Samuel 1 11 - Katɔti Ɔku Kedee

Saul Úkpo Ɔ́ƒɔ Yabes Ɔma Unengudi Ɔmmɔ

¹ Nahas ɔni ndi Amonƒuɔ ɔga ni, ɔ́tɔnku nwuna bekpone na bésie bátáka ɔma unengudi ɔnii baalɔ Yabes bákya na Gilead kalɔ lɛlɔ. Amu na Yabes banana bammɔ básu-nwu banini, “Si ése-bu kenye ka aládu-bu ni, bɔdubɔkya-a kalɔ na butaabla-a kabla.”

² Nsu Nahas Amonni ɔmmɔ údie kenye ɔnini, “Ɔmmɔ uuubo ɔkplu, nsu asa menu ɔmmɔ kalɔ ni, lɛla linwi lɛdi kani na ami lɛnɔ mɔɔyɔ́ ka lɛbla-mii. Ndubudie ɔnana biala kɔdianu lɛnumi liti lɛkya Israelƒuɔ ƒui kɔƒa.”

³ Ka Yabes benengu bénu ɔmɛni ni, básu-nwu banini, “Te-bu emeyi maatɛ na bɔtala bekyuli bɔkya Israel kalɔ kammɔ ƒui lɛlɔ bekyuli. Na si bútakɛ bekyuli bani nedie-bu ni, na bɔdubɔkya lili kalɔ bute-ɔ.”

⁴ Amu na batalane bammɔ báyu ulu na bátɔlɔ na bétédu Gibea kesii kani na Saul uli. Ka básu bekyuli bammɔ kenye kammɔ ni, bana ƒui béwulo momoomo.

⁵ Na uwi ɔmmɔ lɛlɔ tutuutu ni, Saul ɔ́kpanku nwuna ɔmantɛ bakɔ benengudi ɔ́siku nwuna kemo úsela kaduli. Na ka únu kɔvanu kɔmmɔ ni, úye bekyuli bani nnye mmɔ ɔnini, “Bi mɔɔlɛ́ku bekyuli bammɔ? Na bi ɔsu na beewulo?” Amu na ama lɛnɔ básu-nwu kenye kani na bekyuli bani nási Yabes badanku béboku.

⁶ Ka Saul únu kenye kamɛni ni, Katɔti kɔyu kɔ́ƒɔ-nwu lɛlɔ kemmo kɔnakunwi na ɔ́kɛ kɔnyi geen.

⁷ Mmɔ kani na úƒie ɔmantɛ bakɔ inyɔ ɔ́du na úle lɛna lɛmmɔ wɛlɛwɛlɛ. Amu na úti lɛna lɛmmɔ úte nwuna batalane badi na ɔ́su-ma ɔnii beti lɛna lɛmmɔ na bavi Israelƒuɔ kalɔ lɛlɔ ƒui na batásu-ma banini, “Bɛnu! Ebuo ɔni na ami Saul lɛ́du líle mɛni, si ukyuli ɔni na útata na ɔsiaku-mi ku Samuel na busie butékpo ku Amonƒuɔ ni, ndubɔya na beƒie ukyuli ɔmmɔ ɔmantɛ bakɔ na badu-ma aani kalɛ na líƒie ɔmɛni lɛ́du na líle-nwu wɛlɛwɛlɛ na bɛɛnu mɛni.” Na ka bénu Saul kenye kammɔ ni, Katɔti ɔ́ya na bana ƒui báyia geen, ɔsika bánu ka Katɔti úti ɔyikun ɔdi úte-nwu. Ɔmmɔ ɔsu bana ƒui bénu kalɔ ka basiaku-nwu na betékpo.

⁸ Amu na Saul ɔ́sala nwuna bekyuli lisu na Besek. Na ka báka-ma ni, Israelƒuɔ banana bammɔ babla nkyuli mpim eti aku. Na Yudaƒuɔ banana bebo mpim avlaatɛ.

⁹ Mmɔ na básu batalane bani nébo mmɔ banini, “Bisie na bitásu Yabes Gilead banana bɛnini, ‘Asa na uteedu ɔƒiiwi kɔnaadi ni, bɔdubo bubekpo na bɔƒɔ-mii.’ ” Na ka batalane bammɔ lɛnɔ bénwini bátásu Yabes banana kenye kani na badanku ni, ebiti áda bana ƒui geen.

¹⁰ Amu na Yabesƒuɔ básu Amonƒuɔ banini, “Kɔnaadi ni, bɔdubɔkya-mii lili kalɔ na bɛbla-bu lɛla lɛni na bɛɛyɔ́.”

¹¹ Ɔƒɛni údu uwi ɔni na kadi keteegye ni, Saul úle nwuna bekyuli kemmo akpa atɛ. Na ɔtanta tutuutu ni, bétéyu Amonƒuɔ bátu na bádu-ma laa útédu ɔƒiiwi. Na Amonƒuɔ bakladi bani nébu ni, bégyingya bákya aku kemmo ƒui bávi ɔni na básɔ bátasala lisu na kesii kadi.

¹² Ka kekpo kammɔ kayɔ ni, Israelƒuɔ básu Samuel banini, “Dɛ na bɔdubɔbla bekyuli bani na balayɔ ka Saul ɔdi lɛga mmɔ? Bɛkpanku-ma biboku na bɔdu-ma!”

¹³ Nsu Saul ɔ́su-ma ɔnini, “Kudi kudii, ukyuli unwi pɛ muedi batadu ɔdi. Ɔsika ɔmwi limeyi lɛmɛni lɛlɔ na Unwoti údie-bu ɔ́lɛku bula bekisine enu kemmo.”

¹⁴ Amu na Samuel ɔ́su Israelƒuɔ bammɔ ɔnini, “Bɛya na busie Gilgal na bɔsɔ busie butálɛ ugyii ka Saul ndi Israelƒuɔ ɔga.”

¹⁵ Ɔmmɔ ɔsu bésie Gilgal, na mmɔ ni, bana ƒui bénu kalɔ ka Saul ndi Israelƒuɔ ɔga na Unwoti anumi mmɔ. Na bábla akpala béte Unwoti na bákun lɛna lɛmmɔ básala. Ɔmmɔ kama Saul ku Israelƒuɔ bammɔ bádi limeyi na bákɛ ebiti kaduɛ.