Kɔgya 92 - Katɔti Ɔku Kedee

¹ Ɔdia ka butaagya awɔ Katɔti enu na budie lɛnu bumwi awɔ Unwoti Ɔyikune Ƒui.

² Na ɔdia ka buteebo-ɔ kudu ɔtanta biala, kalɛ na aayɔ́-bu uwi ndi uwi. Na usien ni, bɔkɔ lɛsa lɛnɔ kalɛ na asia ƒula litemi kama.

³ Na bumwi-ɔ ku bula lɛbentaa ku agyala abambadi.

⁴ O Unwoti, áya na lɛlɔ lɛɛyɔ́-mi na ƒula ablala ebendi ɔsu. Na anya ɔsu na muudie ebiti lɛnu.

⁵ Unwoti, ƒula ablala ébomo na ƒula kasusu kemmo kágyu.

⁶ Ususu ɔdi ulakana-ka bɔnu bɔti na ɔdɔlɔdi lɛnɔ ulénu-ka kalɔ.

⁷ Ɔmɛni ɔsu na si balalane ku ekpidi bablane bálɛ lili aani livo wɔwɔɔwɔ dɛ ni, badubo udu bɔyii ƒui kede kede.

⁸ Ɔsika awɔ Unwoti ƒula lɛnyi lɛ́kɔ katɔ úsela uwi ƒui.

⁹ Na geen ni, bani muukisi-ɔ kpakplaa mmɔ ƒui badubo udu bɔyii. Na likyulikpi ala bablane lɛnɔ adubo-ma bɔbɔku na egyingya-ma.

¹⁰ Awɔ náya na mbo ɔyikun aani akɔ ɔgyani. Na áƒuna-mi na ndi awɔ ɔdi.

¹¹ Na ami ɔlati lɛ́nu na línu kalɛ na ádi mina bekisine balalane lɛlɔ.

¹² Bekyuli bani nse siin beebimi aani kubo na baalɛ́ lili aani Lebanon kalɔ egyii enengudi.

¹³ Bese aani egyii ani bálɛ na Katɔti kaduli na baalɛ́ lili na mmɔ.

¹⁴ Na ina ábi lɛlɔ muedi adubo butaanwu, ɔsika ebo ntu na eedie evete wɔwɔɔwɔ.

¹⁵ Ɔmɛni ɔɔtina ka Katɔti ndi mina katamikukɔ lɛtakpɛ lɛni nse siin na ulábla likpidi lɛdi.