Romaƒuɔ 6 - Katɔti Ɔku Kedee

Kristo Ɔsu Na Bulie Ngba

¹ Ɔmɛni ɔsu ni, bi na ɔdi ka bɔsu? Buusié anumi butaabla likpidi kalɛ na Katɔti lɛƒɔndia limomo libu?

² Oowo! Kudii! Ɔsika búkpi, na likpidi lɛsɔ liládi-bu lɛlɔ! Na bi ɔsu na ɔ́sɔ ɔlɛka bulie butaabla ala ekpidi?

³ Uwi ɔni na bákpila-bu ntu ɔkɛnku Yesu Kristo lɛlɔ na abu ku-nwu bɔ́bla unwi ni, bɛgyi ka ntu bɔni na bákpila-bu mmɔ bɔ́ya na bɔ́blaku-nwu unwi útédu nwuna kukpi kemmo lɛnɔ.

⁴ Na ɔkɛnku ntu bɔkpila bɔmmɔ ɔsu ni, ɔɔtina ka abu lɛnɔ búkpi na báva abu ku-nwu. Na Katɔti ɔkɛnku nwuna bukeye ku ɔyikun lɛlɔ ɔ́gyila Kristo ɔ́lɛku bekpine akɔ kalɛ na abu lɛnɔ bɔta bubelieku-nwu ngba bɔwɔdi bɔmmɔ.

⁵ Na si abu ku-nwu bɔ́bla unwi na nwuna kukpi kemmo ni, Katɔti ɔdubɔya na bɔblaku-nwu unwi na nwuna bɔsɔ bɔta kemmo.

⁶ Na bɔgyi ka bula udu ɔkukudi ɔmmɔ ku Kristo na bákana bámana ugyii lɛlɔ kalɛ na likyulikpi lɛyii udu na bula lɛlɔ, na bula ɔlɔna ɔsɔ ulenye ulátaabla likpidi kabla.

⁷ Ɔsika si ukyuli úkpi ni, likpidi lɛsɔ liiibo ɔyikun ɔdi na nwuna lɛlɔ.

⁸ Na si abu ku Kristo búkpi ni, bɔɔƒɔ́ taadi ka abu ku-nwu bɔdubulie ngba.

⁹ Na bɔgyi ka Katɔti ɔ́gyila Kristo ɔ́lɛku kekpine ɔni na ɔsɔ ulekpi. Na kukpi kɔsɔ kuuubo ɔyikun ɔdi na nwuna lɛlɔ.

¹⁰ Kristo kukpi kɔni na úkpi ni, úkpi kunwi pɛ na likpidi lɛsɔ liládi-nwu lɛlɔ. Na ngba bɔni na uli ɔƒɛni ni, uli-mu úte Katɔti.

¹¹ Na lɛni kani na ɔlɛka amii lɛnɔ bitaanu lɛlɔ ka bíkpi na likpidi lɛsɔ liládi-mii lɛlɔ. Na ɔlɛka bilie ngba bite Katɔti na amii ku Kristo Yesu unwi bɔbla kemmo.

¹² Anwuɔsu bitaya na likpidi lɛdi bina ɔlɔna ɔni ndubukpi mɛni lɛlɔ, kalɛ na bilanyonu lɛlɔ bilete ɔlɔna ɔkwɛ adala ekpidi.

¹³ Iye bitete kuƒi na likpidi lɛƒɔ bina ɔlɔna kemmo kesii biala na bitaabla likyulikpi. Mmomu biti bina lɛlɔ bite Katɔti aani bekyuli bani na Katɔti ɔ́gyila ɔ́lɛku kukpi kemmo úboku ngba kemmo. Na bɛnyonu bina lɛlɔ ekpo ƒui bite Katɔti aani ala ani nse siin na uti ɔbla nwuna kabla.

¹⁴ Ɔsika likpidi liiibo ɔyikun na bina lɛlɔ ka biiibo ɔda bubo kalɔ ɔsu. Mmomu bɛkya Katɔti lɛƒɔndia kalɔ.

Biti Lɛlɔ Bite Ala Siin Bɔbla

¹⁵ Na bi na bɔdubo bɔsu? Ka bɔɔɔkya ɔda bubo kalɔ na Katɔti lɛƒɔndia kalɔ mmomu na bɔkya ɔsu ni, ɔlɛka butaabla ekpidi? Oowo. Kudii!

¹⁶ Bɛgyi geen ka ni, si bínu lɛlɔ kalɔ na bíti bina lɛlɔ bɛ́kya ukyuli ɔni kabla na bɛɛbla kalɔ ni, na bɛdi ukyuli ɔmmɔ kabla bablane. Anwuɔsu bɛkana binwini kabla bablane bite likpidi lɛni mɔɔkpanku ukyuli taatákya kukpi kemmo. Na bɛkana binwini kabla bablane bite lɛbuni lɛni mɔɔkpanku ukyuli taatákya siin bɔbla kemmo.

¹⁷ Nsu bɔɔgyá Katɔti enu, ɔsika uwi ɔdi kemmo ni, bɛdi kabla bablane bite likpidi. Nsu ɔƒɛni ni, bíti bina kayi ƒui bɛɛdi litemi geen lɛni lɛ́tina-mii mmɔ lɛlɔ.

¹⁸ Na bɛ́lɛ likpidi enu kemmo, na bínwini kabla bablane bíte ala siin bɔbla.

¹⁹ Mɔɔyɔ́ ka lɛsia kalɛ na bekyuli baatɛmi kenye na lidie ɔmɛni kalɔ lite-mii na ɔbla-mii kpɛtɛ kpɛtɛ. Na uwi ɔni nábavi kemmo ni, bɛ́nyonu lɛlɔ ƒui bíte alaekpidi bɔbla ku ala ani muusé lɛlɔ ku likyulikpi ala bɔbla. Lɛni kani na ɔlɛka biti lɛlɔ ƒui bite siin bɔbla na bɛbla kedee.

²⁰ Uwi ɔni na bɛdi kabla bablane bite likpidi ni, siin bɔbla uládi-mii lɛlɔ.

²¹ Na bi kɔsia na bɛ́kɛ bɛ́siku ala ani bɛ́bla bɛ́vi na eekpó-mii kɔƒa ɔƒɛni lɛlɔ? Ala ammɔ ƒui kɔsia ndi kukpi.

²² Nsu ɔƒɛni ni, bɛ́lɛ ekpidi enu kemmo na bɛ́kɛ bɔnwuna. Na bínwini Katɔti kabla bablane. Ɔmmɔ ɔsu kɔsia kɔni na bɛɛkɛ́ ndi ɔni na bíti lɛlɔ bíte-nwu ƒui na bɛɛbla kedee kalɛ na bɛkɛ ngba bɔni nsɔ naaadubo bɔsa kudii.

²³ Ɔsika likpidi lɛyuƒɔla ndi kukpi. Nsu Katɔti lɛƒɔndia lɛni na úte-bu ndi ngba bɔni naaadubo bɔsa kudii ɔkɛnku abu ku Kristo Yesu ɔni ndi Blɔti unwi bɔbla ɔsu.