Samuel 1 4 - Katɔti Ɔku Kedee

Ƒilistiƒuɔ Békpo Israel Na Béƒie Bunyimi Adaka Báƒɔ

¹ Na uwi ɔmmɔ kemmo ni, Israelƒuɔ báta banii betékpoku Ƒilistiƒuɔ. Na bátábla kakyakɔ na kesii kani baalɔ Eben-Eser. Na Ƒilistiƒuɔ bábla kakyakɔ na Aƒek.

² Ƒilistiƒuɔ bátu akpagya na bátásiaku Israelƒuɔ ɔni na útese Israelƒuɔ buɛɛ munu munu. Na ka kekpo kammɔ kányi anyi ni, bádi Israelƒuɔ lɛlɔ na bádu bana bekyuli aani nkyuli mpim ine na kekpokɔ mmɔ.

³ Ka bekpone bakladi bénwini bébo bana kakyakɔ ni, bana benengu bammɔ béye banini, “Bi ɔsu na Unwoti ɔ́ya na Ƒilistiƒuɔ bádi-bu lɛlɔ ɔmwi? Bɛya na butágyu Unwoti Bunyimi Adaka bɔsiku Silo buboku, na buti bɔdanku kekpokɔ mmɔ. Na ɔdubɔƒɔ ute-bu na bula bekisine ɔsu.”

⁴ Ɔmmɔ ɔsu bésie na bététi Unwoti Ɔyikune Ƒui Bunyimi Adaka ɔmmɔ. Na nwuna lɛlɔ ni, Unwoti batu bebweyi inyɔ badi udu bénye bani baalɔ Kerub na bebo avwi. Na Bunyimi Adaka ɔmmɔ kudɔ ni, Eli bebi inyɔ, Hoƒni ku Pinehas, benye.

⁵ Ka Bunyimi Adaka ɔmɛni úbeduo Israelƒuɔ kakyakɔ mmɔ ni, Israelƒuɔ bébo kudu momoomo geen ɔni náya na kalɔ kákunku.

⁶ Na ɔni na kɔkun kɔmmɔ kúwi Ƒilistiƒuɔ ni, béye banii, “Bi kɔvanu na Hebriƒuɔ bamɛni baabla lɛni na bana kakyakɔ?” Amu ka bébenu ka Unwoti Bunyimi Adaka ɔmmɔ na béti béboku mmɔ ni,

⁷ liƒu bonwu líduo Ƒilistiƒuɔ bammɔ ƒui. Mmɔ na básu banini, “Báƒiɔ badi bébo bébeduo Israelƒuɔ kudɔ na bana kakyakɔ mmɔ. Ɔmɛni ɔsu búduo ɔgbankpi kemmo, ɔsika lɛla lɛmɛni udu lítalɛ kudii.

⁸ Ɔlɛka bɔnu lɛlɔ kemmo kaduɛ. Ɔma ndubo-bu budie na baƒiɔ bamɛni enu kemmo? Bɔgyi ka baƒiɔ bekpone na badi. Na ama nékpoku Egyipteƒuɔ na kalɔ kakwiidi kemmo ku lɛlɛ lidu lidu.

⁹ Ƒilistiƒuɔ, binye kpakplaa na bɛdi lɛnanabi. Si ɔɔɔdi lɛni bɛdubo bunwini Israelƒuɔ kabla bablane aani kalɛ kani na ama bákya-bu kalɔ dii!”

¹⁰ Ɔmɛni ɔsu ka bása sɔsɔ ni, Ƒilistiƒuɔ békpo ku lɛnungyie na bádi Israelƒuɔ lɛlɔ. Na usi na Israelƒuɔ bakɛ békeli bésie bana kakyakɔ. Na bádu Israelƒuɔ na bemomo geen, ɔsika bekpone bani nkɛ lɛgba na bádu-ma babla nkyuli mpim avlaatɛ.

¹¹ Na béƒie Bunyimi Adaka ɔmmɔ báƒɔ, na Eli bebi inyɔ bammɔ lɛnɔ békpi.

Eli Úkpi

¹² Limeyi lɛni kani lɛlɔ na Eli bebi békpi mmɔ ni, ɔnana ɔdi ɔ́si Benyamin kɔdua kemmo úkeli ɔ́si kekpokɔ mmɔ úsie Silo. Nwuna adala áduli ƒui na ɔtumu uwi-nwu kuli.

¹³ Na ka ɔ́da úbalɛ ni, Eli uli nwuna liboku lɛlɔ na ulu kɔtu ɔɔnu ulu, ɔsika Katɔti Bunyimi Adaka ɔmmɔ lɛlɔ kani na nwuna anu asia. Ɔƒɛni ka ɔnana ɔmmɔ úduo ɔma kemmo na ɔ́su bekyuli lɛla lɛni nálɛ ni, ɔma ɔmmɔ ƒui lɛsɛ ku kɔvanu kani nda.

¹⁴ Amu ka Eli únu kɔvanu kɔmmɔ ni, úye ɔnini, “Na kɔvanu kɔmɛni kalɔ ndi bi?” Amu na ɔnana ɔmmɔ ɔ́babla úsie Eli kudɔ.

¹⁵ Na uwi ɔmmɔ kemmo ni, Eli ɔ́ɔƒɔ aani akwa liti ku aavlene-maane. Na ka anumi aabla-nwu ƒluƒlu ɔsu ni, ɔsɔ ulanu kaduɛ.

¹⁶ Ɔnana ɔmɛni ɔ́su Eli ɔnini, “Kekpokɔ mmɔ na lɛ́si muuduo mɛni ɔƒaani. Na bukeli na líkeli lɛ́si mmɔ ɔmwi ɔmɛni líbo muuduo.” Amu na Eli úye-nwu ɔnini, “Ubi, bi geen nálɛ mmɔ?”

¹⁷ Mɛni na ɔnana ɔni ndanku kenye kamɛni úboku údie kenye ɔnini, “Israelƒuɔ bekpone bammɔ ni, bukeli na búkeli Ƒilistiƒuɔ bammɔ ɔni na bádu bula bekyuli pii. Ɔƒɛni ƒula bebi inyɔ bammɔ lɛnɔ békpi na béƒie Katɔti Bunyimi Adaka ɔmmɔ báƒɔ.”

¹⁸ Amu ka Eli únu ka ɔ́lɔ Katɔti Bunyimi Adaka ɔmmɔ lɛnyi ni, ɔ́kada úsie kama kama na útáyu kalɔ akpatete na ɔban ɔmmɔ kayakun kenye. Na ɔ́ƒɛ limɔ na úkpi, ɔsika ɔ́ɔbla unengu geen. Akwa aavlene na ɔ́tɔnku Israel kalɔ lɛlɔ bekyuli.

¹⁹ Ɔƒɛni ubidi Pinehas ulekudi ni, ɔda kaƒɔ uwi ɔmmɔ na káabi ƒui lɛnɔ ka ɔwɔ. Na únye mmɔ na únu ka Ƒilistiƒuɔ béƒie Katɔti Bunyimi Adaka ɔmmɔ baƒɔ na ɔgyani lɛnɔ úkpi. Na ɔ́nu lɛnɔ ka ɔgyanti lɛnɔ ɔ́lɛ útébo kalɔ na anwu lɛnɔ úkpi. Mmɔ ni, kawɔƒɔ kése kalɔ kaadu-nwu.

²⁰ Na ka únu kɔwɔ kɔmmɔ ɔlɛ ɔ́vili úti ubunku lɛla lɛni muukpóku-nwu ɔsu ni, anwu lɛnɔ úkpi kawɔkɔ mmɔ ina ka bekyuli bani mɔɔƒɔ́-nwu kɔwɔ bése-nwu kayi ka ɔnanabi ɔdi na ɔ́wɔ.

^21-22 Na uwi ɔni na ɔɔyula ni, mmɔ na ɔ́su ɔnini, “Bɛsia-nwu lɛnyi bɛnii Ikabod, ɔsika Katɔti ɔ́ya na Israelƒuɔ bukeye bɔ́yii udu na Bunyimi Adaka ɔni na béƒie báƒɔ mmɔ ɔsu.”