Sakaria 8 - Katɔti Ɔku Kedee

Unwoti Úse Sion Bekyuli Kenye Kadi

¹ Unwoti Ɔyikune Ƒui ɔ́su-mi ɔnini,

² “Mɔɔyɔ́ Sion geen ɔni na nwuna bekisine baakya-mi kɔnyi.

³ “Ndubɔsɔ linwini lisie Yerusalem na ntélie Sion Kɔbi kedee lɛlɔ. Na bekyuli ƒui badubɔnu Yerusalem bati aani mina ɔma ɔni nsiaku-mi kama siin. Na basu ka Sion ndi mina kɔbi kedee.

⁴ “Na benengu bani na bábi lɛlɔ geen na bada ligyii lɛdadi badubɔsɔ belie bamana Yerusalem.

⁵ Na bananabi ku belekubi bataaƒia na kuyeya.

⁶ Na bekyuli anumi ni, ɔmɛni ɔdi lɛla lɛni na baanu ka libo ɔkplu na liladia bɔbla. Nsu na ami Unwoti Ɔyikune Ƒui kudɔ ni, ese-mi kpɛtɛ kpɛtɛ.

⁷ “Ndubudie bekyuli bani na béti bátɔlɔku bésienku kɔlɔ kɔni nkya ɔƒɛ katukɔ ku kanukɔ

⁸ na basɔ benwini bebelie Yerusalem. Badubunwini mina bekyuli, na ami lɛbla bana Katɔti, na lɛsia mina litemi kama siin, na lɛtɛ bana etemila ulu siin lɛlɔ lite-ma.

⁹ “Na enu ataƒɛ-mii, ɔsika Unwoti Ɔyikune Ƒui na ndi. Bɛbla kasusu bɛsiku etemila ani na mina kenye bediene básu-mii uwi ɔni na baakya mina kakpakɔ kowodu kalɔ ɔka.

¹⁰ Kuuku asa na uwi ɔmmɔ úbedu ni, nka ukyuli ɔyawine iye ebuo ɔdi uuubo lɛyuƒɔla lɛdi na nwuna kabla kani na ɔ́bla ɔsu. Na keyi buɛɛ kadi lɛnɔ keeebo na ɔdi ulie na atu bɔyɔ kemmo, ɔsika lɛ́ya na bana ƒui báta bénye lɛlɔ lɛlɔ.

¹¹ Mina bekyuli, bɛɛnu ka bina ɛlɛɛ kani nébu, na muudie-mii kenye ka nsɔ lɛɛɛdubo-mii kɔtu bɔni aani kalɛ na lɛ́bla ḿbavi kuuku kalɛ.

¹² “Mmomu ni, ndubɔnu ka bɛkya bina edula ɔƒaamu na atu bɔyɔ kemmo, na bina adingyii mmo lɛnɔ adubɔbla kaduɛ na anwu ebi pii. Na bina katumalɔ kadubulie lɛmwi, na amii ayu ewi bina edula lɛlɔ.

¹³ Amii Yuda ku Israel kadi bekyuli, bínwini lɛla lɛni na beewida taakya kadi ƒui bekyuli banii ɔdubɔlɛku-ma aani amii. Nsu ndubɔƒɔ-mii na binwini kusɛ kusɛ bite-ma ɔƒɛni amu. Anwuɔsu bitayila bina lɛnunsia na enu aƒɛ-mii.

¹⁴ “Uwi ɔni na bina bati kuuku bákya-mi kɔnyi ni, lɛ́lɛ ugyii ka lɛya na ɔgbankpi ubo-mii lɛlɔ liti lɛni-mii kɔtu na ńteni ɔmɛni bɔbla.

¹⁵ Nsu ɔƒaani ni, ɔ́sɔ útalɛka bɛyia. Ɔsika lɛ́lɛ ugyii ka lɛda amii Yerusalem ku Yudaƒuɔ ƒui kɔkɔɔkɔ.

¹⁶ Nsu bɛsu lɛlɔ litemi geen lɛmmɔ, na bɛnu ka bɛɛtɛ etemila na ulu lɛlɔ siin teete bekyuli kalɛ na uboku keyi buɛɛ.

¹⁷ Bitakya likpidi kɔkwɛ na bina bakpana lɛlɔ kudii na bitakpali ala bitanyi ɔkɔ bitasia bina bekyulikpana. Ɔsika ami, Unwoti, nkisi ala ammɔ udu.”

Bɛdi Limeyi Na Uwi Lɛlɔ

¹⁸ Unwoti Ɔyikune Ƒui ɔ́su-mi ka nsu-mii nnini,

¹⁹ “Amii Yuda kadi bekyuli, ami Unwoti mɔɔwia ka uwi biala na bɛnii biinyimi kenye na biti bɛkpali-mi ni, ɔlɛka uwi ɔmmɔ unwini limeyi bɔdi uwi. Kɔbuli kunedi kɔdi o-o, kɔbuli kɔlɔndi kɔdi o-o, kɔbuli maatɛdi o-o, leevudi kɔdi o-o ni, ɔlɛka bɛdi limeyi ku lɛlɔyɔ. Anwuɔsu bɛyɔ litemi geen kama bɔsia na bilieku lɛlɔ ku keyi buɛɛ.

²⁰ “Na mɔɔsu-mii geen ka bekyuli badubɔsi lɛma linengudi ku kesii bamba ƒui bebo mɛni.

²¹ Na ɔma unwi ɔdubɔsu ɔma bamba ɔnini, ‘Búsela butákpali Unwoti Ɔyikune Ƒui na ɔnu-bu ku lɛƒɔndia, anwuɔsu bibo bibebunku-bu na busie.’

²² Kadi bayikune pii badubɔsi bana kɔlɔ bebo Yerusalem babakpali-mi na bevele-mi banii nnwini nnu-ma ku lɛƒɔndia.

²³ Na uwi ɔni na ala amɛni adubo butaalɛ lɛni ni, kadi bamba bekyuli adi batɛmine aani leevu badubuƒie Yudani adala ani na ɔkya bada momoomo na basu-nwu banini, ‘Ya na bɔsiaku-ɔ busie bina ɔma, ɔsika búnu ka Katɔti unye-mii kama geen.’ Ami Unwoti Ɔyikune Ƒui násu!”