Samuel 1 7 - Katɔti Ɔku Kedee

¹ Ɔmmɔ ɔsu Kiriat-Yearim bekyuli bébo na bébeti Unwoti Bunyimi Adaka ɔmmɔ bésienku Aminadab kesii. Na nwuna kaduli kakya abi lɛlɔ na bana ɔma kemmo. Na ubidi Eleasa na báƒuna ka utaanu Unwoti Bunyimi Adaka ɔmmɔ lɛlɔ.

² Ɔmɛni ɔsu adaka ɔmmɔ ɔ́kya-nwu kudɔ na Kiriat-Yearim mmɔ akwa aavlanyɔ. Na uwi ɔmɛni kemmo ƒui ni, Israelƒuɔ béwulo kɔnyana geen na bévele Unwoti banii ubunku-ma.

³ Limeyi lɛdi ni, Samuel ɔ́su Israelƒuɔ ƒui ɔnini, “Si bɛɛyɔ́ ka binwini udu na biti lɛlɔ bite Unwoti bɔdi ni, amu ɔlɛka bidie bɛtina nwaa na bina ɔbladu kemmo. Na bɛyila baƒiɔ bani na bɛ́vɔ bíte lɛlɔ udu. Na bɛyila Astarot baƒiɔ bani lɛnɔ bɛ́vɔ mmɔ udu. Binwini kama bɛkya baƒiɔ bammɔ ƒui na biti bina kayi bite Unwoti ƒui kede kede. Na bitaakya lili kalɔ teete anwu lɛti pɛ na ɔda-mii udie Ƒilsitiƒuɔ enu kemmo.”

⁴ Sɔsɔ ni, Israelƒuɔ báda Baal baƒiɔ ku Astarot baƒiɔ bammɔ bɔkpa báya. Na bése kalɔ baakpá Unwoti lɛti.

⁵ Amu na Samuel ɔ́su Israelƒuɔ bammɔ ɔnini, “Bɛya na Israelni biala ubo. Na bɛsala lɛlɔ na Mispa na ndubɔkpali Unwoti na livele-nwu lite-mii.”

⁶ Amu uwi ɔni na Israelƒuɔ bammɔ básala lɛlɔ na Mispa ni, Samuel únye aani Israelƒuɔ ɔtɔnkune kalɛ na Mispa, na bédu ntu na libiɔ kemmo na beebó-mu teewi kalɔ teete Unwoti aani lɛlɔ buti teete-nwu akpala. Na bélie kɔka limeyi lɛmmɔ lɛlɔ, na bédie bana alaekpidi kalɔ básu Unwoti banini, “O Unwoti, bɔ́bla likpidi bɔ́ƒiɔ-ɔ.”

⁷ Ka Ƒilistiƒuɔ bénu ka Israelƒuɔ ƒui bása na Mispa ni, Ƒilsitiƒuɔ agyina besiene báta banii bebekpoku-ma na mmɔ. Amu ɔni na Israelƒuɔ lɛnɔ bénu lɛni ni, liƒu lɛ́da-ma na báyia geen na Ƒilistiƒuɔ ɔkplu ɔsu.

⁸ Mmɔ na básu Samuel banini, “Tada bula Unwoti Katɔti bɔkpali taya na bula lili. Ɔƒɛni kalɛ ɔdubunu ƒula bɔkpali na udie-bu na Ƒilsitiƒuɔ enu kemmo.”

⁹ Ɔmmɔ ɔsu Samuel úƒie koƒonu ubi ɔni mɔɔnyimi lɛnyi na ɔ́du-ku na ɔ́kyula-ku ƒui ɔ́kpa úte Unwoti. Na úvele Unwoti kpakplaa na Israelƒuɔ lili. Na Unwoti lɛnɔ únu-nwu bɔkpali.

¹⁰ Ɔni na Samuel uwi lɛkpa lɛmmɔ lɛlɔ geen ni, Ƒilistiƒuɔ lɛnɔ bátu akpagya badubo banii bebéyu-ma batu na mmɔ na bekpoku-ma. Nsu mmɔ kani ni, Unwoti ɔ́bɔku Ƒilistiƒuɔ ku lɛdi momoomo lɛni náku aani kalɛ katɔ keedu ku kudu bonwu. Na ɔmmɔ ɔ́ya na Ƒilistiƒuɔ báyia bávili bébu ɔni na use aani lɛla lɛdi nágyu-ma ku lɛgba ɔ́bɔku-ma údie Israelƒuɔ anumi mmɔ.

¹¹ Na Israelƒuɔ bammɔ lɛnɔ bábi básiaku-ma ɔ́si Mispa mmɔ. Na bádu Ƒilistiƒuɔ bammɔ ukpone biala na ulu lɛlɔ laa útédu kesii kani baalɔ bani Bet-Kar.

¹² Ɔmmɔ kama ni, Samuel ɔ́lɛ likpose lɛtabi lɛdi na Mispa ku Sen lɛma ntɛ na ɔ́sia-ni lɛnyi ɔnii Eben-Eser, na nwuna kalɔ ndi bɔƒɔ lɛtabi. Na ɔ́su ɔnini, “Ɔmɛni mɔɔtina kesii kani na Unwoti úbunku-bu úbedu.”

¹³ Anwuɔsu Israelƒuɔ bádi Ƒilistiƒuɔ lɛlɔ na básɔ bátakana na benye basiaku Israelƒuɔ kudii na bana kalɛkɛ mmɔ kesii kadi. Na Samuel ngba bulie uwi ƒui ni, Ƒilistiƒuɔ bátakɛ bɔnwuna bɔdi na Unwoti lɛkɔkɔ.

¹⁴ Ɔƒɛni Israelƒuɔ lɛma lɛni na Ƒilistiƒuɔ báƒɔ ɔ́si Ekron útédu Gat ni, Israelƒuɔ básɔ báƒɔ-ni. Na kalɛkɛ kani na Ƒilistiƒuɔ báƒɔ na amadɔ mmɔ ni, Israelƒuɔ báƒɔ mmɔ lɛnɔ. Ɔmmɔ ɔsu atu bɔyɔ bɔ́kya Amonƒuɔ ku Israelƒuɔ ntɛ ƒui.

¹⁵ Samuel ɔ́tɔnku Israelƒuɔ aani bana litemi ɔtɛne nwuna ngba kemmo ƒui.

¹⁶ Na lɛkwa ndi lɛkwa ni, uusié taavi-ma lɛlɔ ɔ́si Betel úsie Gilgal útédu Mispa taatátɛ etemila.

¹⁷ Nsu uwi biala kemmo ni, ɔɔsɔ teenwini teesie Rama kesii kani ndi-nwu keliekɔ geen. Na mmɔ lɛnɔ ɔɔnu ka Israelƒuɔ bammɔ bábla lɛla biala kaduɛ. Na ɔ́tu lɛkpabi lɛdi úte Unwoti na mmɔ.