Samuel 2 6 - Katɔti Ɔku Kedee

Béti Bunyimi Adaka Ɔmmɔ Béboku Yerusalem

¹ Uwi bamba lɛnɔ ni, Dawid ɔ́sɔ ɔ́lɔ nwuna bekpone babuni ƒui ɔ́sala, na bana bumomo bɔbla aani nkyuli mpim avlaatɛ.

² Na ɔ́tɔnku bekyuli bamɛni ƒui úsienku ɔma ɔni baalɔ Baala na Yuda kalɛkɛ lɛlɔ. Na bésie mmɔ ku kasusu ka betéti Unwoti Bunyimi Adaka ɔmmɔ beboku Yerusalem. Na Bunyimi Adaka ɔmmɔ ni, Unwoti lɛnyi na béti básia-nwu. Na bávɔ kubweyi lidu inyɔ badi na baalɔ-ma Kerub bényene adaka ɔmmɔ lɛlɔ, na Unwoti uli-ma lɛlɔ na adaka ɔmmɔ katɔ.

³ Unwoti Bunyimi Adaka ɔmmɔ use ɔnana ɔni baalɔ Aminadab kesii na kɔbi kɔdi lili. Amu na Dawid bekpone bammɔ béti adaka ɔmmɔ na béti básia kɛɛkɛ ɔwɔdi lɛlɔ.

⁴ Ka bénwini bésela Yerusalem ni, Aminadab bebi bananabi inyɔ bani ndi Usa ku Ahio ntɔnku kɛɛkɛ ɔni nti Bunyimi Adaka ɔmmɔ. Na Ahio ntɔ anumi.

⁵ Na ulu lɛlɔ ni, Dawid ku Israelƒuɔ bammɔ bakɛ beemwi Unwoti ku agya. Na beedie lɛnu na baatɔ́. Bada lɛbentaa ku ebi ku agyala abambadi baagyá.

⁶ Amu ka bébedu Nakon kesii kani na uuwiile edula ni, ɔmantɛ bakɔ bammɔ bagbanta na adaka ɔmmɔ ɔ́ta úsie kakɛ kenwi. Mmɔ ni, Aminadab ubidi Usa úkeyi adaka ɔmmɔ.

⁷ Nsu Unwoti útatunaku Usa munu munu na lɛla lɛni na ɔ́bla mmɔ ɔsu. Ɔmmɔ ɔsu ɔ́ya na úkpi kɔnakunwi ɔ́tɛ adaka ɔmmɔ kɔmadɔ.

⁸ Lɛla lɛmmɔ líkpoku Dawid geen na kalɛ na Unwoti ɔ́kɛ kɔnyi na ɔ́du Usa ɔsu. Na ɔ́si ɔni na Usa úkpi mmɔ ɔsu ni, bekyuli bammɔ básia ntɛ mmɔ lɛnyi banii Peres Usa. Na nwuna kalɔ ndi Usa Kɔtu Bɔni.

⁹ Na ɔmmɔ ɔsu Dawid ɔ́yia Unwoti limeyi lɛmmɔ geen na ɔ́su ɔnini, “Dɛ na ɔdubɔbla na Unwoti Bunyimi Adaka ɔmɛni webese-mi kudɔ kudii?”

¹⁰ Anwuɔsu útayɔ ka uti Unwoti Bunyimi Adaka ɔmmɔ usienku kesii kani na básia lɛnyi banii Dawid Ɔma Unengudi. Mmomu údeyiku-nwu úsienku ɔnana ɔni baalɔ Obed Edom ɔni na ɔ́si Gat ɔma mmɔ kaduli.

¹¹ Na abuli atɛ sɔɔn na Bunyimi Adaka ɔmmɔ úse Obed Edom kesii mmɔ. Na ɔkɛnku ɔmmɔ ɔsu ni, Unwoti úte-nwu ku nwuna kaduli bekyuli kusɛ kusɛ.

¹² Amu na ukyuli ɔdi úbasu Dawid ka Unwoti úte Obed Edom ku lɛla biala na ubo kusɛ kusɛ na ɔ́ya na ala aatɛ teete nwuna kaduli bekyuli na Bunyimi Adaka ɔni nse-nwu kudɔ ɔsu. Ɔmmɔ ɔsu Dawid ɔ́si Yerusalem mmɔ úsie Obed Edom kudɔ na ɔ́ya na béti Bunyimi Adaka ku kɔgya ku lɛnu yoo na baakɛ́ ebiti.

¹³ Ka bekyuli bani nti Bunyimi Adaka ɔmmɔ bédie lɛgba ɛku kani na Dawid ɔ́ya na bédi bénye. Mmɔ na úti ɔmantɛ akɔ ɔgyani ku ɔkɔdi ɔni nélie lɛmwi kaduɛ na úti ɔ́bla akpala úte Unwoti.

¹⁴ Amu ka bágyu bésela ni, Dawid ɔkɛ ɔɔtɔ́ momoomo geen na uumwi Unwoti. Na kɔdi kɔƒualadi kpɛtɛ kpɛtɛ kɔdi kɔda-nwu kavobi.

¹⁵ Ɔmmɔ ɔsu Dawid ku Israelƒuɔ ƒui bada owogyo ku katɔ na baavwi kɔkpɛɛ ku lɛnu momooomo na beti Bunyimi Adaka ɔmmɔ béselaku Yerusalem.

¹⁶ Uwi ɔni na Bunyimi Adaka ɔmmɔ uuduo Dawid ɔma unengudi ɔmmɔ kemmo ni, Saul ubidi ulekubi Mikal unye ɔɔnu-ma taavinku ƒansili. Na ɔni na ɔ́nu kalɛ na Dawid ɔkɛ ɔɔtɔ́ na ɔɔƒulu na Unwoti anumi ni, nwuna lɛlɔ lítayɔ-nwu kaƒɔ munu munu.

¹⁷ Béti Unwoti Bunyimi Adaka ɔmmɔ bébeduoku ɔma na béti-nwu bétése Adi Kevo kani kemmo na Dawid ɔ́ya na bátu bése béte adaka ɔmmɔ kemmo. Ɔmmɔ kama Dawid ɔ́kyula akpala úte Unwoti na ɔ́bla unwi bɔbla akpala lɛnɔ.

¹⁸ Ka bábla akpala ammɔ báwɔlɔ ni, úte bekyuli bammɔ ƒui kusɛ kusɛ ɔkɛnku Unwoti Ɔyikune Ƒui lɛnyi kemmo.

¹⁹ Na ɔmmɔ kama ni, úte Israelni biala na úbo mmɔ bodobodo kakɛ ku egyiibi akangyiɛ lɛna lɛni bákɔ básɔku béƒi asa na bátɔlɔ bésie kɔduli.

²⁰ Uwi ɔni na Dawid únwini úsie kaduli utéte kusɛ kusɛ ɔmmɔ nwuna kaduli bekyuli ni, Saul ubidi Mikal ɔni ndi ulekudi mmɔ ɔ́lɛ úbasiaku-nwu ulu. Na ɔ́su-nwu ɔnini, “Ɔmwi na lɛlɔ lɛ́yɔ Israelƒuɔ Ɔga na údie lɛlɔ lɛti na bakladi akɔ. Na úbu ɔni na udie kasɔngya na bekyuli bani lɛlɔ na ɔɔdi ku bana belekubi kabla bablane anumi. Na ɔ́bla lɛlɔ aani ukyuli ɔni na uuuse-nwu nwaa na ɔkana na udie lɛlɔ kasɔngya uwi biala na ɔɔyɔ́ ƒaa!”

²¹ Mmɔ na Dawid lɛnɔ údie kenye ɔ́su Mikal ɔnini, “Nsu ala ani ƒui na lɛ́bla ni, Unwoti na muute ɔbu. Anwu náƒuna-mi ka lɛƒɔ ƒ'ɔti kenyekɔ ku nwuna ɔtɔ kemmo bekyuli ƒui kadikɔ linwini mina kadi aani ɔtɔnkune ɔni madi Israel ƒui lɛlɔ. Na ndubo bɔtɔ butulo lɛni na liti lɛkɔliku Unwoti lɛnyi katɔ.

²² Ɔmmɔ ɔsu si ina ánu mina katɔ aani lɛla lɛni muukpó kɔƒa ni, ami mɔɔyɔ́-nwu lɛni na ɔ́manku-mi lɛnɔ ka mina katɔ keteekpo kɔƒa. Na lɛni kani na ɔlɛ ka use. Nsu belekubi bani lɛlɔ litemi na aasu ni, badubuti ɔbu biala bete-mi.”

²³ Na Saul ubidi Mikal ɔmɛni útawɔ ubi ɔdi úti útédu nwuna likpimeyi.