Seƒania 3 - Katɔti Ɔku Kedee

Likpidi Bɔbla Bɔ́ƒɔ Yerusalem

¹ Bɔbuɛ ute Yerusalem ɔsika ɔda bubo lɛlɔ tadi ɔ́ya na likyulikpi lɛ́ƒɔ ɔma ɔmmɔ, na ala ébie na uusé lɛlɔ.

² Yerusalem úni ɔnii ulénu Unwoti Katɔti litemi na uti anu ɔsia-nwu lɛlɔ. Na bɔta kani na ɔɔta teenye-nwu lɛlɔ, na úni lɛnɔ ɔnii batalɛ-nwu na baklibi-nwu.

³ Nwuna bakutine ƒui bénwini bagyata bani mɔɔkwanyi, na nwuna litemi batɛne lɛnɔ bénwini bebuo bani muuƒie bana bakpana taakun usien na asɔ alanu lɛla lɛdi si kadi kégye.

⁴ Kenye bediene bani nkya Yerusalem baakɔliku lɛlɔ katɔ na baaadi bekyuli bani lɛlɔ na beti anu basia. Bana bakpane lɛnɔ béwi kakpakɔ kammɔ anumi kalɔ na bébile Katɔti Ɔda bubo bɔmmɔ.

⁵ Alaekpidi bablane bammɔ basɔ baaagyi kɔƒa, nsu Unwoti ɔɔbla ala siin uwi biala. Na ɔɔnu ka kadi biala negye ni, ɔɔtɛ litemi ulu lɛlɔ siin.

⁶ Unwoti ɔ́bɔku kadi bekyuli údie bana lɛma na kɔgyumanakɔ kpakplaa kɔni bátu kúbie na kɔ́ƒɔ lɛlɔ kɔkya alakpi akɔ. Na bana lɛblɔnu ku lɛma ƒui línwini alakpi akɔ lɛti lɛti ɔni na bekyuli basɔ beeebo-ni kemmo.

⁷ Katɔti ɔ́bla kasusu ka Yerusalem ɔdubɔtɛya kalɛ na babu-nwu na beteenu-nwu litemi na ɔda ɔma ɔmmɔ kɔtu bɔni ɔya na ulayila-ma udu uledie mmɔ. Nsu likpidi bɔbla atu kani na beesé na mmɔ.

Kadi Bekyuli Ƒui Badubo Bunwini Bubo Unwoti Kudɔ

⁸ Unwoti ɔnini, “Amii bɛsɔ binye, limeyi lɛni na ndubo amii kadi bekyuli ƒui kɔtɔ bɔdu lɛdubo. Lɛ́ɛlɛ limeyi lɛdi ugyii líse ɔni na ndubo bina kadi bekyuli ku lɛga kɔdikɔ ƒui bɔsala na lɛni-mii kɔtu kaduɛ na mina kɔnyi kpakplaa kemmo. Na kɔnyi kɔmmɔ kɔdubɔkɔ-mi katɔ útédu ka lɛkyula kalɔ kammɔ ƒui.

⁹ “Ndubo adi biala batɛmine bɔbla sɛɛn na bamanku kalɛ na bemwi-mi lɛnyi. Na bana ƒui badubɔsala babla unwi, na babla ami, Unwoti, kabla.

¹⁰ Mina bekyuli bani mɔɔbu-mi geen na bégyingya bakya ni, badubɔsi ketu kani nkya Kusi kalɔ kama kakɛ bebo-mi kudɔ ku etela.

¹¹ Si uwi ɔmmɔ údu ni, bɛsɔ bilata bilenye-mi lɛlɔ na lɛkya-mii kɔƒa. Ɔsika bekyuli bani na bebo lɛkantakpi na baatalaku lɛlɔ katɔ mmɔ ni, ndubudie-ma ƒui na bina akɔ, na basɔ beléteetu lɛgba taanya taavi mina kɔbi kedee kɔmmɔ lɛlɔ kudii.

¹² Nsu bina akɔ bani muuboku lɛlɔ kalɔ buɛɛ na biibo-mi kudɔ bɛnii mbunku-mii ni, amii ɔsu naaayila-mii udu.

¹³ Israel kadi bekyuli bani nébu ni, badubulie ngba siin na beni ɔkɔ bɔnyi. Badubɔdi na batɛ banwuna, na balayia lɛla biala.”

Bɛtu Lɛnu Bɛdi Limeyi

¹⁴ Ukyuli biala na Yerusalem ku Yuda bɛtu lɛnu na bɛva momoomo ku bina kɔyi ƒui na bɛdi limeyi!

¹⁵ Sion, ƒula lɛtuni lɛ́sa. Unwoti ɔ́bɔku ƒula bekisine na básɔ bénwini na ƒula kama. Bina Unwoti ɔni ndi Israel Ɔga unye-mii kudɔ, anwuɔsu ɔ́sɔ útalɛka bɛyia ɔgbankpi ɔdi lɛnɔ.

¹⁶ Uwi ɔdi ɔdubo ubédu ɔni na badubɔsu awɔ Yerusalem banini, “Sɔ tayia, na enu ataƒɛ-ɔ!

¹⁷ Unwoti Katɔti unye-mii kudɔ uwi ndi uwi. Ubo ɔyikun ka udie-mii. Na kalɛ na ɔɔyɔ́-mii ɔsu ni, ɔdubɔya na bɛkɛ bɔnwuna. Na amii ɔsu ni, uudie nwuna lɛlɔyɔ keyi ku lɛnu bɔtu.”

Unwoti Úse Nwuna Bekyuli Kenye

¹⁸ Unwoti úse kenye ɔnini, “Bina kɔnyana buwulo kenye kadubukulo na bɛkana na bɛdi limeyi ku lɛlɔyɔ.

¹⁹ Bɛnu! Ndubo bina bekisine kɔtu bɔni geen, na lɛsala bekpulone ku bani na bédie-ma atu na lɛya bana kɔƒa kɔni na bákya-ma kunwini na baƒɔ lɛnyi na kalɔ lɛlɔ.

²⁰ Na uwi ɔni na ndubo-mii bɔsala mmɔ ni, ndubɔsɔku-mii liboku ɔma na lɛya na bɛƒɔ lɛnyi, na lɛsɔku bina lɛkɛ lite-mii na anumi ku anumi. Lɛni na Unwoti ɔ́su.”