnii bana lɛƒɔndia lɛsiaku-ɔ na banu-ɔ kɔnyana na bete-ɔ keyi buɛɛ.

Paulo Ɔ́lɛ-ma Na Ɔkɔ Ala Batinane Lɛlɔ

³ Na ɔƒɛni ni, mɔɔwia ka asɔ akya Eƒeso mmɔ aani kalɛ na lɛ́su-ɔ uwi ɔni na lɛ́si mmɔ lísela Makedonia. Ɔsika agyi ka bekyuli badi bakya bani mɔɔtina ala ani muuƒú bula ala bɔtina na Kristo bɔƒɔtaadi lɛlɔ. Ɔlɛka abɔku bekyuli bamɛni na bada udu ɔmmɔ baya.

⁴ Su-ma na bada kuuku atɛ bɔnwi ku kaba kasikɔ lɛmɛnɛ bɔkun baya. Ala amɛni udu muuti unyeƒi taakya bekyuli akɔ. Na aaakɛnku Katɔti kasusu lɛlɔ. Kasusu kani na ɔkɛnku bɔƒɔtaadi lɛlɔ kani na bɔdubɔnu bɔti.

⁵ Na lɛla lɛni ɔsu na líti kabla kamɛni lɛ́kya-a enu kemmo ndi ka bɔyɔ bula baƒɔtaadine bakpana ku kaƒɔ ƒaa ku kayi kani naaadu-bu kɔtɔ na likpidi lɛdi bɔbla kemmo. Na bula Kristo bɔƒɔtaadi lɛnɔ bɔbla ɔbuni ɔmmɔ geen.

⁶ Nsu bekyuli badi bénwini kama bákya ala amɛni. Anwuɔsu báyila ulu ɔbuni ɔmɛni. Na baakya kɔdɔlɔ unyeƒi.

⁷ Baawia ka benwini Mose ɔda bubo ala batinane. Nsu ni, belenu ama alati etemila muedi kalɔ. Baasu ala kpakplaa taasiku ɔda bubo bɔmmɔ lɛlɔ, nsu ama alati belenu-nya kalɔ.

⁸ Bula ƒui bɔgyi ka Mose ɔda bubo bɔdia, nsu ɔlɛka bɔdi ɔda bubo bɔmmɔ lɛlɔ aani kalɛ na bɔɔtina.

⁹ Na ɔlɛka buteenyimo lɛnɔ ka ni, ɔɔɔdi bekyuli babuni na bébo ɔda béte, mmomu batuɔkplune bani mɔɔƒiɔ́ Katɔti ɔda bubo ku bakantankpine ku bana udu bani ngba néyi ku ekpidi bɔbla. Badi bekyuli bani naaasiaku bɔƒɔtaadi bɔdi kama ku bani mɔɔdú bana bati ku beni ku bekyuli badune babambadi lɛnɔ.

¹⁰ Na badi bekyuli bani mɔɔdi kɔsɔnɔ ku banana bani mɔɔtɛnku lɛlɔ. Badi bekyuli bani muuyú bekyuli teetéye ku ɔkɔ banyine ku ama bani mɔɔnyi ɔkɔ taakpali ala. Na ama bani ƒui naaasiaku ala bɔtina bɔbuni kama ni, ama na bébo ɔda ɔmɛni béte.

¹¹ Na Katɔti litemi buni lɛni bɔsu na úti ɔ́kya-mi enu kemmo ni, nina kemmo kani na bɔdubɔkɛ ala bɔtina bɔbuni bɔmmɔ bɔni nási Katɔti ɔmmɔ ɔlati bukeye kemmo. Na anwu na bɔɔgyá enu.

¹² Naaakana Blɔti Yesu Kristo enu bɔgya na ɔyikun ɔni na úte-mi ɔnii ntaabla kabla kamɛni ɔsu. Na sɔsɔ ni, úti-ka ɔ́kya-mi enu kemmo. Ɔsika ɔ́nu-mi ɔ́ti ka naaalɛ-nwu kama.

¹³ Ina ka líkpoku-nwu na lɛ́tɛmi enyekpi ku edumi na nwuna lɛlɔ dii asa na ḿbenwini kayi ni, Katɔti ɔ́nu-mi kɔnyana. Ɔsika uwi ɔmmɔ kemmo ni, ńtaƒɔ-nwu tɔ ńtadi na ńtati lɛla lɛni lɛnɔ na ńtaabla.

¹⁴ Mina tati tati ɔ́ya na lɛ́du-nwu kaƒɔ, na ɔ́ya na lɛ́nu Kristo Yesu lɛ́ti na lɛ́ƒɔ-nwu lɛ́di na lɛ́blaku-nwu unwi. Ɔmɛni ɔsu na ami lɛnɔ mɔɔyɔ́ bekyuli.

¹⁵ Kenye kani na ndubo bɔsu mɛni kadi litemi geen, na ɔlɛka ukyuli biala ɔƒɔ-ka ɔdi. Yesu ɔni ndi Ukyuli Ɔƒunadi úbo kayawi kamɛni kemmo ɔnii ubedie bekyuli ɔlɛku bana ekpidi ani na baabla kemmo. Na ala ekpidi bablane bammɔ ƒui akɔ ni, ami ntulo.

¹⁶ Ɔmɛni ɔsu geen na Katɔti ɔ́nu-mi kɔnyana kalɛ na ɔkɛnku ami ɔni ntulo-ma akɔ ƒui lɛlɔ ni, Kristo Yesu ɔdubɔya na bekyuli banu kalɛ na ubo bɔyɔ bɔni muuti taakyiɛ ute ekpidi bablane bani maƒɔ-nwu madi. Na ɔdubute-ma ngba bɔni nsɔ naaadubo bɔsa lɛnɔ kudii.

¹⁷ Anwuɔsu ni, bɛya na buteemwi bula Katɔ Ɔga ɔni na bulánu ku bula anumi na uli ngba úsela ƒui. Na butaakɔliku anwu ɔni neeekpi kudii lɛnyi katɔ uwi ƒui. Ɔsia lɛni.

¹⁸ Mina ubi Timoteo, kabla ku ɔda bubo bɔni na líti muute-ɔ mɛni ni, kadanku ala ani na bula kenye bediene básu básiku-ɔ lɛlɔ. Ƒie etemila amɛni da na adubɔdi likpidi lɛlɔ na Blɔti kekpo kamɛni kemmo.

¹⁹ Da ƒula bɔƒɔtaadi kaduɛ kalɛ na ƒula kayi kaládu-ɔ kɔtɔ. Ɔsika bekyuli bani na bétenu bana kayi bɔlɛ ni, bayii bana bɔƒɔtaadi ulu.

²⁰ Na bana akɔ badi ndi Himeneo ku Aleksandro. Lɛ́ni-ma kɔtu na líti-ma líte ukisine ɔmmɔ kalɛ na bebo abi na nwuna enu kemmo. Ɔmɛni ndubɔya na batɛya lɛla na bada enyekpi bɔtɛmi taasiku Katɔti lɛlɔ baya.