Samuel 1 10 - Katɔti Ɔku Kedee

Samuel Ɔ́su Saul Ka Ɔdubunwini Ɔga

¹ Ɔmmɔ kama ni, Samuel úti ɔsii ɔdi na nnɔmii buwi-nwu kemmo na úwilimi nnɔmii bɔmmɔ úwi Saul lili na ɔ́kya-nwu kɔgbu na ɔ́su-nwu ɔnini, “Geen geen ni, Katɔti ɔ́ƒuna-a ka enwini nwuna kadi bekyuli Israelƒuɔ ɔga.

² Ɔmmɔ ɔsu si átɔlɔ-mi kudɔ mɛni ɔmwi na étédu Selsa na Benyamin kalɛkɛ ɔmii lɛlɔ ni, adubɔsiaku banana inyɔ na kesii kani na báva Rahel. Na badubɔsu-ɔ banini, ‘Bebuo ala betine bani náyii mmɔ ni, bánu-ma. Na bana lɛlɔ litemi lɛsɔ lilekpoku ƒ'ɔti, mmomu awɔ ku ƒula kabla ɔblane lɛlɔ kasusu muukpóku-nwu. Ɔmmɔ ɔsu na ɔkya uuye-mii lili uwi biala ka lɛla lɛni na wabla wasiku-mii lɛlɔ?’

³ “Na ƒula ulu busie kemmo ni, adubɔsɔ asiaku nkyuli ɛtɛ bamba badi na kugyii kunengudi kɔni nnye Tabor kalɔ kemmo. Na bási bésela Betel batákpa bete Katɔti. Adubɔnu ka ukyuli udeedi ɔda bese bakɔdi ɛtɛ badi. Na ukyuli unyɔdi ɔda bodobodo ɛtɛ. Na ɔtɛdi ɔda bebuo ɔku koƒo kɔni kemmo na ntɛ buwi.

⁴ Badubo-ɔ bugyele, na bawia ka bete-ɔ bodobodo ɔni bada mmɔ inyɔ. Awɔ, ƒɔ bodobodo ɔmmɔ.

⁵ “Ɔmmɔ kama ni, teesie Katɔti kɔbi lili. Mmɔ ni, Ƒilistiƒuɔ bekpone keliekɔ kede. Na si áni eedé ɔma ɔmmɔ ni, adubɔnu Katɔti kenye bediene kasala kadi. Ka bénwini bási kesii kani na bátábla akpala béte Katɔti mmɔ badubo. Na bana anumi ni, lɛbentaa ku ebi bagyane ku kɔkpɛɛ bavwine badi batɔ. Na badubo Katɔti kudu buteebo ku adi lidu.

⁶ Na Unwoti Kɔyu kɔdubɔƒɔ-ɔ lɛlɔ kemmo ku nwuna ɔyikun na ese kalɔ eteebo kudu aani bana kalɛ, na adubo bunwini ukyuli udu ɔwɔdi.

⁷ Si ala amɛni álɛ ni, kabla biala na anii aabla ni, na enye-ka lɛlɔ kpakplaa ɔsika Katɔti ulieku-ɔ.

⁸ “Mɔɔyɔ́ ka agyu atɔ-mi na Gilgal. Na ami ndubɔsia-a kama libo mbanu-ɔ na mmɔ. Na bɔdubɔbla akpala bɔkyula bute Katɔti ku unwi bɔbla akpala lɛnɔ. Nsu ɔlɛka enye agya-mi emeyi maatɛ wetédu ka líbo ḿbatina-a lɛla lɛni na ɔlɛka abla.”

⁹ Ka Saul ɔ́gyu ɔɔtɔlɔ Samuel kudɔ kani na Katɔti únwini-nwu kayi ɔ́bla ɔwɔdi, na lɛla biala na Samuel ɔ́su-nwu líbo líte lɛni kani na limeyi lɛmmɔ lɛlɔ.

¹⁰ Na sɔsɔ ka bédu Gibea ni, Katɔti kenye bediene badi bábasiaku Saul. Na Katɔti kɔyu kɔ́ƒɔ-nwu lɛlɔ kemmo ƒui. Na anwu lɛnɔ úduo-ma akɔ na uubó kudu bana kalɛ.

¹¹ Bekyuli pii badi bakya mmɔ bani ngyi Saul kukuuku. Ɔmmɔ ɔsu ka bánu-nwu ka uubó kudu ku kenye bediene bakladi ni, béye lɛlɔ banini, “Eei, bi nálɛku Kis ubidi? Saul lɛnɔ ɔkya kenye bediene akɔ?”

¹² Nsu ukyuli ɔdi na uli mmɔ údie kenye ɔnini, “Na ɔma ndi bana ɔti?” Ɔmɛni ɔsu Saul litemi lɛmɛni línwini lɛsugba na baasu banini, “Saul lɛnɔ ɔkya kenye bediene akɔ?”

¹³ Ka Saul ɔ́da kudu bubo ɔ́ya ni, ɔ́tɔlɔ úsie kakpakɔ na kɔbi lili mmɔ.

¹⁴ Ɔmmɔ kama ni, Saul ku nwuna ɔti ɔwani bása na nwuna úye anwu ku nwuna kabla ɔblane ɔnini, “Wɛ na bísie bɛkya?” Mmɔ na Saul lɛnɔ udie kenye ɔnini, “Bebuo ala betine bani náyii na búsie butáwia. Nsu uwi ɔni na bɔ́nu bɔ́ti ka bɔsɔ bɔɔɔdubo-ma bɔnu ni, búsie bɔnii butéye Samuel kasusu kalɛ na bɔbla.”

¹⁵ Amu na Saul ɔti ɔwani úye-nwu ɔnini, “Na bi na Samuel ɔ́su-mii?”

¹⁶ Saul údie kenye ɔnini, “Ɔ́su-bu ɔnii bɔsɔ butekpoku lɛlɔ, ɔsika báanu bebuo ala betine bammɔ.” Na ɔmmɔ kani na Saul ɔ́su nwuna ɔti ɔwani. Nsu útasu-nwu ka Samuel ɔ́su ka anwu Saul ndubo ɔga bunwini.

¹⁷ Na emeyi adi kama ni, Samuel ɔ́lɔ Israelƒuɔ ƒui ka bebo na basa Mispa na ɔsu-ma lɛla lɛni na Katɔti ubo ute-ma.

¹⁸ Ɔ́su-ma ka Unwoti Israel Katɔti ɔnini, “Lídie Israelƒuɔ ƒui lɛ́lɛku Egyipte kalɔ lɛlɔ ku bana ɔyikun kalɔ ku lɛgakɔdikɔ bamba bani baga mɔɔnya-mii taakya enu kemmo.

¹⁹ Na muuye-mii nnii, ɔɔɔdi ami ndi bina Katɔti. Na muudie-mii na ala ani muukpóku-mii ku bina lɛbibo kemmo? Nsu bíni-mi na bɛɛwia ka ukyuli ɔdi-mii lɛga. Amii alati náƒuna lɛla lɛni na bɛɛyɔ́. Na ami lɛnɔ ndubuse ɔga lite-mii. Ɔmmɔ ɔsu bɛsala lɛlɔ ƒui bibenye-mi anumi na bina atɔƒi kenye.”

²⁰ Amu ka Samuel ɔ́sala Israel adua ammɔ ƒui úboku na bébenye-nwu anumi ni, Benyamin kɔdua na ɔ́ƒuna.

²¹ Mmɔ na Katɔti ɔ́lɛ Benyamin kɔdua kemmo bekyuli lɛnumi ka ama na ɔ́ƒuna. Na kɔdua kɔmmɔ kemmo lɛnɔ ni, ɔ́ya na Matri ɔtɔ kemmo banana bálɛ bébo, na ɔ́ƒuna Saul ɔni ndi Kis ubidi ka anwu madi lɛga lɛmmɔ. Nsu ka bátɛ anumi bámana ni, bátanu Saul na kesii biala.

²² Mmɔ na béye Unwoti banini, “Ukyuli ɔni na álɛ ugyii éte-bu ni, bubo na útebo tɔ útebeduo munuu dɛ?” Amu na Katɔti údie kenye ɔnini, “Ɛɛn, úubo na ɔ́bɛ ɔkya ala ani na bákono bése mmɔ akɔ.”

²³ Ɔmmɔ ɔsu bábabla bátálɔ-nwu béboku. Na ka úbenye-ma akɔ ni, ɔ́kuku úbo ɔ́vi ukyuli biala na unye mmɔ.

²⁴ Amu na Samuel ɔ́su Israelƒuɔ bammɔ ƒui ɔnini, “Bɛɛnu bina ɔga ɔni na Katɔti ɔ́ƒuna úte-mii. Na bina akɔ ƒui ni, ɔdi uuuse aani nwuna kalɛ.” Mmɔ na bana ƒui báva momoomo banini, “Ɔga ulie ngba gyɔlɔɔ!”

²⁵ Ɔmmɔ kama ni, Samuel lɛnɔ úsie anumi na údie ɔga ɔmmɔ kabla ku nwuna ɔyikun ɔni na ubo ɔ́tina-ma. Na únweni ala ammɔ ƒui ɔ́sia kakunkɛ lɛlɔ na bakono bése sɛsɛɛ na Katɔti anumi. Ɔmmɔ kama ni, Samuel údie-ma ulu na bátɔlɔ bésie bana kɔduli.

²⁶ Na Saul lɛnɔ ɔ́tɔlɔ úsie nwuna kaduli na Gibea. Na banana bani mbo kayi na Katɔti ɔlati ɔ́lɛ-ma animi ni, ama ntɔnku-nwu.

²⁷ Nsu bekyuli badi bákya unyeƒi na Saul lɛlɔ básu banini, “Dɛ na ukyuli ɔmɛni udu wakana na waƒɔ-bu?” Anwuɔsu nwuna lɛlɔ lítada-ma kubiti, na béteboku-nwu etela adi. Nsu Saul útakpete-ma.