Kɔgya 94 - Katɔti Ɔku Kedee

¹ O Unwoti Katɔti, awɔ ani muudie alaekpidi bablane kasi, ta na ani-ma kɔtu.

² Awɔ mɔɔtɛku bayawine ƒui litemi. Bo na ebedie bekyuli bani mɔɔkɔliku lɛlɔ katɔ kasi kani námanku-ma.

³ Uwi ɛlɛ na balalane bamɛni badubulie bataakun lɛmɛnɛ ku lɛlɔyɔ betédu?

⁴ Enyekpi kani na baatɛmi uwi ndi uwi na baakun lɛmɛnɛ na bana likyulikpi ala ani na baabla lɛlɔ.

⁵ Baanya ƒula bekyuli baƒunadi taakya na beekpóku-ma.

⁶ Baadú bekpinele ku baƒɔ ku bekpinebi lɛnɔ.

⁷ Na baasu banini, “Unwoti Katɔti na bula nana Yakob ɔ́kpa ɔɔɔgyi na ulánu ala amɛni.”

⁸ Amii badɔlɔdi, uwi ɔmani geen na bɛdubo anu bɔda?

⁹ Unwoti ɔni námana ukyuli kɔtu na úte-nwu anumi ni, uunú na ɔɔnu kede kede.

¹⁰ Katɔti dɔnku kadi bekyuli ƒui Lɛni kani na ɔdubɔni-ba kɔtu. Na ubo lɛnunda na ɔɔtina bekyuli ala.

¹¹ Katɔti ɔgyi ukyuli ɔyawine ka nwuna kasusu kaaadi lɛla lɛdi.

¹² Unwoti, lɛlɔ lɛdubɔyɔ ukyuli ɔni na áni kɔtu na édie ƒula ɔda bubo átina-nwu.

¹³ Na adubɔya na bakɛ bɔnwuna bɔsiku bana bekisine kudɔ si beekpóku-ma wetédu uwi ɔni na bekisine bammɔ békpi.

¹⁴ Ɔsika Unwoti ɔɔɔdubo kama bunwini bɔkya nwuna bekyuli baƒunadi.

¹⁵ Na ɔdubɔya na litemi batɛne basɔ bataatɛ etemila ulu siin lɛlɔ na bani nse siin ƒui basia-ma kama.

¹⁶ Ɔma ndubo-mi bubunku na ukpo balalane bammɔ ute-mi?

¹⁷ Si ɔɔɔdi Unwoti nébunku-mi ni, nka líkpi na ami ɔdi ɔ́sa.

¹⁸ Uwi ɔni na lɛ́nu lɛ́ti ka nsɔ liiinye mina lɛgba lɛlɔ na muubuli ni, awɔ Unwoti ɔni mɔɔyɔ́-mi uwi ndi uwi náda-mi.

¹⁹ Uwi ɔni na ala étulo-mi na kayi kaakpulu-mi ni, awɔ násia-mi kɔnu na mina kayi kákɛ ebiti.

²⁰ Belikplune bani mɔɔdi lɛlɔ ni, awɔ ku-ma biiibo kɔna kɔdi, ɔsika béti ala ani na balábla siin bénwini ɔda bubo bényimi bekyuli.

²¹ Na baasa lili na bekyuli bani nse siin lɛlɔ. Na bani na bátaƒiɔ muedi ni, baadú-ma kɔtɔ ka badu-ma.

²² Nsu Unwoti ndi mina kagyumanakɔ kpakplaa ku lɛtakpɛ lɛni kudɔ na mɔɔbɛ́.

²³ Na ɔdubudie mina bekisine kasi ute-mi na ɔyila-ma udu.