Sakaria 12 - Katɔti Ɔku Kedee

Yerusalem Ɔ́di Lɛlɔ

¹ Linyesia lɛmɛni lɛdanku Israel na lɛ́si Unwoti kudɔ lɛnini, “Ami ndi Unwoti! Na ami nébimi kayaa lɛ́ƒala katɔ, na lɛ́ya na kalɔ kenye kana ɔka lɛlɔ, na líti ɔƒɛƒɛɛ líte ukyuli na ɔɔnwuna.

² Ami náya na Yerusalem únwini aani ntɛ ku kalaku bonwu na liku bekyuli kɔlɔ bekyuli baaní-mu teekpi. Na si békpoku Yerusalem ni, na badubo Yuda lɛnɔ bukpoku.

³ Nsu ndubo Yerusalem bɔbla na unwini lɛtabi bonwu lɛni na ukyuli biala makali ɔnii ɔɔgyú-ni ni, lɛdubɔyu-nwu na ukpi.

⁴ Na ndubɔya na ɔtɔtɔ ɔgyu ɔpɔnkɔ biala na bana beliene lɛnɔ beƒu. Nsu na uwi ɔmmɔ kani lɛlɔ ni, ndubo Yuda lɛlɔ butaanu. Na ndubɔya na bekisine bammɔ bapɔnkɔ anumi abwɛ na basɔ balakana bɔnu.

⁵ Na kɔdua biala na Yuda mmɔ badubɔnu ka ami ndi Unwoti Ɔyikune Ƒui ɔni ndi bana Katɔti ɔni kudɔ na baakɛ́ bana ɔyikun ƒui taasiku.

⁶ “Na uwi ɔmmɔ ni, ndubɔya na Yuda adua ammɔ enwini aani ogya agyabi bonwu bonwu na egyuku livongu kemmo, iye ogya ɔni mɔɔkya keti litili bonwu lɛdi kemmo. Na ndubɔya na bakya kadi bamba bekyuli bani náka bámana-ma ƒui ogya. Na bekyuli basɔ baƒɔ Yerusalem ɔma pii geen.

⁷ “Nsu ni, ndubɔya na Yuda ɔ́ka lɛlɔ bɔdi kalɛ na bekyuli balanu Ɔga Dawid lɛga kadikɔ ku Yerusalem ku nwuna bukeye ƒui beletulo Yuda.

⁸ Ami Unwoti Katɔti ndubo Yerusalem bɔgyumana na ukyuli ɔni na use kpɛtɛ kpɛtɛ utulo ƒui muedi ni, ɔdubɔyu ɔkplu aani Dawid. Na Dawid ɔmmɔ ɔlati lɛga kadikɔ kadubɔbla aani si ami ɔlati mina ɔtu mɔɔdi kalɔ kammɔ lɛlɔ.

⁹ Lɛ́lɛ ugyii geen ka libile na lɛyila kadi kani mekpoku Yerusalem.

Béwulo Kɔnyana Na Ukyuli Ɔni Na Bátu Lɛtula Ɔsu

¹⁰ “Ami Unwoti ndubɔya na Yerusalem bebi ku bawɔ ƒui beduo kɔnyana bonwu kɔdi kemmo na bakpali-mi bevele uwi ɔni na bánu ukyuli ɔni na bátu lɛtula lɛdi. Na badubo-nwu buwulo aani kalɛ na bawɔne badi beewulo bana ubi unwi pɛ ɔni na báwɔ na úkpi iye ubi udeedi ɔni na báyila.

¹¹ Limeyi lɛmmɔ ni, Yerusalem kadi bekyuli badubo buwulo aani kalɛ na ukyuli biala úwulo Hadad Rimon na kesii kani baalɔ Megido.

¹² “Ukyuli biala na kaduli biala kemmo na kalɔ kammɔ lɛlɔ ɔdubo kɔnyana buwulo na banana ku bana beleku badubudie lɛlɔ lɛti na betéwulo. Na Dawid kaduli bekyuli babla lɛni, na Natan badi lɛnɔ babla lɛni.

¹³ Na Lewi ku Simei kaduli bekyuli lɛnɔ badubɔbla lɛni kani.

¹⁴ Na adua akladi bekyuli ƒui lɛnɔ ku bana beleku lɛnɔ badubɔbla lɛni.”