Kɔgya 99 - Katɔti Ɔku Kedee

¹ Unwoti ɔɔdi lɛga, liƒu litaada kadi bekyuli. Uli nwuna lɛgaboku lɛlɔ na batu udu bani mbo avwi na baalɔ-ma kerub ntɛ na kayawi kemodi kammɔ ƒui kaakunku.

² Unwoti, awɔ ntulo ƒui na Sion na ƒula lɛnyi lɛ́kɔ katɔ na kadi bekyuli ƒui akɔ.

³ Bɛya na ɔdi biala umwi Unwoti lɛnyi lɛni ntulo na lɛɛda liƒu mmɔ, ɔsika anwu kani nse kedee.

⁴ Awɔ ndi bula ɔga unengudi ɔni mɔɔyɔ́ ala bɔbla siin. Áya na litemi bɔtɛ ulu lɛlɔ siin unye kpakplaa na Israel kadi bekyuli akɔ.

⁵ Bimwi Unwoti bula Katɔti! Bibo na bibakya-nwu lili kalɔ na nwuna lɛgaboku anumi, ɔsika anwu kani nse kedee.

⁶ Bula bati kuuku Mose ku Aaron bakya Katɔti bakpane akɔ. Na bula Nana Samuel lɛnɔ ubunku-ma na bákpali Unwoti na úbunku-ma.

⁷ Unwoti ɔ́tɛmiku-ma ɔ́siku liƒlukutu bonwu aani lɛkpa lɛdi kemmo. Na ama bénu na bádi nwuna ɔda bubo lɛlɔ.

⁸ O Unwoti, bula Katɔti, uwi ɔni na ƒula kadi bekyuli bábla likpidi ni, áni-ma kɔtu nsu ka bákpali-ɔ ni, énu na éti bana ekpidi ákyiɛ-ma.

⁹ Bimwi Unwoti bula Katɔti na bɛkpa-nwu na nwuna kɔbi kedee lɛlɔ, ɔsika Unwoti, bula Katɔti, use kedee.