Sakaria 7 - Katɔti Ɔku Kedee

Kalɛ Na Ɔlɛka Benyimi Kenye

¹ Na Ɔga Dario lɛga bɔdi lɛkwa linedi nwuna kɔbuli kunedi kɔni baalɔ banii Kislev kemmo ni, Unwoti ɔ́sɔ ɔ́su-mi lɛla lɛdi.

^2-3 Na lɛla lɛmɛni lɛ́lɛ na uwi ɔni na Betelƒuɔ bekyuli bátala Sareser ku Regem Melek ku bana bekyuli banii betévele bakpane na Katɔti kakpakɔ ku Katɔti kenye bediene na beye-ma benu banini, “Bunyimi na ɔ́lɛka bunyimi kenye na kɔbuli kɔlɔndi kemmo kalɛ na bɔ́bla akwa pii ani návi?”

^4-5 Mmɔ na Unwoti Ɔyikune Ƒui ɔ́su-mi ka nye ukyuli biala na kalɔ kammɔ kemmo ku bakpane lɛnɔ ƒui nnini, “Akwa liti ku aavlanyɔ sɔɔn na bínyimi kenye na kɔbuli kɔlɔndi ku maatɛdi kemmo. Nsu muuye-mii ni, ami geen na bínyimi kenye kammɔ bíte?

⁶ Na si bɛ́di na bɛ́kɛ bɛɛní lɛnɔ ni, ɔɔɔdi amii bina ebiti ku lɛlɔyɔ kani na ɔdi?

⁷ Mina kenye kani na mbo nte-mii ɔmwi ni, aka kani na líbo kenye bediene bakukudi bammɔ ɔda ka basu Yerusalem ku nwuna akpaklɔ lɛma lɛmmɔ uwi ɔni na ala átɛnku-ma, na bekyuli báƒɔ Yuda ƒui ku Negev.

Yuda Bekyuli Bábla Atu Ɔkplu

^8-9 “Anwuɔsu ami, Unwoti Ɔyikune Ƒui, nsɔ mɔɔsu-mii nnii bɛnu ka bɛ́tɛ etemila ulu siin lɛlɔ. Na bɛbla lɛƒɔndia na bɛnu lɛlɔ kɔnyana lɛnɔ.

¹⁰ Bɛsɔ bitabla bekpinele iye bekpinebi iye baƒɔ iye bawabane ulikplu. Na bɛsɔ bitelie bitataakya likpidi bɔbla kɔkwɛ na bina bakpana lɛlɔ ka bɛbla-ma kalala.

^11-12 “Nsu bekyuli bani ƒui nénu kenye bediene bammɔ ala bɔsu bábla atuɔkplu na béni litemi lɛmmɔ bunu. Mmomu bénwini kama bákya lɛla biala na mina kɔyu kɔ́tɔnku kenye bediene kuuku bammɔ na bákɔ-ni lɛsa béte bekyuli. Ɔmmɔ ɔsu na ami Unwoti lɛnɔ lɛ́kɛ kɔnyi geen!

¹³ “Na lɛ́su nnini, ‘Uwi ɔni na lɛ́kpali-mii límene ni, bina akɔ ɔdi biala útenu-mi litemi. Anwuɔsu ami lɛnɔ lɛɛɛdubo bina litemi bunu.

¹⁴ Anwuɔsu na líbo na ndaku ɔƒɛƒɛɛ kpakplaa ɔni mɔɔkya ligede na ḿbegyingya bana ƒui lɛ́kya kaƒɔ kɔlɔ ƒui lɛlɔ, na báda bana ɔma ɔbuni ɔmmɔ béwi, na bekyuli bása-nwu kemmo na bébile ala lɛnɔ.’ ”