Samuel 1 6 - Katɔti Ɔku Kedee

Ƒilistiƒuɔ Básɔku Bunyimi Adaka Bésienku Israel

¹ Uwi ɔni na Unwoti Bunyimi Adaka ɔ́kya Ƒilistiƒuɔ kalɔ lɛlɔ ni, ɔbla abuli maatɛ.

² Amu na Ƒilistiƒuɔ bálɔ bana bakpane ku like bebone na béye-ma banini, “Bi na bɔdubo bɔbla ku Unwoti Bunyimi Adaka ɔmɛni? Bɛsu-bu kalɛ na bɔdubo bɔbla asa na wasɔ wetédu kesii kani na ɔ́si.”

³ Mmɔ na bédie kenye banini, “Si bɛ́sɔku Unwoti Bunyimi Adaka ɔmmɔ bíselaku Israel ni, biteti anwu lɛti bitada, mmomu biti etela adi bibunku bitékpi kɔtɔ. Na bina ɔlɛ ɔdubɔba-mii. Na bɛdubɔti lɛnɔ lɛla lɛni ɔsu na Unwoti ɔ́ya na ɔgbankpi ɔmɛni udu ɔ́siaku-mii lɛni.”

^4-5 Amu na Ƒilistiƒuɔ bammɔ béye banini, “Bi na ɔ́manku ka buti butékpi Unwoti ɔmmɔ kɔtɔ.” Mmɔ na bédie kenye banini, “Biti sika ugyiedi na bɛnwamana-nwu na bɛvɔ bɛbla aani bina alɛbi ani mɔɔdu-mi mmɔ udu. Na bɛvɔ ɔbambadi lɛnɔ aani besi bani muubile-mi ala udu kenye. Na nwuna bumomo bɔbla ɛlɔ ɛlɔ na Ƒilistiƒuɔ agyina besiene bammɔ bumomo kenye, ɔsika amii ku-ma lɛlɔ na ɔlɛ ɔmmɔ úbo. Na biti bitéte Israel baƒiɔ bammɔ aani bina kɔtɔ bukpi etela. Ɔƒɛni kalɛ kaƒɔ kadubɔba-nwu na ɔ́ya ɔgbankpi ɔmmɔ kenye kekulo na amii ku bina baƒiɔ ku kalɔ kammɔ ƒui bɛkɛ bɔnwuna.

⁶ Na bi ɔsu na bɛɛbla atuɔkplu aani kalɛ na Egyipteƒuɔ ku Ƒarao bábla? Na ɔmmɔ ɔsu na ɔ́ni-ma kɔtu kpakplaa útálɛ ka bágya Israelƒuɔ bálɛku bana ɔma na béti bana ulu?

⁷ “Ɔƒɛni ni, bɛwia kɛɛkɛ ɔwɔdi ku ɔmantɛ bakɔ inyɔ bani muute bana bebi anyi. Na bɛnu ka bétebo kɔbuli bátada-ma na bani kɛɛkɛ ɔdi kudii iye bátabala-ma anwami bonwu ku kɔgba na batuma kudii. Na bɛmami bebi bammɔ bana lɛlɔ bitákya kesii bamba asa na bibo kɛɛkɛ ɔmmɔ lɛbuli bɛda-ma.

⁸ Ɔmmɔ kama ni, bɛgyu Bunyimi Adaka ɔmmɔ bɛkya kɛɛkɛ ɔmmɔ kemmo. Na biti sika ugyiedi kɔlɛmii kɔmmɔ bɛkya obo bamba kemmo bise adaka ɔmmɔ kɔmadɔ. Na bidie bebuo bani ndubɔni kɛɛkɛ ku ala ammɔ ƒui ulu.

⁹ Na bitaasia-nwu anumi taanu, si ɔ́sia ɔma ulu lɛlɔ siin úsela Bet-Semes ni, na bɛgyi ka ɔgbankpi ɔmɛni ɔ́si Unwoti kudɔ asa na úbo-bu lɛlɔ. Na si útasia lɛni bɔdi ni, na bɛgyi ka ɔgbankpi keeke kani nátuaku-bu.”

¹⁰ Anwuɔsu bábla ala amɛni ƒui. Na béti kɛɛkɛ ɔmmɔ lɛbuli bébo báda ɔmantɛ bakɔ bammɔ lɛlɔ na bámami bana bebi bammɔ bátákya kesii bamba.

¹¹ Amu na béti Unwoti Bunyimi Adaka ɔmmɔ básia kɛɛkɛ ɔmmɔ lɛlɔ ku obo ɔni kemmo na sika ugyiedi besi ku alɛbi udu ɔni bávɔ mmɔ akya.

¹² Amu na ɔmantɛ bakɔ bammɔ báyu ulu, na bakɛ siin bésela Bet-Semes. Na bakɛ beebó kudu na ulu lɛlɔ uwi ƒui. Na bétedeyi kɔmii iye kɔdianu. Na Ƒilistiƒuɔ batɔnkune bammɔ basiaku-ma kama laa útédu Bet-Semes ɔmii lɛlɔ.

¹³ Na uwi ɔmmɔ kemmo ni, Bet-Semes bekyuli bakya baaƒɛ bana edula ebi ani na bákya na ɔkwalɛ kemmo. Ka bátalaku anumi ni, bánu ka Unwoti Bunyimi Adaka ɔmɛni ɔsia kɛɛkɛ lɛlɔ ɔɔyu. Na lɛlɔ lɛ́yɔ-ma geen.

¹⁴ Ɔmantɛ bakɔ bammɔ báni kɛɛkɛ ɔmmɔ béduoku kemo kadi kemmo. Na mmɔ ɔdi Yosua ɔni nasi Bet-Semes kalɔ kemmo na bébedi-nwu bényene lɛtakpɛ bonwu lɛdi kudɔ. Na kɛɛkɛ ɔmmɔ kani na bégyingya bábla ekyweni ani na béti bákyula ɔmantɛ bakɔ bani náni kɛɛkɛ ɔmmɔ béboku bábla akpala béte Unwoti.

¹⁵ Na Lewiƒuɔ bani nkya-ma akɔ ni, ama nágyu Unwoti Bunyimi Adaka ɔmmɔ ku obo ɔni kemmo na sika ugyiedi ɔmmɔ ɔ́kya básia lɛtakpɛ lɛmmɔ lɛlɔ asa na badubɔbla akpala ammɔ. Na ɔmmɔ kama ni, Bet-Semesƒuɔ bábla akpala bamba lɛnɔ béte Unwoti limeyi lɛmmɔ kani lɛlɔ.

¹⁶ Ƒilsitiƒuɔ agyina besiene ɛlɔ bani nsiaku kɛɛkɛ ɔmmɔ kama bébo mmɔ bábanu ɔmɛni ƒui asa na bénwini bésie Ekron limeyi lɛmmɔ kani lɛlɔ.

¹⁷ Sika ugyiedi alɛbi udu ɔni na Ƒilistiƒuɔ béti bésienku bétékpi Unwoti kɔtɔ ni, unwi ɔdi Asdod ɔdi, Gasa ɔdi unwi, Askelon ɔdi unwi, Gat ɔdi unwi, na Ekron ɔdi lɛnɔ unwi.

¹⁸ Na sika ugyiedi ɔni bávɔ na besi udu kenye lɛnɔ ubo ɛlɔ na Ƒilistiƒuɔ lɛma ɛlɔ bɔni kenye na agyina besiene bammɔ benye bumomo kenye. Na lɛma lɛmmɔ ndi lɛni na bátu awodu bámana ku lɛma lɛwɛwɛlɛdi lɛni mma-ni lɛlɔ. Na lɛtakpɛ lɛni lɛlɔ na bágyu Bunyimi Adaka ɔmmɔ bálɛ ni, ɔmu ɔdi likposela na Yosua ɔni nási Bet-Semes kalɔ kemmo ku ɔmwi limeyi lɛmɛni lɛlɔ.

¹⁹ Nsu ka Bet-Semesƒuɔ bébimi Unwoti Bunyimi Adaka ɔmmɔ kemmo bánu ɔsu ni, Katɔti ɔ́ya na bana nkyuli liti ku aavlanyɔ békpi. Na béwulo kɔnyana geen na ɔgbankpi ɔni na Unwoti ɔ́ya na ɔ́siaku-ma ɔsu.

²⁰ Ɔmmɔ ɔsu Bet-Semesƒuɔ béye banini, “Ɔma mbo ɔyikun na ɔkali ɔnii uunye ɔsiaku Unwoti Katɔti Kedee ɔmɛni. Na ɔma na bɔdubuti Unwoti Bunyimi Adaka ɔmɛni bumene ɔƒaani?”

²¹ Amu na bátala batu bákya Kiriat-Yearimƒuɔ banii, “Ƒilistiƒuɔ básɔku Unwoti Bunyimi Adaka ɔmmɔ béboku. Ɔmmɔ ɔsu bibo na bibeti-nwu bitése bina kudɔ.”